YOANO 15 - Embimbiliya - Bíblia Sagrada em Umbundu

¹ Ame nduyuva wocili, Tate eye ongunja yaco.

² Ocanja cosi cange ka cimi epako, o ci sonjako, kuenje cosi cime epako, o ci sonjela oco cime epako lia lua.

³ Puãi ene wa sonjelui ale londaka nda popia lene.

⁴ Kali vokuange, kuenje ame ñalavo vokuene. Ndeci ocanja ka ci tẽla oku ima lika liaco, te ci tokeka kuyuva, haico ene nda ko kala vokuange.

⁵ Ame nduyuva, ene vuvianja viaco. U o kala vokuange, kuenje ame ñala vokuaye, eye ima epako lia lua. Puai nda wa tundi vokuange ka vu tẽla oku linga cimue.

⁶ Umue nda ka kala vokuange, inasiwa ndolumbange, kuenje o kukuta. Ovianja viaco va vi ongolola, va vi imba vondalu, kuenje vi pia.

⁷ Nda vu kala vokuange kuenje olondaka viange vi kala vokuene, pingi cosi vu yongola kuenje cu lingilua.

⁸ Kokuima kuene epako lia lua oko Tate a muisilua ulamba, kuenje vu lekisa okuti vulondonge viange.

⁹ Ndeci Isia a sole ame, haico ame ndo soli ene. Kali vocisola cange.

¹⁰ Nda vu pokola kovihandeleko viange, vu kala vocisola cange, ndeci ame nda pokola kovihandeleko via Tate, kuenje ñasi vocisola caye.

¹¹ Ovina evi ndo vi popeli okuti esanju liange li kala vokuene, kuenje esanju liene li suapo.

¹² Ocihandeleko cange ceci, siti, Lisoli pokati ndeci ndo soli.

¹³ Ocisola ca velapo eci ka kuli, cokuti omunu o pesila akamba vaye omuenyo waye.

¹⁴ Ene wakamba vange nda vu linga ovina ndu handeleki.

¹⁵ Siu tukuli vali akuenje, momo ukuenje ka kũlĩhile eci ñala yaye a lingainga, puãi ndo tukuli akamba, momo ndo sapuili ovina viosi nda yeva ku Tate.

¹⁶ Heneko wa mbali, ame muẽle ndo vali, kuenje ndo tukuili okuti wendi ha wimi epako, lepako liaco li kala. Oco cosi vu pinga ku Isia vonduko yange u ciha.

¹⁷ Ndu handeleki siti, Lisoli pokati.

¹⁸ Nda oluali lu u suvuki ivaluki okuti ame lua lianga oku suvuka.

¹⁹ Nda wa kaili vakualuali nda oluali lua sola valuo, puãi, omo kavuvakualualiko, omo ame ndo noli voluali, oco oluali lu-u suvukili.

²⁰ Ivaluki ondaka nda popia lene, siti, Ukuenje ka velipo okuti ñala yaye o sule. Nda va fũkĩlisa ame, ene vo fũkĩlisivo, nda va pokola kondaka yange va pokolavo kondaka yene.

²¹ Puãi onduko yange oyo vo lingili ovina evi viosi, momo ka va kũlĩhile u wa numa.

²² Nda sieyile, kuenda nda sia popele lavo, nda ka va kaile lekandu, puãi cilo ka va kuete etatelelo liekandu liavo.

²³ U o suvuka ame o suvukavo Tate.

²⁴ Nda sia lingilile pokati kavo ovina okuti lomue ukuavo wa la vi linga, nda ka va kaile lekandu, puãi cilo, kavali ketu, lame la Tate, va tu mola kuenje va tu suvuka.

²⁵ Puãi ca lingilua ondaka yocihandeleko cavo citi, Va suvuka ño olivova.

²⁶ Puãi eci Ñuatisi eya, u o tunda ku Isia kuenje ndu tuma kokuene, haeye Espiritu liocili o tunda ku Isia, eye o njimbila uvangi.

²⁷ Ene vu njimbilavo uvangi, momo wa kaili lame tunde kefetikilo.