YEREMIYA 52 - Embimbiliya - Bíblia Sagrada em Umbundu

¹ Sedekiya wa kala lanyamo akui avali lamosi eci a fetika oku viala, kuenje wa viala ko Yerusalãi anyamo ekui la mosi. Onduko ya inaye Hamutali, eye omõla a Yeremiya u Livina.

² Sedekiya wa lingainga ovina vĩvi ku Yehova ndevi viosi via lingainga Yehoyakimi.

³ Oco onyeño ya Yehova ya wengukila Yerusalãi kuenda Yuda toke a va tundisa kokuaye. Kuenje Sedekiya wa vayela Soma ya Bavulono.

⁴ Kunyamo wecea wokuviala kuaye, kosãi yaco yekui, keteke liekũi kosãi, oco Nevukandesa, Soma ya Bavulono, eya lolohoka viaye viosi oku yaka la Yerusalãi. Va li ñuala ocingonja, kuenje va li tungila olombonge viocingonja.

⁵ Oco imbo lia ñualiwa lovita toke kunyamo wekũi lamosi wa Soma Sedekiya.

⁶ Kosãi ya kuãla, keteke liecea kosãi, oco vimbo mua iñila onjala ya lua okuti omanu vakuimbo ka va kaile lokulia.

⁷ Oco va tuiya epangu vocimbaka cimbo. Asualali vosi va tunda vimbo luteke kuenje va tila. Va tundila pombundi yopokati kovimbaka vivali yi kasi ocipepi locumbo ca Soma. Va tunda tupu va Kaldea vava, va ñuala imbo. Asualali va tila, va enda lonjila yenda ka Arava.

⁸ Puãi olohoka via va Kaldea via landula Soma Sedekiya yu vio kuatela ketapi lioko Yeriko. Olohoka via Sedekiya puãi vio sandoka ale.

⁹ Oco va kuata Soma kuenje vo tuala ku Soma ya Bavulono, ko Rivila vofeka ya Hamati, kuenje eye wo tetuluila,

¹⁰ Soma ya Bavulono wa ipaila omãla va Sedekiya kovaso aye, wa ipailavo olombuale viosi via Yuda ko Rivila.

¹¹ Wa tofola ovaso a Sedekiya loku u valela vovikumbi. Kuenje Soma ya Bavulono wa enda laye ko Bavulono, wo kapa vokayike haimo o tatela toke keteke liokufa kuaye.

¹² Kosãi yatãlo, keteke liekũi kosãi, ulima waco ulima wekuĩ lecea wa Nevukandesa, Soma ya Bavulono, oco Nevusaradana, kesongo liavakuakulava haeye ukuakuvumba Soma ya Bavulono, wa iñila vo Yerusalãi.

¹³ Wa yoka londalu onjo ya Yehova lelombe lia Soma kuenda olonjo viosi via Yerusalãi. Wa yoka muẽle olonjo viosi vinene.

¹⁴ Kuenje olohoka viosi via va Kaldea via kala lakesongo liavakuakulava via papulula ovimbaka viosi via ñuala Yerusalãi.

¹⁵ Kuenje Nevusaradana, kesongo liavakuakulava, wa ambata olohuate omanu va siala vimbo lava va lieca ku Soma ya Bavulono, kuenda olomesele via siala.

¹⁶ Puãi Nevusaradana, kesongo lia vakuakulava, wa sia ava va sule vofeka okuti va tata oviumbo viayuva pamue va linga olongunja.

¹⁷ Olongunji viosipi via kala vonjo ya Yehova, lovotala kumue lombasiya yosipi via kala vonjo ya Yehova, va Kaldea va vi sasõla, kuenje va tuala osipi yaco ko Bavulono.

¹⁸ Lolombia loviyo kuenda olomãla kuenda atasu, lalonga insensu lovikuata viosi vikuavo viosipi, evi va lingainga lavio upange wonembele, viosi va vi upamo.

