YEREMIYA 48 - Embimbiliya - Bíblia Sagrada em Umbundu

¹ Owanji waimbiwila Moavi. Ca popia Yehova Ukualohoka, Suku ya Isareli, ceci, hati, Nevo lia nyõlẽha, ngongo yalio! Kiriyatayi lia kutisua osõi, kuenje lia kuatiwa. Ombonge ya kutisua osõi kuenje ya teyiwa.

² Oluhimo lua Moavi ka lu yevala vali. Vo Hesivone vo tumbika ongombo, vati, Enjui, tu ko nyõli okuti ka lingi vali ofeka. Lenevo, ayui, vu munihiwa; osipata yu landuli.

³ Yeveleli! Uteto wa tunda ko Horonayimi, uti, Ocilunga we! Okunyolẽha kuna ka ku popiwa!

⁴ Moavi ya nyõlẽha; Uteto wayo wa yevala toke ko Coara.

⁵ Momo a londa kowulu wa Luhiti loku lila, kuenje kociloka ca Horonayimi va yeva evilikiyo li sapula oku nyõliwa.

⁶ Tili! Popeli ovimuenyo viene! Lingi ndongolo yovekalasoko!

⁷ Momo, omo wa kolela olombonge viove lovipako viove, oco o kuatiwavo. Kemosi enda umandekua kumosi lovitunda viaye lolombuale viaye.

⁸ Unyãli iya kovaimbo osi, lalimue imbo li puluka. Omaka layovo yi nyõleha kuenda etapi li nyolĩwa, ndeci Yehova a popia.

⁹ Ĩha Moavi avava mono wa livela oku palãla ha tila. Ovaimbo aye a linga alunda, lomue o tungamo vali.

¹⁰ U o linga upange wa Yehova lusambinja o siñaliwa; lu o pumbisa osipata yaye osonde o siñalĩwavo.

¹¹ Moavi wa liuwulapo tunde kutila waye, kuenje wa likenja. Ka itailiwile vocikuata, ndaño kumandekua kaileko. Oco, okusava kuaye wa kala ño-o lakuo, kuenda elemba liaye ka lia pongolokele.

¹² Oco Yehova wa popia hati, Tala, ku iya oloneke viokuti numa kokuaye vakuakupesela kuenje vo pesela. Va sia ovikuata viaye upolokoso kuenje olombia viaye va vipa.

¹³ Oco Moavi o kuatela Kemosi osõi ndeci Isareli a kuatela osõi Betele yina va yi kolelele.

¹⁴ Vu popia ndati hoti, Tulonõi, haetu tua pama kovita?

¹⁵ Unyõli weya oku nyõla Moavi lovaimbo aye. Moavi wa pundiwa. Akuenje vaye va velapo va enda koku pondiwa. Oco ca popia Soma, onduko yaye Yehova Ukualohoka.

¹⁶ Ohali ya Moavi yi kasi ocipepi, lefulilo lio sokiyiwila liya lonjanga.

¹⁷ Ene vosi vu lisungue laye, lene vosi wa kũlĩhi onduko yaye, u lili. Lingi hoti, Epangati lia kaile lunene lia teka teka, lombueti ya kaile lulamba ya nyõlẽha.

¹⁸ Anungi ya Divone, loka kulamba wove, tumãla posi ya kukuta! Momo unyõli wa Moavi wa ku iyilila, kuenje wa nyõla ale olombonge viove.

¹⁹ Anungi ya Aroere, talama konjila kuenje lavulula. Wosi o mõla, ci kale ulume o tila, ci kale ukãi o puluka, u pula huti, Nye ca pita?

²⁰ Moavi wa kutisua osõi momo wa teka teka. Liyuli! Liteteli! Ci sapuli ka Amone hoti, Moavi wa pundiwa.

²¹ Episo lieya ketapi, ko Holono, ko Yahica, kuenda ko Mefata,

²² ko Divane, kuenda ko Nevo kuenda ko Bete-divilataimi,

²³ ko Kiriyataimi, kuenda ko Bete-gamuli, kuenda Bete-meone,

²⁴ ko Keriote, kuenda ko Bocira, kovaimbo osi ofeka ya Moavi, ñdaño ocipepi ndaño ocipãla.

²⁵ Ombinga ya Moavi ya tetiwako, kuenda okuokuo kuaye kua teka. Oco ca popia Yehova.

²⁶ Omo Moavi a lipandela Yehova oco u koluisi okuti o tiñolõha vosanjo yaye kuenje o yoliwa epembe.

