YOANO 11 - Embimbiliya - Bíblia Sagrada em Umbundu

¹ Kua kala ulume umue o vela, onduko yaye Lasaru, eye u Betánia imbo lia Maria la huvaye Marta.

² Maria yaco u, eye una wa wavekele Ñala onguendu ya tĩla yu wa puenya olomãi viaye lesinga liaye. Lasaru u wa vela eye mume waye.

³ Oco vamukãi vaye va tuma ku Yesu vati, A Ñala, u o sole o vela.

⁴ Puãi, eci Yesu a ci yeva, wa popia hati, Okuvela oku hakuokufako puãi kulamba wa Suku okuti Mõla a Suku o muilako ulamba.

⁵ Ca kala okuti Yesu wa sola Marta la manjaye kuenda Lasaru.

⁶ Oco, eci a yeva okuti Lasaru o vela, wa amisapo vali oloneke vivali.

⁷ Noke wa popia lolondonge hati, Tu endi vali ko Yudea.

⁸ Olondonge viaye viti, A Rambei, ndopuilo va Yudea va yonguile oku ku sosola lovawe, oco wendako vali?

⁹ Yesu wa kumbulula hati, Ka kuli hẽ, ekui liolowola kolowola vivali viutanya? Omunu, nda endela vutanya, ka lipunduka, momo o lete ocinyi coluali lulo.

¹⁰ Puãi omunu, nda enda luteke, o lipunduka, omo vokuaye ka muli ocinyi.

¹¹ Eci a popia ovina evi, oco a popia lavo hati, Ukuetu Lasaru wa pekela, puãi ngenda ho pasula kotulo.

¹² Oco olondonge via popia laye viti, A Ñala, nda wa pekela o kaya.

¹³ Yesu wa tukula okufa kuaye, ovo puãi va soka okuti wa tukula oku puyukila votulo.

¹⁴ Oco Yesu wa teta onimbu, wa va sapuila hati, Lasaru wa fa,

¹⁵ kuenje mekonda liene, nda sanjuka omo sia kaileko, oco vu kolele. Puãi tu endi kokuaye.

¹⁶ Oco Tomasi, haeye Njamba, wa popia lolondonge vikuavo, hati, Tu endivo, oco tu file kumue laye.

¹⁷ Oco, eci Yesu a pitila, wa sanga okuti Lasaru o kasi ale veleva oloneke vikuãla.

¹⁸ Betánia lia kala ocipepi loko Yerusalãi, ca soka ndolo-kilõmetro vitatu.

¹⁹ Va Yudea va lua veya ku Marta la Maria oku va lembelekela mume wavo.

²⁰ Marta, eci a yeva okuti Yesu o kasi loku iya, oco wa enda, wa ñualehela laye, Maria puãi wa kala ño vonjo.

²¹ Marta wa popia la Yesu hati, A Ñala, nda wa kaile kulo, nda mume wange ka file.

²² Ndaño cilo ndi ci okuti cosi o pinga ku Suku, Suku o ku ciha.

²³ Yesu wa popia laye hati, Mume wove o pinduka.

²⁴ Marta wa popia laye hati, Ndi ci okuti o pinduka epinduko lieteke lia sulako.

²⁵ Yesu wa popia laye hati, Ame ndipinduko haime ndimuenyo. U o ñolela, ndaño o fa, haimo o kala vali lomuenyo.

²⁶ Kuenda wosi o kasi lomuenyo, kuenje o ñolela, ka fi vali. Eci hẽ, o ci kolela?

²⁷ Marta wo kumbulula hati, Oco, a Ñala, nda kolela ale okuti vu Kristu, vu Mõla a Suku, haive una iya voluali.

²⁸ Eci a ci popia, oco wa ka pañinya manjaye Maria kuenje wo loñuila, hati, Ulongisi yulo, wa ku kovonga.

²⁹ Maria, eci a ci yeva, haico a votoka, kuenje wa enda kokuaye.

³⁰ Yesu handi ka iñilile vimbo, puãi wa kala oko Marta a ñualehela laye.

³¹ Va Yudea va kala la Maria vonjo oku u lemba, eci vo mola okuti wa votoka lonjanga, wa tunda, oco vo kuama, omo va soka vati, Enda keleva oku ka lililako.

