YOANO 12 - Embimbiliya - Bíblia Sagrada em Umbundu

¹ Eci pa kamba oloneke epandu o Pascoa oku fetika oco Yesu weya ko Betánia kuna kua tunga Lasaru, una Yesu a pindula ku vakuavilangu.

² Kuenje vo laleka kokulia. Marta wa vumba omesa, Lasaru puãi wa kala lava va tumala komesa kumue laye.

³ Maria wa nyañula omeyu yokilu yonguendu ya tĩla, kuenje wa waveka olomãi via Yesu, yu wa vi puenya lesinga liaye. Onjo yeyuka elemba lionguendu.

⁴ Puãi Yuda Isikariote, umue polondonge viaye, haeye o laika oku u pakula, wa pula hati,

⁵ Onguendu eyi, nye ka ya landisililue ovita vitatu violosingu ha vi eciwa kolosuke?

⁶ Eci ka ci popelele omo a kuetele olosuke ohenda, puãi omo ocimunu, lomo a kuete ombango, kuenje upopa evi via imbiwamo.

⁷ Yesu wa popia hati, Maria a kale, wa ci lingila ndoketeke liokukendiwa kuange.

⁸ Momo olosuke vu kasi ño-o hũ lavio, ame puãi ko kasi ño-o hũ lame.

⁹ Eci owiñi wa lua wa va Yudea va yeva okuti Yesu oko a kasi, oco veya. Ka veyilile lika Yesu, puãi veyililavo oku tala Lasaru una a pindula ku vakuavilangu.

¹⁰ Oco ovitunda vinene via tumbika ongombo yoku ipavo Lasaru,

¹¹ momo, mekonda liaye, va Yudea va lua va enda loku tava ku Yesu.

¹² Hẽla yaco owiñi wa lua womanu weya kofesta wa yeva okuti Yesu iya ko Yerusalãi.

¹³ Oco va nyañula amela eva, kuenje va tunda oku ka ñualehela laye, yu va vilikiya vati, Hosana! U iyilila onduko ya Ñala a sivayiwe! Haeye Soma ya Isareli.

¹⁴ Yesu wa sanga omõla ocimbulu, kuenje wa endelako, ndeci ca sonehiwa citi,

¹⁵ Ofeka, amõla a Siono, ku ka yokoke. Tala Soma yove, o kasi loku iya, endela komõla ocimbulu.

¹⁶ Tete olondonge viaye ka via limbukile ovina viaco, puãi, eci Yesu a iñila vulamba waye, oco va ivaluka okuti ovina viaco vio sonehelua, kuenda okuti ovina viaco vio lingiwa.

¹⁷ Omanu va kaile laye eci a kovonga Lasaru veyambo loku u pindula ku vakuavilangu, ovo vo wimbila uvangi.

¹⁸ Omo omanu va yeva okuti eye wa linga ocilimbu caco, oco va tundila oku ñualehela laye.

¹⁹ Oco va Fariseo va livangula pokati, vati, Tali okuti ko tẽla cimue. Oluali luosi lu u kuãi.

²⁰ Pokati kava va lamana oku fendela kofesta pa kala va Helasi vamue.

²¹ Oco ovo veya ku Filipu, u Betesaita ko vo Galilea, yu va popia laye vati, A ñala, tu yongola oku mola Yesu.

²² Filipu wa enda, wa ka ci sapuila Andereu, Andereu la Filipu va enda, va ka ci sapuila Yesu.

²³ Kuenje Yesu wa va kumbulula hati, Ekumbi lieya okuti Mõlomanu o muisua ulamba.

²⁴ Mopia lene siti, Ocili, ocili, olumema luotiliku nda ka lu lokila posi ha lu fi, lu kala lika lialuo, puãi nda lu fa oco lu ima olomema via lua.

²⁵ U o sole omuenyo waye u pesela, kuenje u o suvuka omuenyo waye voluali lulo u solekela komuenyo ko pui.