²⁷ Isareli hẽ, kuo yolele epembe? Wa sangiwile hẽ pokati kovimunu okuti olonjanja viosi, poku u tukula, ove o lipuka kutue?

²⁸ Alonungi via Moavi, tundi vovaimbo, ka tungi valeva ovovawe. Lingi ndonjila yi yalaila ocanju cayo komẽla weleva.

²⁹ Tua yeva okuti Moavi o lisole haeye o lituna enene. Tua yevavo okuti o likapako calua kuenda o kuete epela lialua. Okulipanda kuaye lakuovo tua ku yeva, ndaño okulenda kutima waye.

³⁰ Yehova wa popia hati, Nda kũlĩha etombo liaye. Okulipanda kuaye kua linga ño kuesanda. Ovilinga viaye ka vi silivila.

³¹ Oco ndi lilila Moavi, ndi liyuila Moavi yosi. Ndi litetelela alume va Kiri-herese.

³² Oyuva wa Sivima, hu lila ca lua, okuti ndeci ndila Yasere ci sule. Ovianja viove via yandela kesinya liokalunga, via pitila toke kokalunga ka Yasere. Kaliye ukuakunyõla wa punda epako liove liovondombo kuenda ayuva ove.

³³ Esanju lonjolela viupiwa vofeka yovaima ya Moavi. Nda imũla ovinyu vovikoselo viavio. Lomue o koselamo loku imba ovisungo, onjuela yaco hayesanjuko.

³⁴ Hesevone la Eleale va litetela. Uteto wavo u yevala toke ko Yahaca, tunde ko Coara toke ko Horonayimi kuenda Englatisielisiya. Momo ndaño otundui tua Nimirimi tua takata.

³⁵ Ca popia Yehova ceci, hati, Nakisa vo Moavi u o lumbila ovilumba vocitumãlo ci kola loku timĩhila olosuku viaye insensu.

³⁶ Oco utima wange u lila Moavi ndokusika kuolumbendo; oco utima wange u lila alume va Kiri-heresi ndokusika kuolumbendo; oco ovipako viosi va limuisa via peseka.

³⁷ Momo utue wosi wa pemuiwa esenya lolonjele viosi via tetiwa. Kovaka osi ku li olongase kuenda kolombunda viosi ovikelẽi.

³⁸ Kovailu olonjo viosi via Moavi kuenda vovila viaco viosi muli lika okulitetela. Momo nda ipa Moavi ndeci va ipa ombia omunu ka sole. Oco ca popia Yehova.

³⁹ Wa nyanyoha pe! Okulitetela kuavo kua kãla. Omo osõi yaye ka yi popiwa Moavi wa ñualapo, wa imba onyima komanu. Oco Moavi wa yoliwa epembe la vosi vo ñuala, kuenje oluhimo luaye luvi lu va yokokisa.

⁴⁰ Momo, ca popia Yehova ceci, hati, Tala, kuiya umue o pãlãla ndongonga yulombo, kuenje o tandavasaila avava aye ko Moavi.

⁴¹ Ovaimbo ayo a tambuiwa, lombonge yayo yi kuatiwa. Keteke liaco ovitima viasualali va Moavi vi linga ndutima wukãi o kasi lolongembia vioku cita.

⁴² Moavi o nyõlẽha okuti ka lingi vali ofeka, momo wa lipandela Yehova.

⁴³ Anungi ya Moavi, evi vi ku taiyilili vievi: ocinjoko lokueve kuenda onjanjo. Oco ca popia Yehova.

⁴⁴ U o tila ocinjoko o fa vokueve, lu o tunda vokueve o fa vonjanjo. Momo nenẽla Moavi ovina evi vunyamo weyambulo liavo. Oco ca popia Yehova.

⁴⁵ Ava va tila va talama vulembo wa Hesivone, omo va fa ipepe. Momo ondalu ya tunda vo Hesivone, lulienge wa tunda velombe lia Sihone. Ya lia upolo wa Moavi, kuenje ya nyõla unene wa Soma ya vakuanjaya.

⁴⁶ A Moavi! Ngongo yove! Ava va fendela Kemosi va taka. Momo omãla vove valume va linga olohuate viovita, lomãla vove vakãi va enda umandekua.

⁴⁷ Haimo koloneke viesulilo numbulula esumũlũho lia Moavi. Oco ca popia Yehova. Eli olio esulilo liepiso Moavi a pisiwa lalio.