YOANO 10 - Embimbiliya - Bíblia Sagrada em Umbundu

¹ Mopia lene siti, Ocili, ocili, u ka piti vuvelo oku iñila vocunda colomeme, puãi o londela kumue kuiñi, eye ocimunu, haeye ocingumba.

² Puãi u o pita vuvelo, eye ungombo wolomeme.

³ Ukuambundi u yuluila epito. Olomeme vi yeva ondaka yaye, yu o kovonga olomeme viaye lolonduko, kuenje o vi tundisa loku vi songuila.

⁴ Eci opamo viosi viaye, o vi pitila kovaso, kuenje olomeme viu kuama, momo via kũlĩha ondaka yaye.

⁵ Umue wiñi ka viu kuama, viu tila, momo ka via kũlĩhile ondaka ya vaiñi.

⁶ Yesu wa va tela olusapo olu, puãi ka va limbukile ndomo a va lu tela.

⁷ Oco Yesu wa popia vali lavo hati, Mopia lene siti, Ocili, ocili, ame nduvelo wolomeme.

⁸ Vosi va netekela ovimunu, haivo ovingumba, puai olomeme ka via va yevele.

⁹ Ame nduvelo, nda umue o pita vuvelo waco okuti vokuange, o popeliwa, iñaila, o tunda tunda, kuenje o sanga ulio.

¹⁰ Ocimunu ka ciya, te ciyilila oku iva loku ipa kuenda oku nyõla. Ame ndeyilila okuti va kuata omuenyo, kuenda okuti omuenyo waco u supoka.

¹¹ Ame ndungombo uwa. Ungombo uwa o pesila olomeme omuenyo waye.

¹² Ukuopange o talavayela ño olombongo, okuti heyeko muẽlealomeme viaco, lolomeme viaco haviayeko, nda o lete ombinji yo yiya, oco o sia olomeme kuenje o tila, kuenje ombinji yi vi kuata loku vi sandola.

¹³ Ukuopange waco o tila omo upange u lingila ño ofeto, ka sokolola olomeme.

¹⁴ Ame ndungombo uwa. Ñulĩha olomeme viange. Olomeme viange vi ñulĩha ame,

¹⁵ ndeci Isia a ñulĩha kuenda ndeci nda kũlĩha Isia. Kuenje mesila olomeme omuenyo.

¹⁶ Ñuete olomeme vikuavo haviocunda eciko. Evi laviovo ca sesamela okuti ndi vi nena, kuenje vi tava kondaka yange. Oco noke ku kala ocunda cimuamue lungombo umuamue.

¹⁷ Oco, omo mesela omuenyo wange okuti ndu sanga vali noke, oco Isia a solele.

¹⁸ Lomue u njupa, puãi ndu pesela ame muele, ñasi lomoko yoku u pesela, ñasivo lomoko yoku u mola vali. Eci, oco ocikundi Tate a ñundika.

¹⁹ Oco va Yudea va lipatãla vali olondaka evi.

²⁰ Kuenje va lua pokati kavo va linga vati, O kuetiwe locilũlu. O vela kutue. Vu yevelila nye?

²¹ Vakuavo vati, Olondaka evi haviukuacilũluko. Ocilũlu nga ci tẽla oku patulula ovaso omeke?

²² Otembo yaco otembo yofesta yonjivaluko yoku tumbika onembele ko Yerusalãi,

²³ haiyo otembo yombambi. Yesu wa kala loku ñuala ñuala vonembele vocindumba ca Salomone.

²⁴ Oco va Yudea veya, vo ñuala ocingonja. Kuenje va popia laye vati, Toke pi o tu sila ño atatahãi? Nda ove vu Kristu, tu ci sapuile.

²⁵ Yesu wa va kumbulula hati, Ndo sapuili ale kuenje lopo ka vu kolela. Ovilinga ndi lingaila vonduko ya Tate ovio vi njimbila uvangi.

²⁶ Ene puãi ka vu kolela momo havulomeme viangeko.

²⁷ Olomeme viange vi yeva ondaka yange. Nda vi kũlĩha, kuenje vi ñuama.

²⁸ Ndi viha omuenyo ko pui kuenje lalimue eteke vi nyõleha. Lomue o vi kotosola peka liange.

²⁹ Tate wa vi nyiha, eye Fu, kuenje lomue o tẽla oku vi kotosola peka lia Isia.

³⁰ Ame la Isia tuamuamue.

³¹ Va Yudea va nyañula vali ovawe oku u sosola.

³² Yesu wa va kumbulula, hati, Ndo lekisi ovilinga via lua viwa via tunda ku Isia, vu sosuila ocilinga ci pi?

³³ Va Yudea vo kumbulula vati, Ka tu ku sosuila ocilinga ciwa, te oku popia etonãi, momo ove vumunu o lilingisa Suku.

³⁴ Yesu wa va kumbulula hati, Ka ca sonehiwile he vovisonehua viene, citi, Nda linga siti, Vulosuku?

³⁵ Nda omanu va yeva ondaka ya Suku va tukuiwa olosuku, kuenje ka ci tava oku nyõla ocisonehua,

³⁶ oco hẽ, vu popia ndati lu Isia a kolisa, loku u tuma voluali, hoti, Ove o popia etonãi, omo nda linga siti, Ndimõla a Suku?

³⁷ Nda si kasi loku linga ovilinga via Tate, ko ka ñoleli.

³⁸ Puãi, nda ovio ñasi loku linga, koleli ovilinga viaco ndaño ka vu ñolela ame. Vi koleli okuti vu kũlĩha kuenda vu limbuka okuti Isia o kasi lame, lame ñasi la Isia.

³⁹ Va seteka vali oku u kuata, puãi wa puluka povaka avo.

⁴⁰ Wa yokila vali kesinya lia Yordão, kuna Yoano a fetikila oku papatisa, kuenje oko a tumala.

⁴¹ Va lua veya kokuaye kuenje vati, Ocili, Yoano ka lingile ovilimbu, puãi ovina viosi Yoano a tukuila omunu u, viocili.

⁴² Haiko omanu va lua vo kolelela.