¹⁹ Vambatavo oloneka, kuenda oviyo, latasu, lolombia, kuenda akuatelo olovela, kuenda olonguto, lovilindo. Evi viulu va ambata ulu waco, levi viopalata, va ambata opalata yaco, viosi kesongo lia vakuakulava wa enda lavio.

²⁰ Olongunji vivali kuenda ombasiya yimuamue kuenda ekuĩ lavivali kolonui viosipi via kala vemi liutala waco, vina Soma Salomone a tungisilile onjo ya Yehova. Osipi yovikuata evi viosi ka ca tavele oku yi pesalisa omo via lua enene.

²¹ Kuenda olongunji viaco, usovi wongunji ekũi lecelãla kovikeya kuenda ukolo wolunundulu ekũi lavivali kovikeya wa kala lututu ndelove, kuenda okupama kuaco ovimuĩni vikuãla.

²² Kilu liawo kua kala utue wongunji wosipi; usovi wutue wongunji yimue, ovikeya vitãlo; kuenda utue waco wa posuisiwa lotuvikolo tuosipi tua vindiwa, kuenda epako lia romeira, cosi osipi. Ongunji yavali layovo, okuposuisiwa kuayo haiku.

²³ Kongunji kua kala akũi ecea lepandu kapako oromeira. Apako osi a romeira a litenga lokuvindiwa kuaco a kala ocita.

²⁴ Kuenje kesongo liavakuakulava wambata ocitunda cinene Seriya, kuenda ocitunda cavali Sefaniya kuenda vakuakulava uvelo vatatu.

²⁵ Vimbo wopamo umue wa kaile kesongo liasualali kuenda akulu epanduvali va kala ndoloñuatisi via Soma haivo va sangiwa vimbo. Wopamo usonẽhi wakesongo liolohoka, haeye ukuakukonga vakuafeka kovita, kuenda vakuafeka akũi epandu va sangiwa vimbo,

²⁶ Kuenje Nevusaradana, kesongo liavakuakulava, wa enda lavo, yu wa va tuala ku Soma ya Bavulono ko Rivila.

²⁷ Kuenje Soma ya Bavulono wa va veta, yu wa va ipaila ko Rivila vofeka ya Hamati. Oco va Yuda vopiwa vofeka yavo, kuenje va tualiwa umandekua.

²⁸ Ava Nevukandesa a ambata olohuate vava, kunyamo wepanduvali, wambata olohulukãi vitatu kakuĩ avali ko va Yuda ko va Yuda vatatu.

²⁹ Kunyamo wekũi lecelãla wa Nevukandesa eye wambata olohuate ko Yerusalãi ovita ecẽlãla kakui atatu komanu komanu vavali.

³⁰ Kunyamo wakũi avali latatu wa Nevukandesa, Nevusaradana, kesongo liavakuakulava, wambata olohuate ovita epanduvali kakuĩ akuãla kova Yuda kova Yuda vatãlo. Omanu vaco vosi va linga olohulukãi vikuãla kovita epandu viomanu.

³¹ Kunyamo wakũi atatu lepanduvali wumandekua wa Yehoyakini, Soma ya Yuda, kosãi yekũi lavali, keteke liakũi avali latãlo kosãi, oco Evilimerodake, Soma ya Bavulono, kunyamo watete wokuviala kuaye, wa kutulula Yehoyakini, Soma ya Yuda, kuenje wo wupa vokayike.

³² Wa popia laye lumbombe, kuenje wo tumãlĩsa kocalo cimue ca velapo okuti ovialo violosoma via kala laye vo Bavulono, vi sule.

³³ Oco Yehoyakimi wa lula uwalo waye wovokayike, kuenje oloneke viosi viomuenyo waye wa lialia komesa ya Soma.

³⁴ Kuenje oloneke viosi viomuenyo waye eteke keteke Soma wo wihaiha ongaso a sukila toke keteke a fa.