YEREMIYA 8 - Embimbiliya - Bíblia Sagrada em Umbundu

¹ Yehova hati, Koloneke viaco vopa akepa olosoma via Yuda lakepa olombuale lakepa ovitunda kuenda akepa ovaprofeto lakepa olonungi viovo Yerusalãi. Va a upa vayambo avo

² kuenje va a nyalẽha vemẽhi liekumbi lo vemẽhi liosãi kuenda vemẽhi liovisoko viosi viokilu, vina va solele haivio va vumbile loku vi kuama, haivio va sandele kuenje va vi fendailaele. Ka a nolĩwapo, ka a kendiwa, puãi a kala ño kilu ha a lingi ombolela.

³ Ava va supa kepata eli lĩvi kuosi nda va sandowaila, va nõlãpo okufa, omuenyo hawoko. Oco ca popia Yehova Ukualohoka.

⁴ O va sapuila, huti, Ca popia Yehova ceci, hati, Omanu hẽ, nda va kupuka ka va votoka vali? Umue nda o yapuka ka tiuka?

⁵ Oco hẽ, omanu ava va Yerusalãi va konyõhẽla nye olukonyo ka lu pui? Va enda ño-o loku kemba kuenje ka va tava oku tiuka.

⁶ Nda yevelela kuenje nda yeva puãi lomue wa popia ciwa. Lomue wa likekembela olongole viaye loku linga hati, Eci nda linga ndeti nye? Va enda vosi, omunu lonjila yaye, omunu lonjila yaye ndokavalu ka lupukila kocilunga.

⁷ Ndaño ohumbihumbi kilu ya kũlĩha osãi yayo kuenda okacimbamba locikungumiapia kuenda onyañe lepanda, viosi via kũlĩha osaĩ yavio yoku tiuka, puãi omanu vange ka va kũlĩhĩle ondaka ya Yehova.

⁸ Vu tẽla ndati oku popia, hoti, Tuakualondunge kuenda ocihandeleko ca Yehova tu kasi laco? Puãi tala, opena yuhembi ya vakuavisonẽhua ya ci pongoluisa uhembi.

⁹ Vakualondunge va kutisua osõi, va saluka, kuenje va kuatiwa. Ondaka ya Yehova va yi yanduluka, oco hẽ, olondunge vie vi kasi vokati kavo?

¹⁰ Oco ngeca akãi vavo ku vaiñi, ovapia avo kuava va a kuata; momo vosi, tunde kuava vanene toke kuava vatito, vosi va kuãi ocipululu. Tunde kuprofeto toke kocitunda vosi va kemba kemba.

¹¹ Epute liomanu vange va li sakula leselula, vati, Ombembua, ombembua,— osimbu ka ku li ombembua.

¹² Eci va lingainga umbondo hẽ va kutiwa osõi? Ndati, lakamue, ka va kaile losõi; ka va kũlĩhĩle oku nyoñamisa ovitue. Oco va kupukila pokati kava va kupuka. Eci ndi va yambula va kupuka muẽle. Oco ca popia Yehova.

¹³ Yehova hati, Nda nda va yunga puãi ka kuli ayuva kuyuva, pamue akuyu kukuyu. Ndaño amẽla aco owuka. Cosi nda va ĩha ca va pusumũha.

¹⁴ Tu tumãlẽla nye? Tu liongololi, tu iñili volombonge okuti omo tu nyolẽhẽla. Momo Yehova Suku yetu wa panga oku tu nyõla. Wa tu nyuisa ondulu yepanda momo tua lingila Yehova ekandu.

¹⁵ Tua lavokaile ombembua puãi ombembua ka yeyile. Tua lavokaile eteke lioku sakuiwa puãi tala, ohele yoyo.

¹⁶ Oku fembula kuotuvalu tuavo kua yevala tunde ko Dani. Ofeka yosi ya lulumĩla okulila kuotuvalu tuavo tua pama. Veya, va lia ofeka la cosi ci kasimo, va lia ovaimbo lava va tungamo.

¹⁷ Yehova wa popia hati, Tala, numa olonyõha pokati kene, okuti olombuta ka vi pambelua, kuenje viu lumãni.

¹⁸ Upongo wange wa pitahãla oku sakuiwa. Utima u vela vokati kange.

¹⁹ Tala, ondaka yokuliyeya kuomõla omanu vange ukãi ya yevala kolonele viosi viofeka. Yehova hẽ, ka kasi vo Siono? Soma yaye hẽ, ka kasimo? Va nemisila nye loviñumañuma viavo via songiwa loviteka viavo via vakualofeka?

²⁰ Okulombola kua pita, okuenye kua pua, haimo ka tua popeliwile.

²¹ Momo ombole yomõla omanu vange ukãi ya mbalula vutima. Ndi lila lila, ocinjoko ci ñuete.

²² Vo Gileada hẽ ka mũ lĩ ihemba? Ka mũ lĩ he ocimbanda? Nda mũ li, omõla omanu vange ukãi hẽ, nye ka kayelele?