YEREMIYA 5 - Embimbiliya - Bíblia Sagrada em Umbundu

¹ Ñuali, ñuali volokololo via Yerusalãi. Vanji. Kũlĩhĩsi. Vanjiliyi povila viaco nda vu sangapo omunu o linga esunga haeye o yongola ocili. Nda vu sanga umue imbo liaco ndi li ecela.

² Ndaño va popia vati, Ndomo Yehova a kasi lomuenyo, haimo va lisila luhembi.

³ A Yehova, ovaso ove hẽ ka a vanjiliya eci cocili? Wa va yambula haimo ka ca va valele. Wa va nyõla puãi ka ca va lungisile. Va tĩlĩsa ovipala viavo okuti ovawe a sule, ka va tavele oku litiulamo.

⁴ Oco nda linga siti, Ocili, ava omanu vaño, vakuaputui, ka va kũlĩhĩle onjila ya Yehova ndaño ovihandeleko via Suku yavo.

⁵ Ngenda komanu va velapo, mopia lavo, momo ovo va kũlĩha onjila ya Yehova lovihandeleko via Suku yavo. Puãi vosi va lisoka, va teya okanga kuenda ovikolo viaco va vi tepa.

⁶ Oco ohosi yovusenge yi va ipa, kuenda ombinji yovekalasoko yi va nyõla. Ongue yi lavekela ovaimbo avo. Wosi o tundamo o nyanyõwaiwa, momo va lueya lueya kuenda olukonyo luavo lua lova.

⁷ Hu ecela ndati? Omãla vove va njanduluka, va lisila levi halosukuko. Eci nda va lisa elau va linga ño ukahonga, va liongolowaila volonjo viovipuepue.

⁸ Va linga ndotuvalu tua neta, tua eciwa vosi. Omunu omunu o komẽla ukãi wamãle.

⁹ Si va yambuila nga ovina evi? Si fetuluinya hẽ ofeka ya soka ndeyi? Oco ca popia Yehova.

¹⁰ Piti voviumbo viaye viayuva, vi nyõli, puãi ko ka nyõli cosi. Teyi ovianja viaye momo havia Yehovako.

¹¹ Epata lia Yuda leli lia Isareli a ñonyohela ca lua. Oco ca popia Yehova.

¹² Va pengisa luhembi ondaka ya Yehova, vati, Ka lingi cimue. Cĩvi ka ciya kokuetu. Ka tu mõli onjala ndaño osipata.

¹³ Ovaprofeto va lingaño ndofela, vokati kavo londaka ka mũli. Haico ci lingiwa lavo.

¹⁴ Oco, Yehova, Suku yolohoka, wa popia hati, Omo wa popi ondaka eyi, oco olondaka viange ndi vi lingisa ondalu vomẽla yene, lomanu vaco va linga olohũi, kuenje ondalu yi va lia.

¹⁵ Apata lia Isareli, tala! Ndu katuili ofeka yokupãla. Oco ca popia Yehova. Ofeka yaco ya pama, haiyo yosiahũlu. Elimi liayo ka wa li kũlĩhĩli, leci va popia ko ci limbuka

¹⁶ Ohombe yavo yovisongo ya soka ndeyambo liupulule. Vosi yavo omanu va pama.

¹⁷ Va lia elombolo liene kuenda okulia kuene. Va lia okulia kuomãla vene valume lava vakãi. Va lia olomeme lolohombo viene kuenda olongombe viene. Va liavo ayuva ene lakuyu ene. Olombonge viene wa koleli va vi nyõla losipata.

¹⁸ Puli Yehova hati, Ndaño koloneke viaco siu malipo pe.

¹⁹ Eci omanu vene va popia vati, Ovina evi nye Yehova Suku yetu a tu vi lingila?— oco o popia lavo huti, Ndeci wa njanduluki loku vumbila vofeka yene olosuku violofeka viñi viñi, haico vu vumbila vakualofeka vofeka hayeneko.

²⁰ Eci, ci sapuli vonjo ya Yakoba, ci yevalisi vo Yuda, hoti,

²¹ Amanu va wulua, haene ko kuete olondunge, yevi eci mopia. Vu kuete ovaso puãi ko lete; vu kuete ovatuĩ puãi ko yevite.

²² Yehova hati, Ko ñuetele usumba? Ko ndulumĩla? Ame nda kapa eseke okuti li linga ongave yokalunga, kuenje li linga vo ocuviko colotembo viosi okuti okalunga ka ka pitahãla. Akimba aco ndaño a litasola haimo ka a ci tẽla, ndaño õla haimo ka a pitãhãla.

²³ Puãi omanu ava va kuete ovitima viesinõ luyaki, va pambuka kuenje va enda.

²⁴ Ka va likundi vovitima viavo vati, Tu sumbili Yehova Suku yetu, u o tu ihãiha ombela kovovo aco, eyi yohalula leyi yakupupu, haeye o tu ihãiha elombolo koloneke viaco.

²⁵ Olohole viene vio pumbisi ovina evi. Akandu ene o limĩlisi ovina viwa.

²⁶ Momo pokati komanu vange pa li vakuevĩho. Va lavakaila ndanyanga va lavakaila olonjila. Va ta ulivi, va kuata omanu.

²⁷ Olonjo viavo vie yuka elimbi ndeci ocamba ci yuka olonjila, oco va linga vanene, va lingavo olohuasi.

²⁸ Va lẽla, kuenda va nina Va piãla kovilinga vievĩho. Ka va yevi ondaka yolosiwe okuti vi kala ciwa. Ka va tetuluila lesunga olosuke.

²⁹ Si va yambuila he ovina evi? Si fetuluinya hẽ ofeka ya soka ndeyi? Oco ca popia Yehova.

³⁰ Evĩho limue lia kãla lia pita vofeka, lieli:

³¹ Ovaprofeto va imbaimba owanji wuhembi, kuenda ovitunda vi vialela kowanji wavo. Kuenje omanu vange oco va sole. Oco hẽ, kesulilo vu linga ndati?