YEREMIYA 51 - Embimbiliya - Bíblia Sagrada em Umbundu

¹ Ca popia Yehova ceci, hati, Tala, Bavulono lava va tunga vo Kaldea ndi va katuila ofela yi va nyõla.

² Numa ko Bavulono vakuakupekula kuenje vo pekula. Keteke liohali yaye, eci vo tundilila kolonẽle viosi, va sia ofeka yaye upolokoso.

³ Ukuahonji a pongiye ohonji yaye, a wale ocikutu caye cutale. Kakuenje va Bavulono ka ka supiseko ndaño umosi. A nyõle pe olohoka viavo viosi.

⁴ Vofeka ya va Kaldea va kupuka, va fa ongambu. Volokololo viayo mu kupukila ava va tomiwa.

⁵ Isareli la Yuda ka va yandulukiwile la Suku yavo, Yehova Ukualohoka. Ofeka ya va Kaldea puãi ye yuka eko lievi va lingila U o kola wa Isareli.

⁶ Tili vo Bavulono! Omunu omunu a popele omuenyo waye! Ko ka fi kotembo yeyambulo liaye. Momo eyi oyo otembo yefetuluinyo Ha Yehova, haiyo yonima a kasi oku u muisa.

⁷ Peka Ha Yehova Bavulono wa lingile ndokopo yulu ya koluisa oluali luosi. Olofeka via nyua kovinyu viaye kuenje olofeka via linga ayui.

⁸ Bavulono wa kupuka ocipikipiki kuenje wa nyõlẽha. U liteteleli! Wambateli ovihemba violongembia viaye; pamue mbi o sakuiwa.

⁹ Tua sokele oku sakula Bavulono puãi ka sakuiwile. U yanduluki, oco tu endi, omunu vofeka yavo, omunu vofeka yavo; momo episo liaye lia pitila kilu, lia ambatiwa muẽle toke kovailu.

¹⁰ Yehova wa tu nenela eyovo lietu. Enjui, tu ka sapuili vo Siono ovilinga via Yehova, Suku yetu.

¹¹ Kaluli ovisongo! Yeluli oviyepelo! Yehova wa tokotisa ovitima violosoma via va Media, momo ocipango caye ca wengukila Bavulono oku yi nyõla. Momo olio efetuluinyo lia Yehova hailio efetuluinyo lioku fetuluinyila onembele yaye.

¹² Ikili ovimbaka via Bavulono epandela. Sokiyi vakuakutata. Kapi muẽle olondavululi. Pongiyi ava va salama. Momo Yehova wa panga, haeye wa linga eci a popia, loku tukula olonungi via Bavulono.

¹³ Ove wa tunga kolondui via lua, haive ukuasi wa ku siatela, esulilo liove lieya, ukolo womuenyo wove u tepiwa.

¹⁴ Yehova Ukualohoka wa lisila eye muẽle, hati, Hu yukisa alume okuti vu lua ndolohuma. Ya ku imbila evilikiyo lieyulo.

¹⁵ Eye wa sovola osi lunene waye, haeye wa seveta oluali lolondunge viaye, kuenje wa yala ilu luloño waye.

¹⁶ Eci o popia, kilu ku yevala onjuela yetande. O londisa ombundu tunde kasulilo okilu lieve. O sovuila ombela ociliakulo, kuenje upa ofela volosila viaye.

¹⁷ Omunu wosi wa linga eveke, ka kuete olondunge. Wosi ukuakutela ulu o kutisiwila osõi oviteka a tunga. Momo oviteka viaye viuhembi, vokati kavio ka mũ lĩ omuenyo.

¹⁸ Ka vi silivila, viosi viesanda, keteke lieyambulo liavo vi takata.

¹⁹ U wa linga ndonepa ya Yakoba ka lisokele lavio, momo eye Usovoli wovina viosi, kuenje Isareli eye epata liocipiñalo caye. Onduko yaye Yehova Ukualohoka.

²⁰ Ove vumalatelo yange, haive wucimãlẽho covita. Nyanyõla love olofeka. Nyanyõla love ovosoma.

²¹ Nyanyõla love okavalu lu endelako. Nyanyõla love ekãlu liovita lu endelamo.

²² Nyanyõla love ulume lukãi. Nyanyõla love ekongo kuenda umãlẽhe. Nyanyõla love ukuenje lufeko.

²³ Nyanyõla love ungombo kuenda ocunda caye. Nyanyõla love ongunja kuenda olongombe viaye viokokanga. Nyanyõla love olombuale kuenda vakesongo.