³² Maria, eci eya oko Yesu a kala kuenje wo mola, oco wa fendela kolomãi viaye, wa linga hati, A Ñala, nda wa kaile kulo, nda mume wange ka file,

³³ Eci Yesu a mola okuti o kasi loku lila, kuenda va Yudea veya laye va lilavo, oco vutima ocikembe co kuata, kuenje wa tokotelua.

³⁴ Yu wa pula hati, Wo langeki pi? Vo kumbulula vati, A Ñala, enju, ndo tale.

³⁵ Yesu wa lila.

³⁶ Oco va Yudea vati, Tali ndeci o sola.

³⁷ Puãi vamue pokati kavo vati, U, wa patulula ovaso omeke, nda ka tẽlelevo oku linga okuti u ka ka fe?

³⁸ Oco Yesu, ocikembe co kuata vali kuenje wa enda keyambo. Eyambo liaco eleva, kuenje lia sitikiwa lewe.

³⁹ Yesu wa linga hati, Upiko ewe liaco. Marta, mukai vu wa fa, wa popia laye hati, Cilo wa futa ale momo ca linga ale oloneke vikuãla.

⁴⁰ Yesu wo kumbulula, hati, Sia ku sapuilile hẽ okuti nda o kolela o mola ulamba wa Suku?

⁴¹ Oco vopako ewe, kuenje Yesu, oku petula ovaso aye, wa linga hati, A Tate, hu pandula omo wa njeva.

⁴² Nda kũlĩha okuti olonjanja viosi o njeva njeva, puãi nda ci popela omanu vongoloka okuti va kolela okuti ove wa numa.

⁴³ Eci a popia ndoco, wa vilikiya londaka ya lua hati, A Lasaru, tundamo.

⁴⁴ U wa file wa tundamo, wa iñiwa onjambo kovoko lo kolomãi, kuenje ocipala caye ca futisua lelesu. Yesu wa popia lavo hati, U kutululi, oco a ende.

⁴⁵ Oco va lua pokati ka va Yudea vana veya ku Maria, haivo va mola eci Yesu a linga, vo kolela.

⁴⁶ Puãi vamue pokati kavo va tunda, va enda ku va Fariseo, kuenje va va sapuila ovina Yesu a linga.

⁴⁷ Oco ovitunda vinene la va Fariseo vongolola onjango yavo, yu va linga vati, Tu linga nye? Momo omunu u o linga ovilimbu via lua.

⁴⁸ Nda tu tava okuti o lingainga ño-o ndeci, omanu vosi va tava kokuaye, noke va Roma veya, va nyõla ocitungilo cetu ci kola, kuenda ofeka yetu.

⁴⁹ Puãi umue pokati kavo, okuti Kayafa, eye ocitunda cinene cunyamo waco, wa popia lavo hati, Ene ka wa kũlĩhili cimue.

⁵⁰ Ka co lombolokeli okuti kokuene hise nda omunu umosi o fila omanu, ofeka yosi oku nyõleha hacoko.

⁵¹ Eci ka ci popele eye muẽle. Puãi, omo eye ocitunda cinene cunyamo waco, oco wa popia ocitumasuku cokuti Yesu o fila ofeka,

⁵² kuenje hafekako lika, puãi o fila okuti o kongela pamuamue omãla va Suku va sandoka.

⁵³ Oco, tunde keteke liaco, vo tumbika ongombo yoku wipa.

⁵⁴ Oco Yesu ka ñuaile ñuaile vali oku limolehisa pokati ka va Yudea, puãi wa tundako, wa enda kofeka yi lisungue lekalasoko, vimbo lia tukuiwa Efarimi, omo a tumala kumue lolondonge viaye.

⁵⁵ Ofesta yo Pascoa ya va Yudea ya kala ocipepi. Va lua va tunda kovaimbo avo oku lamanela ko Yerusalãi oku liyelisa osimbu ofesta yo Pascoa ka ya fetikile handi.

⁵⁶ Oco va kala loku sanda Yesu, kuenje eci va kala vonembele, va lipula pula pokati, vati, Wa soki nye, keya kofesta?

⁵⁷ Ca kala okuti ovitunda vinene kuenda va Fariseo va handeleka ale, vati, Nda umue wa kũlĩha oku a kasi a ci sapule, oco tu u kuate.