YEREMIYA 9 - Embimbiliya - Bíblia Sagrada em Umbundu

¹ Utue wange we, nda wa kaile ovava! Ovaso ange we, nda a kaile ono yasuẽlẽla! Nda oco ca kaile, nda nda lilila ño-o olonambi viomõla omanu vange ukãi, lutanya luteke.

² Nda nda kaile losinge yolongende vekalasoko! Nda nda kaile la yimue nda nda sia omanu vange loku litepa lavo. Momo vosi yavo vakahonga, haivo ovisuanji.

³ Yehova hati, Va nãla alimi avo ndoku nãla olohonji. Uhembi wamamako vofeka, ocili hacoko. Momo va amako ño-o tunde kũvi toke kũvi, kuenje ka va ñulĩha.

⁴ Vosi va lunguke, omunu lu a lisungue laye, omunu lu a lisungue laye. Lomue ka ka kolele ukuavo, momo vosi va li punda punda, kuenje va liendisila olombonde.

⁵ Vosi va lilimbaika omunu lukuavo, kuenje lomue o popia ocili. Va ikisa alimi avo oku popia uhembi, va pindamua loku linga evĩho. Utima woku litavela ovo muẽle wa va tunda.

⁶ Kefũki va vokiyako efũki, kelimbi va vokiyako elimbi. Ka va tava oku ñulĩha. Oco ca popia Yehova.

⁷ Oco, ca popia Yehova Ukualohoka, ceci, hati, Tala, ndi va yengulula loku va seteka. Nye vali nẽla oku linga lomanu vange?

⁸ Alimi avo isongo viovule. Vosi va popia popia elimbi. Komela omunu o livangula lukuavo lombembua puãi kutima ka ca puile.

⁹ Ovina evi hẽ si va vi yambuila? Si fetuluinya hẽ omanu va linga ndava? Oco ca popia Yehova.

¹⁰ Lilili olomunda, vi liteteleli. Liyuili ovililo viekalasoko momo via pia, lomue o pitamo. Okulila kuolongombe ka ku yevala. Olonjila viovusenge kuenda ovinyama via tila, via enda.

¹¹ Yerusalãi, yosi ndi yi lingisa olondunda viovawe, evungu liolombulu. Ovaimbo a Yuda ndi a lingisa alunda, Lomue o tungamo vali.

¹² Helie ukualondunge okuti o ci yevite? U wa ci yeva komẽla wa Yehova okuti o ci lombolola elie? Ofeka ya nyolẽhẽla nye? Nye ya pila ndekalasoko okuti lomue o pitamo?

¹³ Yehova hati, Omo ovihandeleko nda eca kokuavo va vi yanduluka, kuenje ka va tavele kondaka yange, yu ka va endele layo,

¹⁴ puãi, oku tava kovitima viavo via tĩla, va kuama va Baale ndeci vaisiavo va va longisa,

¹⁵ oco Yehova Ukualohoka, Suku ya va Isareli, wa popia hati, Tala, omanu ava ndi va lisa ondulu, kuenda ndi va nyuisa ovava ondulu yepanda.

¹⁶ Ndi va sandowaila pokati kolofeka ka va kũlĩhĩle, ndaño vaisiavo ka va vi kũlĩhĩle. Kuenje ñatula ava va va landula losipata toke ndi va mãlapo.

¹⁷ Ca popia Yehova Ukualohoka, ceci, hati, Sokololi, kovongi akãi vakuakulila okuti veya. Pañinyi akãi va loñolõha okuti veya.

¹⁸ Va yayuleko oku tu lila okuti ovaso etu a loka asuelẽla, lovisokopia vietu vi tunda ovava.

¹⁹ Momo ondaka yoku lila ya yevalela ko Siono, yiti, Tua nyolẽha cimue! Osõi ya tu kuta omo tua tundisua vofeka yetu, lomo olonjo vietu via tunguluiwa.

²⁰ Oco ene akãi, yevi ondaka ya Yehova. Ovatuĩ ene a yeve ondaka yomẽla waye. Longisi omãla vene vakãi oku lila. Ukãi wosi a longise ukuavo oku tondongola.

²¹ Momo Kufa wa pita polonjanela vietu, wa iñila volonjo vietu, wa kunduila omãla valuwa kuenda akuenje vovila.

²² Yehova hati, Popia huti, Ovivimbi vi lokila vusenge ndaniña, ndolomupuluila konyima yukuakulombola, kuenje lomue o va pupulula.

²³ Ca popia Yehova, ceci, hati, Ukualondunge ka ka lipande lolondunge viaye. Ocindululu ka ka lipande lundululu waye. Ohuasi ka ka lipande lukuasi waye.

²⁴ Puãi u o lipanda, a lipande leci okuti, wa ndimbuka kuenda wa ñulĩha okuti ame ndi Yehova. Kilu lieve ndingainga ovilinga viocisola lesunguluko kuenda esunga, momo ovina evi ovio sanjukila. Oco ca popia Yehova.

²⁵ Yehova hati, Oloneke viya okuti njambula vakuevamba vosi va kasi luyamba vutima:

²⁶ va Egito kuenda va Yuda, va Edome lomãla va Amone kuenda va Moavi kuenda vosi va tunga vekalasoko va puta puta olonjele asũsũ. Momo olofeka evi viosi olofeka viuyamba, lonjo yosi ya Isareli onjo yuyamba wovutima.