YEREMIYA 44 - Embimbiliya - Bíblia Sagrada em Umbundu

¹ Ondaka yoku tukula va Yuda vosi va tunga vofeka ye Egito, okuti vovaimbo a Migidole, la Tafanese, kuenda Memifise, kuenda vofeka ya Patirosi, yeya ku Yeremiya.

² Ca popia Yehova Ukualohoka, Suku ya Isareli, ceci, hati, Ene wa mõli ũvi wosi nda nenẽla Yerusalãi kuenda ovaimbo osi a Yuda. Etali lilo ovaimbo aco a linga alunda kuenje lomue wa tungamo.

³ Ceyilila omo evĩho liavo lia luile. Va ndingisa onyeño omo va timãhãla olosuku viñi insensu loku vi vumba. Olosuku viaco ka va vi kũlĩhĩle, ndaño ovo, ndaño ene, ndaño olosekulu viene.

⁴ Haimo nda lipilika oku tuma tuma kokuene akuenje vange vosi okuti ovaprofeto. Nda popia popia siti, Ko ka lingi ocina eci cumbondo haico nyãle.

⁵ Haimo ka va njevelele, kuenje ka va ñuluilile ovatui avo, okuti va yuvula evĩho liavo lioku timĩhĩla olosuku viñi insensu.

⁶ Oco onyeño yange kuenda ocikumbiti cange via wenguka loku sukumũhila vovaimbo a Yuda kuenda valuwa a Yerusalãi. Lovaimbo aco a linga alunda upolokoso ndeci a kasi toke etali lilo.

⁷ Oco, ca popia Yehova, Suku yolohoka, Suku ya Isareli, ceci, hati, Nye vu lilingila ũvi ulo wokuti vu takisa vo Yuda ulume kuenda ukãi, omõla kuenda oñaña, okuti lacimue ocisupe ci supamo?

⁸ Nye vu nemisila lovilinga viovaka ene, loku timĩhĩla olosuku vĩñi insensu vofeka ye Egito omo weyi oku tunga? Nda vu lingainga ovina ndevi vu taka kilu lieve kuenje vu siñaliwa loku yoliwa epembe lolofeka viosi viokilu lieve.

⁹ Wa ivali hẽ evĩho lia vaisiene, levĩho liolosoma via Yuda, leli liakãi vavo, kuenda evĩho liene muẽle leli liakãi vene lina va li lingilile vofeka ya Yuda kuenda valuwa a Yerusalãi?

¹⁰ Toke ketali lilo muẽle lopo ka va liketisile, ndaño oku kuata usumba; ka va endelele vovihandeleko viange, pamue vovisila viange, vina nda eca kokuene kuenda kolosekulu viene.

¹¹ Oco, ca popia Yehova Ukualohoka, Suku ya Isareli, ceci, hati, Tala! Ndu pongolokelimo loku vu linga civi cokuti nyõla va Yuda vosi.

¹² Ñuata ocisupe ca Yuda, eci ca nyoñamelele oku iya ke Egito loku tungako. Vosi yavo va nyõlẽha, va fila vofeka ye Egito. Va liwa losipata kuenda onjala. Tunde kuava va sule toke kuava va velapo va liwa muẽle losipata kuenda onjala. Va koka onyanya. Oluhimo luavo lu yokokisa vosi. Va siñaliwa loku yoliwa epembe.

¹³ Ndeci nda yambuile Yerusalãi losipata lonjala kuenda efengi haico njambula ava va tunga vofeka ye Egito.

¹⁴ Kocisupe ca va Yuda ceya oku tunga vofeka ye Egito lomue o puluka. Lomue o supapo okuti o tiukila vofeka ya Yuda omo va livela oku tiukila loku tungamo. Momo ka va tiukila muẽle te lika vamue vañamiñami va yomboloka.

¹⁵ Oco alume vosi, ava va kũlĩha okuti akãi vavo va timãhãla olosuku viñi insensu, kuenda akãi vosi va talamako, hutiño omanu vosi va tunga vo Patirosi, vofeka ye Egito, okuti owiñi waco wa lua, va kumbulula Yeremiya, vati,

¹⁶ Ondaka eyi wa popia letu vonduko ya Yehova ka tu ku yevelela.

