YEREMIYA 6 - Embimbiliya - Bíblia Sagrada em Umbundu

¹ A va Benjamini, tili vo Yerusalãi! Sikili olumbeta vo Tekoa. Tulikili ondimbukiso ko Bete-hakereme. Momo ko Norte ku tundilila cĩvi kuenda enyolẽho.

² Omõla a Siono ukãi wa posoka, haeye wa sielena liambiti, ndu nyõla.

³ Ovangombo loviunda viavo vo katukila, vo ñualĩsa olombalaka viavo. Va lisila oviunda viavo, u konepa yaye, u konepa yaye.

⁴ U kongeli ovita. Votoki. Tu u yakisi ekumbi pongunji! Ngongo yetu we, ekumbi lia enda, ovilembo via lepa ale.

⁵ Votoki, tu u yakisi uteke ha tu nyoli olonjo viaye viulamba.

⁶ Momo ca popia Yehova Ukualohoka ceci, hati, Timbuli oviti. Tungili Yerusalãi ocingonja. Eli olio imbo lia sesamela oku yambuiwa, mue yuka lika oviñali.

⁷ Ndeci ono yi tunda tunda ovava haico imbo eli li tunda tunda olohole. Undululu kuenda okunyõla ovio vi yevalelamo. Ndete ño okuvela lapute.

⁸ A Yerusalãi, lunguka, sanga utima wange u ku tunda, kuenje hu nyõla hã hu lingi ekalasoko.

⁹ Ca popia Yehova Ukualohoka ceci, hati, Va nyañulũla ocisupe ca Isareli ndeci va nyañulũla olomupuluila viayuva, pamue ndeci ukuacumbo a nolũla ovianja.

¹⁰ Mopia lelie okuti njimba onumbi kuenje va njeva? Tala, ovatuĩ avo a sita kuenje ka va yevite. Tala, ondaka ya Yehova va yi pembula, ka va yi sanjukila.

¹¹ Oco nde yuka onyeño ya Yehova, nda kava oku yi tutuiya. Ca popia Yehova ceci, hati, Yi itila komãla vokololo, kuenda kovisukungu viakuenje. Ulume lukai waye va kuatiwila kumuamue, lekongo kumue lukulu.

¹² Olonjo viavo vi eciwa komanu vakuavo, lovapia avo kuenda akãi vavo. Momo ngoluĩla vakuafeka yaco eka liange.

¹³ Momo, tunde ku o sule toke ku wa velapo, vosi yavo va liwa locipululu. Tunde kuprofeto toke kocitunda vosi vakuelimbi.

¹⁴ Epute liomanu vange va li sakula leselula, vati, Ombembua, ombembua,— puãi ombembua ka ku li.

¹⁵ Eci va linga umbondo hẽ, va kutiwa osõi? Ndati, ka va kaile losõi, ka va kũlĩhĩle oku nyoñamisa ovitue. Oco va kupukila pokati kava va kupuka. Eci ndi va yambula va kupuka muẽle. Oco ca popia Yehova.

¹⁶ Ca popia Yehova ceci, hati, Talami panyaha, vanji, kuenda puliliyi olonjila viale. Puli hoti, Onjila yiwa yi pi? Oco wendi layo kuenje vu sanga epuyuko liovitima viene. Puãi ovo vati, Ka tu endi layo.

¹⁷ Ndo kapeli olondavululi, siti, Yeveleli ondaka yolumbeta. Puãi ovo vati, Ka tu yevelelako.

¹⁸ Oco alofeka, yeveleli, lene angongela, limbuki eci ndinga lavo.

¹⁹ Angongo, yevelela; tala, omanu ava, ndi va linga cĩvi. Olio epako liovisimĩlo viavo, momo ka va tavele kolondaka viange, kuenda ovihandeleko viange va vi yanduluka.

²⁰ Vu nenẽlela nye insensu vioko Seva pamue kanela ka tunda kofeka yokupãla? Ovilumba viene vioku yoka si vi tava, levi vioku pia elisi si vi sanjukila.

²¹ Oco Yehova wa popia hati, Tala, omanu ava, ndi va kapela ovilondokua. Vaisia kuenda omãla vavo va lipundukila kumuamue. Omunu lu a lisungue laye, kuenda omunu lekamba liaye, vosi va nyõleha.

²² Ca popia Yehova ceci, hati, Amõla a Siono ukãi, tala, omanu va tunda kofeka yoko Norte vo veya. Ofeka yinene yi katuiwa kasulilo oluali.

²³ Va kuata ohonji losipata, haivo olongangala, ohenda ka va kuete. Ondaka yavo yõla ndokalunga. Va endela kotuvalu. Va ku katukila ndulume wa malẽhẽla ocilunga.

²⁴ Tua yeva oluhimo luavo, kuenje ovoko etu a teka teka. Ocinjoko ca tu kuata ndeci olongembia vi kuata ukãi o kasi loku cita.

²⁵ Ku ka ende kovapia. Ku ka pite volonjila. Momo unyãli o kuete osipata peka, kuenda kuosi ku li ohele.

²⁶ Amõla omanu vange ukãi, wala ikẽlẽi. Tiñolõha vetiko. Lila ndu wa fisa omõla ongunga, lila ca lua. Momo unyõli o tu tukulukila ocipikipiki.

²⁷ Nda ku linga useteki, haive vuñulĩhisi pokati komanu vange, okuti o va kulĩhĩsa loku limbuka olonjila viavo.

²⁸ Ovo vosi va piãla oku tamãlala, va enda enda loku lundila. Va soka ndosipi ya tengiwa pamue ndutale. Vosi yavo va vĩha.

²⁹ Iyeveyo vi yevaiya. Osumbu yi pia londalu. Va yevaiya ño omangonya momo vakueviho ka va tundi.

³⁰ Va tukuiwa ovaña opalata omo Yehova wa va inasi.