²⁴ Bavulono kuenda olonungi via Kaldea ndi va fetuluinyila ovina viosi vĩvi va lingila Siono kovaso ove. Oco ca popia Yehova.

²⁵ Amunda yi nyõla nyõla, haive o nyõla oluali luosi, tala, nda ku wengukila. Oco ca popia Yehova. Hu õluĩla eka liange, kuenje hu kunyuila kovawe, hu lingisa omunda ya pia.

²⁶ Kokuove ka kupiwa ewe limue li linga ewe lievindi, ndaño ewe liociseveto. Puãi o linga ekalasoko liaño oloneke ka vi pui. Oco ca popia Yehova.

²⁷ Iki epandela vofeka, sikili olumbeta pokati kolofeka. Pongiyi olofeka oku yaka laye. U kongeli ovosoma a Ararate, la Mimi, kuenda Asikenasi. U katuili kesongo. U nenẽli otuvalu ndovimbonde violohuma.

²⁸ Pongiyi olofeka oku yaka laye, okuti olosoma via va Mede, kuenda olombiali viaco la vakesongo vaco kuenda ofeka yosi yuviali wavio.

²⁹ Ongongo yi luluma kuenda yi litetela, momo ocipango ca Yehova, eci a pangela Bavulono, ci tai, okuti o lingisa Bavulono ekalasoko ka li kuete onungi.

³⁰ Asualali va Bavulono va ci tuva oku yaka, va kala kala ño volombonge viavo. Ongusu yavo ya pua, va linga ndakãi. Olonjo viayo via timĩhĩwa, lovisingo viokolombundi viayo via teka.

³¹ Katumua o tokeka lakatumua kakuavo, kuenda omunga yi tokeka lomunga yikuavo, ha va sapuila Soma ya Bavulono okuti imbo liaye lia kuatiwa kolonẽle viosi.

³² Olonjiva via kuatiwa, lovimbaka via pia londalu, kuenda asualali va tila olupesi.

³³ Momo, ca popia Yehova Ukualohoka, Suku ya Isareli, ceci, hati, Omõla a Bavulono ukãi wa soka ndocimbandi ca kanduiwa ale. Okasimbu kaño kuenje uvo woku lombola u wiyilila.

³⁴ Nevukandesa, Soma ya Bavulono, wa ndia, kuenje wa ñeleketa. Wa ndingisa ocikuata cupolokoso, wa nyina ndekisikisi. We yukisa efe liaye evi viange vi pepa, yu wa nyinasi kofeka.

³⁵ Onungi ya Siono yi linge yiti, Ekangiso va ñangisa lalio, ame la vangandiange, liye ku Bavulono. Yerusalãi a linge hati, Osonde yange yi kale kolonungi via Kaldea.

³⁶ Oco, ca popia Yehova ceci, hati, Tala, hu sombela ondaka yove, kuenje, omo a ku linga cĩvi, ndu yambula. Ñukutisa okalunga kaye loku takatisa ono yaye.

³⁷ Bavulono o yuka ovilundundu, olombulu ovio vi tungamo. Oluhimo luaye lũvi lu yokokisa vosi. O yoliwaño epembe kuenje ka kala lolonungi.

³⁸ Va komẽla kumuamue ndolohosi, võla ndayove olohosi.

³⁹ Eci va tokotelua, oco ndi va yalela ofesta. Ndi va koluisa toke va leñoha, kuenje va pekela otulo ka tu pui okuti ka va pasukapo vali. Oco ca popia Yehova.

⁴⁰ Ndi va songuila kocipondelo ndomãla volomeme, pamue ndovitupi violomeme lovitupi violohombo.

⁴¹ Bavulono wa kuatiwa! U wa sivayawaile loluali luosi cilo wa kuatiwa! Oluhimo lua Bavulono lua yokokisa olofeka viosi.

⁴² Okalunga keya ko Bavulono, kuenje wa vombisua loku katoka kuakimba ako.

⁴³ Ovaimbo aye a linga alunda, a linga ofeka ya kukuta kuenda ekango, haiyo ofeka omu ka mu tungi omunu, haimo ka mu piti omõla omunu.

⁴⁴ Kuenje njambuila Bele vo Bavulono. Njupa vomẽla waye eci a ina. Olofeka ka viya vali ndolui kokuaye. Ocimbaka ca Bavulono ca kupuka ocili.

