YOANO 14 - Embimbiliya - Bíblia Sagrada em Umbundu

¹ Ovitima viene ka vi ka tokotelue, koleli Suku, ñolelivo ame.

² Vimbo lia Tate muli olonjo via lua. Nda hacoko, nda ndo ci sapuilili, momo ngenda oku vu angiliyila ocitumalo.

³ Kuenje eci ngenda oku vu angiliyila ocitumalo, njiya vali, ndu wupilili okuti oku ñasi, haiko vu kalavo.

⁴ Oku ngenda wiko, lonjila yaco vu yi.

⁵ Tomasi wo pula hati, A Ñala, oku wenda ka tu iko, oco onjila yaco tu yi kũlĩha ndati?

⁶ Yesu wa popia laye hati, Ame ndinjila, haime ndicili, haime ndimuenyo. Lomue iya ku Isia, te lame.

⁷ Ame, nda wa ñulĩhili, nda wa kũlĩhivo Tate. Tunde opo wo kũlĩhi kuenda wo moli.

⁸ Filipu wa popia laye hati, A Ñala, tu lekise Isia, kuenje ci tu tẽla.

⁹ Yesu wo pula hati, A Filipu, osimbu yosi eyi nda kala lene haimo ku nji? U wa mola ame haeye wa mola Isia, oco o popia ndati, huti, Tu lekise Isia?

¹⁰ Kua kolelele hẽ okuti ame ñasi mu Isia, kuenje Isia o kasi vokuange? Olondaka evi mopia lene si vi popi locipango cange, puai Isia o kasi vokuange eye o lingainga upange waye.

¹¹ Ñoleli okuti ñasi mu Isia, kuenje Isia o kasi vokuange, nda hacoko, ñoleleli ovilinga ndingainga.

¹² Mopia lene siti, Ocili, ocili, u o ñolela, ovilinga ndingainga o vi lingavo, kuenda o linga ovilinga via velapo vali okuti evi vi sule, momo ame ngenda ku Isia.

¹³ Kuenje cosi vu pingila vonduko yange ndi ci linga, okuti Isia o muisua ulamba ku Mõla.

¹⁴ Nda vu pingila cimue vonduko yange ndi ci linga.

¹⁵ Nda vu sole ame, pokoli kovihandeleko viange.

¹⁶ Kuenje ndi pinga ku Isia okuti o wihi Oñuatisi yikuavo yi kala ño-o hũ lene.

¹⁷ Eye Espiritu liocili, oluali ka lu tẽla oku u tambula momo ka lu lete, ka lu wi. Ene puãi vu wi, momo wa tunga lene, kuenda o kala vokati kene.

¹⁸ Siu si olosiwe, njiya vali kokuene.

¹⁹ Handi, okasimbu kaño oluali ka lu moli vali. Ene puãi vu mola. Omo ame ñasi lomuenyo, oco ene vu kalavo lomuenyo.

²⁰ Keteke liaco vu kũlĩha okuti ñasi mu Tate, lene vu kasi vokuange, kuenje ame ñasi vokuene.

²¹ U o kuete ovihandeleko viange kuenje o vi lava eye o sole, lu o sole ame eye o soliwe la Tate, kuenje ndu solavo, loku limolehisa kokuaye.

²² Yuda, puãi ha Yuda Isikariote ko, wo pula hati, A Ñala, ci kasi ndati okuti o limolehisa kokuetu, puãi koluali hakoko?

²³ Yesu wo kumbulula hati, Umue, nda o sole ame, o pokola kondaka yange, Tate u solavo, oco etu tuiya kokuaye kuenje tu tunga laye.

²⁴ U ka sole ame, ka pokola kondaka yange. Ondaka vu yevite hayangeko, puãi ya Isia wa numa.

²⁵ Ovina evi nda vi vanguila lene osimbu ñasi handi lene.

²⁶ Puãi Ñuatisi, haeye Espiritu Sandu, una Isia a tumila vonduko yange, eye u longisa ovina viosi, kuenda o wivaluisi ovina viosi nda popia lene.

²⁷ Ndu sili ombembua, ndu wihi ombembua yange, ndeci ci ihaiha oluali hacoko ndu wihi. Ovitima viene ka vi ka tokotelue, ka vi ka kale lusumba.

²⁸ Wa yevi eci nda popia lene siti, Ngenda kuenje njiya vali kokuene. Nda wa soleli, nda wa sanjukili omo ngenda ku Isia, momo Isia wa mbelapo, ame ndi sule.

²⁹ Cilo, ndo ci sapuili osimbu ka ca lingiwile, okuti, eci ci lingiwa, vu kolela.

³⁰ Si popi vali lene ca lua, momo ombiali yoluali lulo yi kasi loku iya. Eye ka kuete omoko lame.

³¹ Puãi ame ndinga ndeci Isia a ñundika oco oluali lu limbuke okuti ame sole Isia. Votoki. Tu tundi mulo.