YEREMIYA 42 - Embimbiliya - Bíblia Sagrada em Umbundu

¹ Oco vakesongo volohoka vosi, kuenda Yohanana, omõla a Karea, la Asariya, omõla a Hosiya, kuenda omanu vosi, tunde kuava va sule toke kuava va velapo, veya kuprofeto Yeremiya.

² Va popia laye vati, Tueya kokuove lepingilo lietu. Etu tucisupe ca sialapo tua pinga okuti o tu likutilila ku Yehova, Suku yove. Momo tua kaile va lua puãi tua siala vatito, ndeci ove o tu lete.

³ Likutilila okuti Yehova, Suku yove, o tu lekisa onjila ya tu sesamela oku endelamo leci ca tu sesamẽla oku linga.

⁴ Uprofeto Yeremiya wa popia lavo hati, Nda yevako, kuenje ndi likutilila ku Yehova, Suku yene, ndeci wa pingi. Kuenje cosi Yehova a kumbulula ndu ci sapuili, siu solekeli cimue.

⁵ Oco va popia la Yeremiya vati, Yehova a linge ombangi yocili haiyo ya kolelua oku tu pisa nda ka tu lingi ndeci Yehova Suku yove a ku sapuila ove okuti etu tu ci linga.

⁶ Yi kale yiwa, yi kale yivi, tu tava muẽle kondaka ya Yehova Suku yetu, kokuaye tua ku tuma okuti ci kala ciwa letu eci tu tava kondaka ya Yehova Suku yetu.

⁷ Kovaso yoloneke ekui oco ondaka ya Yehova yeya ku Yeremiya.

⁸ Eye wa pañinya Yohanana, omõla a Karea, kuenda vakesongo volohoka vosi va kala kumue laye, kuenda omanu vosi tunde kuava va sule toke kuava va velapo.

⁹ Wa popia lavo hati, Yehova, Suku ya Isareli, una wa nunu kokuaye okuti ndu lekisa epingilo liene, wa popia hati,

¹⁰ Nda vu kala vofeka yilo, oco ame ndu tungisi kuenje siu tungululi; ndu kũli kuenje siu tukũli; momo nda likekembela eci cĩvi ndo lingi.

¹¹ Ko ka kali lusumba wa Soma ya Bavulono, una vu kuetele usumba. Yehova hati, Ko ko kuateli usumba, momo ame ñasi lene. Ndu silamẽli kuenje ndu popeli peka liaye.

¹² Ame ndu lingi ohenda okuti layevo u kuateli ohenda kuenje o tava okuti vu kala vofeka yene muẽle.

¹³ Puãi nda vu linga hoti, Ka tu tungi vofeka yilo, okuti ka vu tava kondaka ya Yehova Suku yene,

¹⁴ hoti, Ndati, tu enda vofeka ye Egito, omo ka tu mõli ovita, ka tu yevi ondaka yolumbeta, ndaño oku kuata onjala yokulia. Omo muẽle tu ka tunga.—

¹⁵ Oco, yevi ondaka ya Yehova, ene acisupe ca Yuda. Ca popia Yehova Ukualohoka, Suku ya Isareli, ceci, hati, Nda wimbi ovaso ene oku iñila vofeka ye Egito ho tungimo,

¹⁶ oco osipata vu kuetele usumba yu sangi muẽle vofeka ye Egito, kuenje omo vu fila.

¹⁷ Alume vosi va imba ovaso avo oku enda ve Egito ha va tungimo va fa losipata kuenda onjala lefengi. Ka pa supi ndaño umosi. Lomue o puluka ku eci cĩvi ndi va lingilako.

¹⁸ Momo, ca popia Yehova Ukualohoka, Suku ya Isareli, ceci, hati, Ndeci onyeño yange kuenda ocikumbiti cange via peseliwila kolonungi via Yerusalãi, haico ocikumbiti cange cu pesiliwili nda wendi ke Egito. Kuosi wendi vu koka onyanya. Oluhimo luene luvi lu yokokisa vosi. Vu siñaliwa loku yoliwa epembe. Ka vu mõli vali ocitumãlo cilo.

¹⁹ Acisupe ca Yuda, Yehova wo sapuili hati, Ko ka endi ke Egito. Oco, koleli muẽle ondaka yocili ndo lunguli layo etali

²⁰ yokuti, wa linyõli ene muẽle omo wa huki ndomo. Momo wa numili ku Yehova Suku yene, hoti, Tu likutilile ku Yehova, Suku yetu, kuenje ovina viosi Yehova Suku yetu o popia o tu vi sapuila kuenje tu vi linga.

²¹ Kuenje etali ndo sapuili ondaka yaye; puãi ka wa taveli kondaka ya Yehova Suku yene. Ndaño kamue katito kovina a numa oku sapula kokuene ka wa taveli oku linga.

²² Oco kũlĩhi okuti vu fa losipata lonjala lefengi oko wa yongoli oku enda oku ka tunga. Ka kuli atatahãi.