YEREMIYA 43 - Embimbiliya - Bíblia Sagrada em Umbundu

¹ Oco eci Yeremiya a mala oku popia lomanu vosi olondaka viosi via Yehova Suku yavo, evi Yehova Suku yavo a tuma kokuavo,

² oco Asariya, omõla a Hosiaya, kuenda Yohanana, omõla a Karea, kuenda alume vosi vakuasiata, va popia la Yeremiya vati, Ove o kemba. Yehova Suku yetu ka ku tumile oku popia huti, Ka va ka ende ke Egito oku ka tungako;

³ puãi Baruki, omõla a Neriya, wa ku tu katuila. Eye o yongola oku tu eca peka lia va Kaldea okuti va tu ipãla, pamue va tu tuala ko Bavulono umandekua.

⁴ Oco Yohanana, omõla a Karea, kuenda vakesongo volohoka vosi kuenda omanu vosi, ka va tavele kondaka ya Yehova yokuti va tunga vofeka ya Yuda.

⁵ Puãi Yohanana, omõla a Karea, kuenda vakesongo vosi va konga ocisupe cosi ca Yuda, ava va tiuka kolofeka viosi oko va sanduiwile kuenje va tunga vali vofeka ya Yuda,

⁶ okuti alume lakãi lomãla kuenda omãla va Soma vakãi, kuenda omanu vosi vana Nevusaradana a sia ku Gedeliya, omõla a Ahikama, omõla a Siafana, kuenda uprofeto Yeremiya, la Baruki, omõla a Neriya.

⁷ Va enda kofeka ye Egito, momo ka va tavele kondaka ya Yehova. Va pitila ko Tafanese.

⁸ Oco ondaka ya Yehova yeya ku Yeremiya vo Tafanese yiti,

⁹ Kuata ovawe amue anene peka liove, a soleka vonata yohala vemi liatisolo okeñilĩlo lionjo ya Fareo yovo Tafanese. Ci lingila kovaso alume va Yuda.

¹⁰ Popia lavo huti, Ca popia Yehova Ukualohoka, Suku ya Isareli, ceci, hati, Tala, numa oku kopa ukuenje wange Nevukandesa, Soma ya Bavulono, kuenje eye o tumbika ocalo caye kovawe a nda soleka, kuenje o tungila ombalaka yaye yusoma kilu liao.

¹¹ Iya, o yambula ofeka ye Egito. Ava va tukuiwila efengi va fa lefengi. Ava va tukuiwila umandekua va enda umandekua. Lava va tukuiwila osipata va fa losipata.

¹² O siakãla ondalu volonembele violosuku vie Egito kuenje o vi yoka londalu. Oviteka viaco o vi tuala kumandekua. O yelisa ofeka ye Egito ndeci ungombo a sasa olona vuwalo waye. Kovaso yaco o tundamo lombembua.

¹³ O teya olongunji via Heliyapoli li kasi vofeka ye Egito. O yoka londalu olonembele violosuku vie Egito.