²⁶ Nda umue o mbumba, a ñuame, kuenje oko ñasi haiko u o mbumba a kala. Nda umue o mbumba Isia u sumbila.

²⁷ Cilo, utima wange wa tokotelua. Oco, mopia nye? Mopia hẽ, siti, A Tate, mopele kekumbi lilo? Oco hacoko, momo ekumbi lilo olio ndeyilila.

²⁸ A Tate, muisa onduko yove ulamba. Oco, kilu kua tunda ondaka yiti, Nda yi muisa ale ulamba, kuenje ndi yi muisa vali ulamba.

²⁹ Omanu va kalako oku ci yeva, va popia vati, Ca lemĩla. Vakuavo vati, Ungelo wa popia laye.

³⁰ Yesu wa kumbulula hati, Ondaka eyi hameko ya mopiwila puãi ene yo popiwili.

³¹ Cilo, ekanga lioluali lulo li kasi ale. Cilo ombiali yoluali lulo yi tundisua.

³² Kuenda ame, eci nulikua kilu lieve, ñokela omanu vosi kokuange.

³³ Eci wa ci popela oku lekisa okufa a laika oku fa lakuo.

³⁴ Omanu vo kumbulula vati, Tua yeva kovihandeleko okuti Kristu o tumala ño-o hũ. Ove o popia ndati huti, Ca sesamela Mõlomanu oku tulikiwa? Mõlomanu waco, helie?

³⁵ Yesu wa va kumbulula, hati, Okasimbu kaño ocinyi ci kasi pokati kene. Endi osimbu vu kasi locinyi sanga owelema u vu sanga. U endela vowelema ka kũlĩhile oku a enda.

³⁶ Osimbu vu kasi locinyi koleli ocinyi okuti vu linga omãla vocinyi. Eci Yesu a popia olondaka evi wa tundako, wa va yomboloka.

³⁷ Ndaño wa lingila ovilimbu via lua kovaso avo haimo ka vo kolelele.

³⁸ Ca pita ndoco okuti ondaka yuprofeto Isaya yi lingiwa, yina ya popia, yiti, A Ñala, helie wa kolela eci tua sapula? Okuokuo kua Ñala kua lekisua kulie?

³⁹ Oco ka va tẽlelele oku kolela. Momo Isaya wa popia vali, hati,

⁴⁰ Wa patisa ovaso avo kuenda wa tĩlisa ovitima viavo, sanga va leta lovaso avo, kuenda va limbuka lovitima viavo, sanga va pongoloka si va sakula.

⁴¹ Isaya wa ci popela omo a mola ulamba waye, yu wo ci popela.

⁴² Haimo lumue, va lua, ndaño pokati kakulu, vo kolela, puãi mekonda lia va Fariseo, ka va ci lekisile sanga va tundisua vosunangonga,

⁴³ momo va sola ca lua oku sivayiwa lomanu, oku sivayiwa la Suku ci sule.

⁴⁴ Yesu wa vilikiya hati, U o ñolela hameko a ñolela, o kolela puãi U wa numa.

⁴⁵ Lu o ndete o lete U wa numa.

⁴⁶ Ndeya voluali ndocinyi, okuti wosi o ñolela ka kala vali vowelema.

⁴⁷ Nda umue o yeva olondaka viange, kuenje ka vi lingi, ame siu tetuluila, momo sieyilile oku tetuluila oluali, ndeya oku popela oluali.

⁴⁸ U o liñala, kuenje ka tava kolondaka viange, o kuete onganji. Ondaka nda popia oyo yu tetuluila keteke lia sulako.

⁴⁹ Momo sia popele ño ocipango cange, Isia wa numa eye wa ñundika eci mopia leci mbangula.

⁵⁰ Kuenje ndi ci okuti ocikundi caye oco omuenyo ko pui. Oco, ovina ndi vangula, ndi vi vangula ndeci Isia a popia lame.