YEREMIYA 46 - Embimbiliya - Bíblia Sagrada em Umbundu

¹ Ondaka ya Yehova yoku imbila olofeka owanji weya kuprofeto Yeremiya.

² Owanji ulo wa imbiwila Egito. Ondaka ya popiwila olohoka via Fareo Neko, Soma ye Egito, eci via kala kolui Ferati, vo Karekemisi. Nevukandesa, Soma ya Bavulono, wa yula olohoka viaco kunyamo wakuãla wa Yehoyakimi, omõla a Yosiya, Soma ya Yuda. Ondaka yaco yeyi:

³ Malẽhi oviyepelo kuenda olotevele. Amẽli kocilunga!

⁴ A vakuakuendela kotuvalu, walisi otuvalu, londiko! Wali olongalãu, lialeki. Lepiki ovonga ene. Wali ovimãlẽho viene.

⁵ Nda ci muila nye? Va yokoka, kuenje va tiukila konyima. Asualali vavo va yuliwa, kuenje va tila lolupesi, ka va vanji konyima. Kolonele viosi kuli ocinjoko. Oco ca popia Yehova.

⁶ Vakualupesi ka va tẽla oku tila, ndaño asualali ka va puluka. Ko Norte, kolui Ferati, oko va lipundukila kuenje va kupuka.

⁷ Helie u wa votoka ndovava a Nilu, pamue ndolondui ovava avio a fela?

⁸ wa votoka ndovava a Nilu, pamue ndolondui ovava avio a fela, eye Egito. Eye wa linga hati, Mbotoka, kuenje nuvika ilu lieve. Nyõla ovaimbo lolonungi viaco.

⁹ Ene, atuvalu, wili vonjila, lene, akãlu ovita, feluki. Asualali va tunde. Va Kusi kuenda va Putu, va enda enda loviyepelo, va tunde, kuenda va Ludi, va loñoloha lolohonji, lavovo va tunde.

¹⁰ Momo eteke liaco olio eteke lia Ñala Yehova Ukualohoka, hailio eteke liefetuluinyo okuti o fetuluinya ovanyali vaye. Osipata yi lia kuenda yi kuta, kuenje yi nyua, yi kuta osonde yavo. Momo Nala Yehova Ukualohoka o lumba ovilumba vofeka yoko Norte, kolui Ferati.

¹¹ Amõla Egito ufeko, ku ende ko Gileada, kope onguendu! Wa seteka ovihemba vialua puãi ca linga ño olivova. Ove ku kayi.

¹² Olofeka via yeva osõi yove, loluali lue yuka uteto wove. Momo esualali lia likonjoka lesualali likuavo, kuenje kavali kavo va kupukila kumosi.

¹³ Yehova wa popia luprofeto Yeremiya oku imba owanji wokuiya kua Nevukandesa, Soma ya Bavulono, oku yaka lofeka ye Egito,

¹⁴ hati, Ci popia ve Egito, ci sapula vo Mikidole; ci sapuilavo vo Memifise kuenda vo Tafanesi. Popia huti, Votoki, kuenje liangiliyi, momo osipata yi lia ava vo ñuali.

¹⁵ Osuku yene Apisi ya tilila nye? Onui yene nye ka ya talamẽlẽle? Momo Yehova wa yi lundula.

¹⁶ Owiñi wene wa likonjoka kuenje wa kupuka; oco va livangula pokati, vati, Votoki, tu tiukili ku vakuetu, kuenda kofeka oko tua citilua, omo osipata yunyali yi kasi loku tu kangisa enene.

¹⁷ Luka Fareo, Soma ye Egito, huti, Kuvavoka, momo o pañela ño, kuenje evelo liaco liu pita.

¹⁸ Soma, onduko yaye Yehova Ukualohoka, wa popia hati, Ndeci ñasi lomuenyo, umue iya. O moleha ndeci Tavore yi molẽha pokati kolomunda, pamue ndeci Karemeli kohulo yokalunga.

¹⁹ Ene, alonungi vie Egito, liangiliyi oku enda umandekua. Momo Memifise li linga elunda, linyõlẽha kuenje lomue o tungamo vali.

²⁰ Egito ya linga ndonema ya posoka; puãi esipangombe lioko Norte lieya kokuayo.

²¹ Ndaño asualali vayo va fetaiwa va soka ndolonale via netisua, omo vosi yavo va ñualapo kuenje va tila, ka va talamẽle. Momo eteke liohali yavo lieya, halio eteke lieyambulo liavo.

²² Egito õla ndonyoha yi kasi loku pita momo ovanyali vaye va enda longusu. Vo katukila lolondiaviti ndava va timbula oviti.

²³ Va timbula esisi liaye; ndaño ka mu pitiwa. Momo koku lova va pitahãla olohuma, ka va tendiwa. Oco ca popia Yehova.

²⁴ Omõla Egito ukãi o kutisua osõi, eciwa peka liomanu voko Norte.

²⁵ Yehova Ukualohoka, Suku ya Isareli, wa popia hati, Tala, njambula Amone yovo Teve, kuenda Fareo kuenda Egito kumue lolosuku viaye kuenda olosoma viaye, ndaño Fareo lava vo kolela.

²⁶ Ndi va eca peka liava va sanda ovimuenyo viavo, okuti peka lia Nevukandesa, Soma ya Bavulono, kuenda vakesongo vaye. Noke Egito yi tunga ndeci ya tungile voloneke viosiãhulu. Oco ca popia Yehova.

²⁷ A Yakoba, okuenje wange, ku ka kale lusumba. A Isareli, ku ka yokoke. Momo hu popela ndaño o kasi kupãla. Mopela ombuto yove kofeka yumandekua wavo. Yakoba o tiuka, o sanga etulumuho kuenje o kala ciwa. Lomue u lingisa usumba.

²⁸ A Yakoba, okuenje wange, ku ka kuate usumba; momo ame ñasi love. Nyõla pe olofeka viosi oko nda ku sandui lile, ove puãi siu ku nyõli. Hu yambula ndeci wa soka laco. Si tava okuti o puluka eyambulo. Oco ca popia Yehova.