YEREMIYA 7 - Embimbiliya - Bíblia Sagrada em Umbundu

^1-2 Ondaka ya Yehova yeya ku Yeremiya yiti, Talama vombundi yonjo ya Yehova, kuenda kundilamo ondaka eyi, huti, Ene vosi va Yuda wiñailãili volombundi evi ha vu fendela Yehova, yevi ondaka ya Yehova.

³ Ca popia Yehova Ukualohoka, Suku ya Isareli, ceci, hati, Suñamisi olonjila viene kuenda ovilinga viene oco ndu tungisi vocitumãlo cilo.

⁴ Ko ka koleli olondaka viuhembi vioku linga hoti, Yilo oyo onembele Yehova, yilo oyo onembele ya Yehova, yilo oyo onembele ya Yahova.

⁵ Momo, nda vu suñamisa ocili olonjila viene lovilinga viene,— nda vu litetuluila pokati lesunga,—

⁶ nda ka vu talisa ohali ovingendeleyi vi kasi vofeka yene, pamue olosiwe, pamue ovimbumba,— nda ka vu peselisila vocitumãlo cilo osonde yava velipua, kuenda nda ka vu kuama olosuku viñi viu nyõli—

⁷ oco ndu tungisi vocitumãlo cilo, vofeka yilo nda ecele ku vaisiene kosiahũlu ha yi lingi yene toke ka ku ci.

⁸ Tala, vu kolela olondaka viuhembi ka vi silivila.

⁹ Wa soki hẽ oku iva loku ponda loku pekelisa loku lisila uvangi wuhembi kuenda oku timĩhĩla Baale insensu loku kuama olosuku vikuavo ka wa kũlĩhĩli?

¹⁰ Wa simi oku linga ovina viaco viosi osimbu otembo yaco haiyo wiyi, vu talama vonjo yilo yange, haiyo ya tukuiwa londuko yange, kuenje vu popia hoti, Tua yovoka? Vu ci popia puãi haimo wamamiko ño-o oku linga ovombondo a osi?

¹¹ Anga kokuene onjo yilo, haiyo ya tukuiwa londuko yange, ya pongoloka ocilala covingumba? Tala, ame, ame muẽle, nda ci mõla. Oco ca popia Yehova.

¹² Puãi, kaliye, kuendi ko Silo, kuna nda tungisilile tete onduko yange onjo, ka limbuki eci nda lingila omanu vange va Isareli omo eviho liavo lia luile.

¹³ Yehova hati, Kaliye, omo wa lingi ovina evi viosi, lomo ka wa yeveleleli eci nda popia popia lene kuenje ka wa taveli eci ndo kovongi,

¹⁴ oco, ndeci nda linga la Silo, haico ndinga lonjo yilo ya tukuiwa londuko yange eyi wa koleli, kuenda locitumãlo nda ecele kokuene kuenda ku vaisiene.

¹⁵ Ndu tundisi kokuange ndeci nda tundisile vakuẽle vosi okuti ombuto yosi ya Efarimi.

¹⁶ Ove puãi ku ka likutililile omanu ava, ku ka va lilile, ku ka va lombele, ndaño oku va limbondelela, momo siu ku yevi ale.

¹⁷ Ku lete hẽ ndeci va linga vovaimbo a Yuda kuenda volokololo via Yerusalãi?

¹⁸ Omãla va tiaña olõhui, vaisiavo va siakãla ondalu, akãi va kosa omasa ha va yokela Inakulu yovailu akende. Kuenje va pesila olosuku viñi ovilumba vioku nyua ha va ñokela onyeño.

¹⁹ Yehova hati, Ame va ñokela onyeño ale? Ele va likokela ovo muẽle onyeño ha va likutisa osõi?

²⁰ Oco Ñala Yehova hati, Tala, okutema kuange lonyeño yange vi pesiliwa kocitumãlo cilo, komanu kuenda kovinyama, koviti kuenda kepako lioposi. Yi taima, ka yi imiwa.

²¹ Yehova Ukualohoka, haeye Suku ya Isareli, wa popia hati, Vokiyi ovilumba viene via yokiwa kovilumba vikuavo. Li ositu yaco.

²² Momo, eteke ndopa ve Egito olosekulu viene sia popele lavo oku va kisika okuti va lumba ovilumba vioku yoka pamue evi vioku pia elisi.

²³ Puãi nda popia lavo ondaka eyi, siti, Pokoli kondaka yange oco ndinga Suku yene kuenje ene vu linga omanu vange. Endeli vonjila ndu sapuili okuti vu kala ciwa.

²⁴ Puãi ka va pokuile ndaño oku yevelela, va kuama olondunge viavo lumbinde wovitima viavo via vĩha. Va tiukila konyima, ka va endele kovaso.

²⁵ Tunde keteke vaisiene va tunda ke Egito toke ketali, eteke keteke nda va tumaisa akuenje vange vosi, okuti ovaprofeto.

²⁶ Haimo ka va njevele, ka va ñulũilĩle ovatui puãi va ngangavaisa olosingo viavo. Va linga civi, okuti vaisiavo va sule.

²⁷ Oco o popia lavo olondaka evi viosi puãi ka va ku yevi. O va kovonga puãi ka va ku kumbulula.

²⁸ Popia lavo huti, Eyi oyo ofeka ka ya tavele kondaka ya Yehova Suku yavo haiyo ka ya tavele oku longiwa. Ocili ca imũha, vovimẽla viavo ka ci kasimo vali.

²⁹ Lipemũla esenya, esinga liaco linasi. Ka lilile kolomunda vialupele, momo Yehova wa pukula loku yanduluka ocitumbulukila conyeño yaye.

³⁰ Yehova wa popia hati, Omãla va Yuda va ndingila eci cĩvi. Vonjo ya tukuilua onduko yange va kapamo evi viumbondo, va yi vĩhĩsa.

³¹ Va tunga ovotala oko Tofete vekungu liomõla a Hinome, ha va yoki vondalu omãla vavo valume kuenda omãla vavo vakãi. Ame sia ci tumile, ndaño vutima wange ka ca kailemo.

³² Yehova hati, Oco tala, kuiya oloneke okuti ka va yi tukula vali Tofete, pamue Ekungu liomõla a Hinome, puãi va yi tukula Ekunguliepondelo; momo va kenda ovivimbi vo Tofete omo ka kuli vali apa va kendela.

³³ Kuenje ovivimbi viomanu ava vi linga okulia kuolonjila viovilu lovinyama viovusenge. Lomue o vi vinga.

³⁴ Oco ndinga okuti ondaka yesunga kuenda ondaka yonjolela, ondaka yasandombua kuenda ondaka yondombua, vi liweka vovaimbo a Yuda kuenda volokololo via Yerusalãi, momo ofeka yaco yi linga ekalasoko.