YOANO 13 - Embimbiliya - Bíblia Sagrada em Umbundu

¹ Oco, osimbu ofesta yo Pascoa ka ya fetikile, Yesu wa kũlĩha ale okuti ekumbi liaye lioku tunda voluali lulo ha endi ku Isia, lieya. Ava va kala vaye muẽle voluali lulo wa va sola, kuenje wa va sola muẽle toke kefulilo.

² Eliapu lia ci kapa ale vutima wa Yuda Isikariote, omõla a Simono, oku u pakula.

³ Kuenje Yesu wa kũlĩha okuti Isia wa kundika ovina viosi povaka aye, kuenda okuti, ndeci a tunda ku Suku, haico a enda ku Suku.

⁴ Oco, osimbu va kala loku lia, Yesu wa votoka komesa, wa lula ocikutu caye, kuenje, oku nyañula etuaya, wa li itika pimo.

⁵ Oco, oku itila ovava pombasiya, wa fetika oku sukula olomãi violondonge, kuenda oku vi puenya letuaya a litika lalio.

⁶ Oco weya ku Simono Petulu. Petulu wa popia laye hati, A Ñala, ove nga, o sukula olomãi viange?

⁷ Yesu wo kumbulula hati, Eci ñasi loku linga, cilo ka ca ku lombolokele, puãi cu ku lomboloka noke.

⁸ Petulu wa popia laye hati, Lalimue eteke o sukula olomãi viange. Yesu wo kumbulula hati, Nda si ku sukula ku likuatela cimue lame.

⁹ Simono Petulu wa popia laye hati, A Ñala, nda oco, ku ka sukule lika olomãi viange puãi sukula vo ovaka ange lutue.

¹⁰ Yesu wa popia laye hati, U wa yua ka sukila vali oku lisukula te oku sukula lika olomãi viaye, momo o vela ale olumue. Ene wa yeli, puãi havosiko.

¹¹ Momo wa kũlĩha u u pakula, oco a lingila hati, Ka wa yeleli vosi.

¹² Eci a sukula olomãi viavo, kuenje wa wala vali ocikutu caye loku tumala vali, oco wa popia lavo hati, Eci ndo lingili hẽ, co lomboloki?

¹³ Vu nukola hoti, Ulongisi, kuenda Ñala, kuenje vu popia ciwa, momo ame.

¹⁴ Oco nda ame ndi Ñala, haime ndulongisi, nda nda sukula olomãi viene, nda co sesameli oku lisukuilavo olomãi viene pokati.

¹⁵ Momo ndo wihi ongangu okuti vu lingavo ndeci ndo lingi.

¹⁶ Oco mopia lene siti, Ocili, ocili, ukuenje ka velipo okuti ñala yaye o sule; haico katumua ka velipo okuti u wo tuma o sule.

¹⁷ Nda wa kũlĩhi ovina evi, vu sumũlũha nda vu vi linga

¹⁸ Si kasi loku vu vanguila vosi, ava nda nola ndi vai. Puãi ocisonehua ci lingiwe, cina ca linga citi, U wa lia lia ombolo yange eye wa njeluila ocisendemãi.

¹⁹ Tunde opo ndu sapuili eci ci lingiwa osimbu ka ca lingiwile, okuti, eci ci lingiwa, vu kolela okuti ame, ame muele.

²⁰ Mopia lene siti, Ocili, ocili, u o hindikisa umue nda tuma, ame a hindikisa, kuenje u o hindikisa ame, o hindikisa u wa numa.

²¹ Eci Yesu a popia ndoco oco wa tokotelua vutima, kuenje wa imba uvangi hati, Mopia lene siti, Ocili, ocili, umue pokati kene o makula.

²² Olondonge via livanja omunu, omunu. Va tatãla nda helie, nda helie, a tukula.

²³ Umue polondonge viaye, haeye Yesu a sole, wa kunamela ponete ya Yesu.

²⁴ Oco Simono Petulu wo payula, kuenje wa popia laye hati, Tu sapuileko. O kasi loku tukula elie?

²⁵ Ondonge ya kunamela ku Yesu yo pongolokela kuenje yo pula yiti, A Ñala, elie?

²⁶ Yesu wo kumbulula hati, U nyiha okambu aka eci ndi ka miña pelonga, eye. Oco, eci a miña okambu pelonga, wa ka eca ku Yuda, omõla a Simono Isikariote,

²⁷ Eci a tambula okambu Satana wo wila. Oco Yesu wa popia laye hati, Eci o linga, ci linga lombili.

²⁸ Lomue komesa wa kũlĩha eci a popela laye ndomo.

²⁹ Omo Yuda eye o kasi lombango oco vamue va sima okuti Yesu wo sapuila hati, Kuende, ka lande ovina tu sukila kofesta, pamue hati, Avela cimue kolosuke.

³⁰ Eye, eci a tambula okambu, haico a tunda. Ca kala uteke.

³¹ Eci a tunda Yesu wa linga hati, Cilo Mõlomanu o muisua ulamba, kuenje Suku o muisuavo laye ulamba.

³² Nda Suku o muisua ulamba la Mõlomanu, Suku o muisa Mõlomanu ulamba vokuaye muẽle, kuenje ulamba waco u u muisa ndopo.

³³ Amãla vange, cilo otuneke ñala vali lene tuñamiñami. Noke vu sanda, kuenje, ndeci nda popia la va Yudea, haico mopia lene, siti, Oko ngenda ka vu tẽla oku pitilako.

³⁴ Ndu wihi ocihandeleko cokaliye cokuti, Lisoli pokati. Ndeci ame ndo soli, haico ene, lisolivo pokati.

³⁵ Kokulisola kuene pokati oko omanu vosi va limbukila okuti vulondonge viange.

³⁶ Simono Petulu wo pula hati, A Ñala, wenda pi? Yesu wa kumbulula hati, Oko ngenda ku tẽla oku ñuama ndopo, puãi o ñuama noke.

³⁷ Petulu wa popia laye hati, A Ñala, nye si tẽlela oku ku kuama cilo? Hu pesila omuenyo wange.

³⁸ Yesu wa kumbulula hati, O mesila omuenyo wove? Mopia love siti, Ocili, ocili, ekondombolo ka li lili te wa liñala lutatu.