¹⁷ Puãi tu linga cosi tua likuminya oku linga. Tu timĩhĩla inakulu yokilu insensu loku u pesila ovilumba viokunyua, ndeci etu lolosekulu vietu kuenda olosoma vietu lolombuale vietu tua lingaingale vovaimbo a Yuda kuenda valuwa a Yerusalãi. Momo eci tua lingainga ndoco tua kala lokulia kua lua, kuenje tua kala muẽle ciwa, ka tua muĩle ũvi.

¹⁸ Puãi tunde tua liweka oku timĩhĩla inakulu yokilu insensu loku u pesila ovilumba viokunyua, oco tua suka ovina viosi, kuenda tua liwa losipata lonjala.

¹⁹ Akãi vati, Eci tua timaihãilãile inakulu yokilu insensu, loku u pesalaila ovilumba viokunyua, vaveyetu hẽ va patãla eci tuo tungalaile olombolo vi kuete esetãhãlo liaye, leci tuo pesailaile ovilumba viokunyua?

²⁰ Oco Yeremiya wa popia lomanu vaco vosi, vana vo kumbulula ndomo, lalume lakãi, hati,

²¹ Yehova hẽ kevalukile ndomo wa timãhãlaile insensu vovaimbo a Yuda lovaluwa a Yerusalãi? ene lolosekulu viene kuenda olosoma viene lolombuale viene, lomanu vofeka yaco? Yehova nga ka ci sokoluile?

²² Yehova ka tẽlele vali ovilinga viene vievĩho kuenda ovina viumbondo wa lingaingi. Oco ofeka yene ya nyolehela loku kunduiwa. Oco ya siñaliwila haico ya puila olonungi, ndeci yi kasi etali.

²³ Omo wa timãhãili insensu lomo wa lingili Yehova akandu, kuenje ka wa taveli kondaka ya Yehova, ka wa endeli lovihandeleko viaye, ndaño lovisila viaye pamue lovikundi viaye, oco uvi u wo sangeli, ndeci ci kasi etali lilo.

²⁴ Yeremiya wa popia lomanu vosi kuenda akãi vosi hati, A va Yuda vosi va kasi vofeka ye Egito, yevi ondaka ya Yehova.

²⁵ Ca popia Yehova Ukualohoka, Suku ya Isareli, ceci, hati, Ene kuenda akãi vene, wa popi lovimela viene, kuenda wa ci lingi lovaka ene, hoti, Tu linga cosi tua likuminya oku linga, tu timihĩla inakulu yokilu insensu loku u pesila ovilumba viokunyua,— Oco telisi ovisila viene! Ovisila viene vi lingi muẽle!

²⁶ Puãi yevi ondaka ya Yehova, a va Yuda vosi wa tungi vofeka ye Egito. Yehova hati, Nda lisila londuko yange yinene okuti onduko yange ka yi tukuiwa vali vomẽla wu Yuda vofeka yosi ye Egito loku linga hati, Ndeci Ñala Yehova a kasi lomuenyo.

²⁷ Tala! Ñasi loku va vanja oku va simila ũvi, uwa hawoko! Va Yuda vosi va kasi vofeka ye Egito va liwa losipata kuenda onjala toke va puapo vosi.

²⁸ Ava va puluka kosipata va tunda vofeka ye Egito kuenje va tiukila kofeka ya Yuda, puãi va kala vañamiñami lika. Kuenje noke ocisupe cosi ca Yuda ceya ke Egito oku tungako, ci kũliha ondaka ya linga yocili, nda yange, nda yavo.

²⁹ Kuenje Yehova hati, Ondimbukiso yene yeyi, Ndu yambuili vocitumãlo cilo, kuenje vu limbuka okuti olondaka viange olondaka vioku u tukuili ũvi.

³⁰ Ca popia Yehova ceci, hati, Tala! Ngeca Fareo Hofara, Soma ye Egito, povaka ovanyali vaye kuenda povaka ava va sanda omuenyo waye, ndeci nda eca Sedekiya, Soma ya Yuda, peka lia Nevukandesa, Soma ya Bavulono, eye unyali waye haeye wa sanda omuenyo waye.