⁴⁵ Amanu vange, tundimo! Omunu omunu a popele omuenyo waye konyeño ya tokota ya Yehova!

⁴⁶ Ovitima viene ka yi ka ambuke. Ko ka kuateli ohele olombonde vi yevalela vofeka. Ko ka kuati ohele nda elimeli ku yevala olombonde vimue kuenje enyamuali ku yevala vikuavo. Ovitima ka vi kambuke nda vofeka muli ekangiso pamue nda olombiali vi likatukila.

⁴⁷ Oco tala, kuiya oloneke okuti njambula oviñumañuma via Bavulono. Ofeka yaye yosi yi kutisiwa osõi, kuenje ava vaye va ipaiwa va kupukila vokati kaye.

⁴⁸ Oco ilu kuenda ongongo kuenda vosi va kasimo va imba ovisungo vionjolela omo Bavulono wa nyõlẽha. Momo vakuakunyõla va tunda ko Norte vo katukila. Oco ca popia Yehova.

⁴⁹ Bavulono o kupukila olongambu via Isareli ndeci olongambu vio kilu lieve liosi via kupukila Bavulono.

⁵⁰ Ene wa puluki kosipata, kuendi, ko ka talami! Ivaluki Yehova ndaño vu kasi kupãla, kuenda sokololi Yerusalãi.

⁵¹ Lingi hoti, Tua kutiwa osõi, momo tua mõla esepu. Osõi ya tuvika ovipala vietu, momo vakualofeka va iñila vovitumãlo vi kola vionjo ya Yehova.

⁵² Oco, tala, kuiya oloneke okuti njambula oviñumañuma viaye, kuenje vofeka yaye yosi, ava va asiwa va leña leña. Oco ca popia Yehova.

⁵³ Ndaño Bavulono o londa kilu, kuenje o tunga ombonge yaye kilu, haimo vakuakunyõla va tunda kokuange vo sanga. Oco ca popia Yehova.

⁵⁴ Yeveleli! Okuliyula ku kasi loku tunda ko Bavulono. Onjuvungo vokunyolẽha kua lua yi kasi loku tunda kofeka ya va Kaldea.

⁵⁵ Momo Yehova o lingisa Bavulono elunda, kuenje uhisa ondaka yaye yinene. Onjuvungo yovanyali vaye yi õla ndakimba ovava a lua. Onjuvungo yondaka yaye ya yevala,

⁵⁶ momo ukuakunyõla wo katukila, wa katukila muẽle Bavulono. Asualali vaye va kuatiwa, lolohonji viaye vi teka teka. Momo Yehova Suku yefetuluinyo, ka pumbi muẽle oku fetuluinya.

⁵⁷ Ñoluisa olombuale viaye lolonoño viaye, kuenda olombiali viaye la vakesongo vaye lasualali vaye. Va pekela otulo ka tu pui okuti ka va pasuka vali. Oco ca popia Soma, onduko yaye Yehova Ukualohoka.

⁵⁸ Ca popia Yehova Ukualohoka ceci, hati, Ocimbaka ca tanda ca Bavulono ci kupukila posi, lolombundi viayo visõvi vi yokiwa londalu. Vakualofeka va talavaya ño olivova, lolofeka vi likavisila ño upange wondalu.

⁵⁹ Eyi oyo ondaka uprofeto Yeremiya a sapuila Seraya, omõla a Neriya, omõla a Makeseya, eci a enda ko Bavulono kumue la Sedekiya, Soma ya Yuda, kunyamo wakuãla wokuviala kuaye. Eye Seraya eye Muẽlẽkalia.

⁶⁰ Yeremiya wa sonẽha velivulu ovina viosi vĩvi vi laika oku iya ko Bavulono, wa sonẽha cosi ca tukuiwila Bavulono.

⁶¹ Kuenje Yeremiya wa popia la Seraya hati, Eci o pitila ko Bavulono o tanga olondaka evi viosi,

⁶² kuenje o popia huti, A Yehova, ove wa tukuila ocitumãlo cilo, huti, Ndi ci nyõla okuti lomue o tungamo vali, ndaño omunu ndaño ocinyama, kuenje ci linga ño hũ elunda.

⁶³ Eci o mala oku tanga elivulu eli, kutilako ewe, kuenje li imba vo Ferati.

⁶⁴ Popia huti, Haico Bavulono a vomba kuenje ka tumbuluka vali, omo ndu nenẽla eyambulo. Toke palo evi ovio olondaka via Yeremiya.