YEREMIYA 47 - Embimbiliya - Bíblia Sagrada em Umbundu

¹ Ondaka ya Yehova yeya ku Yeremiya, kuenje ya imbila va Filisiti owanji osimbu Fareo ka kuatele handi Gasa.

² Ca popia Yehova ceci, hati, Tala! Ovava a tunda ko Norte, kuenje a linga olui lu supoka; a supokaila kofeka yosi kuenda vosi va kasimo; a supokaila imbo lava va tungamo. Alume vaco va liyula, kuenda olonungi viosi viofeka vi lila.

³ Eci ocileñi cakonjo otuvalu tuaye ci yevala, pamue ondukuso yakãlu ovita, pamue oku õla kualola a-o, oco vaisia ka va pukukila omãla vavo omo ovaka avo a hongua enene.

⁴ Momo kuiya eteke lioku nyõla va Filisiti vosi, loku takisa oñuatisi yosi ya siala vo Turo la Sidono. Momo Yehova o nyõla va Filisiti ava va supa kuenda va kasi vocifuka ca Kurete.

⁵ Evangu lieya ko Gasa. Asikelone lia nyõlẽha. Acisupe ca va Anaka, otembo yipi o liweka oku litandatanda?

⁶ Asipata ya Yehova, otembo yi pi o puyuka? Lisomẽha vocilalo cove. Puyuka! Kala lombembua!

⁷ Puãi yi puyuka ndati osimbu Yehova a yiha ocikundi? Wa yiha ocikundi coku nyõla Asakelone kuenda ofeka yokohulo yokalunga.