YEREMIYA 41 - Embimbiliya - Bíblia Sagrada em Umbundu

¹ Oco kosãi yepanduvali Isameli, omõla a Netaniya, omõla a Eliasama, ombuto ya Soma, haeye umue wa velapo ku vakesongo va Soma, eye muẽle kuenda ekuĩ lialume veya ku Gedaliya, omõla a Ahikama, ko Misipa. Osimbu va kala loku lila kumuamue vo Misipa,

² oco Isameli, omõla a Netaniya, kuenda ekuĩ liaco lialume va kala laye, va votoka kuenje va ponda losipata Gedeliya, omõla a Ahikama, omõla a Siafana, una Soma ya Bavulono a tukula oku linga onguluvulu yofeka.

³ Isameli wa ipavo va Yuda vosi va kala kumue la Gedeliya ko Misipa kuenda asualali va va Kaldea va kalako.

⁴ Eteke va ponda Gedeliya omele yaco, osimbu lomue wa ci kũlĩha,

⁵ oco kueya akui ecelãla kalume va tunda ko Siekeme, kuenda ko Silo, loko Samaria. Alume vaco va lipemula olonjele, kuenda olonanga viavo via toka toka, latimba avo a tandiwa. Vambata ovilumba viosema kuenda insensu vioku tuala konjo ya Yehova.

⁶ Isameli, omõla a Netaniya, wa tunda ko Misipa oku ñualẽhela lavo kuenje wa enda loku lila. Eci a ñualẽhela lavo wa popia lavo hati, Enjui ku Gedeliya, omõla a Ahikama.

⁷ Eci veya vokati kimbo oco Isameli, omõla a Netaniya, kuenda alume va kala laye va va ipa, kuenje va va imba vetangi.

⁸ Puãi pokati kavo pa kala ekuĩ lialume va popia la Isameli vati, Ku ka tu ipaiye, momo tu kuete ovina via solekiwa vusenge, otiliku, kuenda osevata, lulela kuenda owiki. Oco wa liweka, ka va ipãle kumue la vakuavo.

⁹ Etangi omu Isameli a imba ovivimbi viosi viomanu a ponda olio etangi linene lia fẽla Soma Asa okuti liu kuatisa oku yaka la Baasia, Soma ya Isareli. Isameli, omõla a Netaniya, wa li yukisa lovivimbi viava va pondiwa.

¹⁰ Oco Isameli wa ambata olomandekua viosi via siala vo Misipa, okuti omãla va Soma akãi, la vosi va siala vo Misipa, vana Nevusaradana, kesongo liolondavululi via lava elombe, a eca ku Gedeliya, omõla a Ahikama. Isameli, omõla a Netaniya, wa va ambata umandekua, kuenje wa tunda ha endi ku va Amone.

¹¹ Puãi eci Yohanana, omõla a Karea, kuenda vakesongo volohoka vosi va kala laye, va yeva ovina viosi vĩvi via linga Isameli, omõla a Netaniya,

¹² oco va konga alume vosi kuenje va enda oku yaka la Isameli, omõla a Netaniya. Vo sanga kociva cinene ci kasi vo Giveone.

¹³ Eci omanu vosi va kala la Isareli va mõla Yohanana, omõla a Karea, kuenda vakesongo volohoka vosi va kala laye, oco va yolela.

¹⁴ Oco omanu vosi vopiwa ko Misipa va tila ku Isameli kuenje va enda ku Yohanana, omõla a Karea.

¹⁵ Puãi Isameli, omõla a Netaniya, kuenda alume ecẽlãla, va puluka ku Yohanana kuenje va tilila ku va Amone.

¹⁶ Oco Yohanana, omõla a Karea, kuenda vakesongo volohoka vosi a kala lavo vambata omanu va siala. Omanu vaco va siala ovo omanu vana Isameli, omõla a Netaniya, opa ko Misipa kuenje wa vambata umandekua eci a ponda Gedeliya, omõla a Ahikama. Pokati komanu vaco pa kala asualali lakãi lomãla kuenda anuku. Vosi yavo Yohanana wa vopa vo Giveone.

¹⁷ Va katuka kuenje veya ko Gerute Kimihama ocipepi la Beteleme. Oko va sokele oku tunda ha va endi ke Egito,

¹⁸ omo va kala lusumba wa va Kaldea. Momo Isameli omõla a Netaniya, wa ponda Gedeliya, omõla a Ahikama, una Soma ya Bavulono a tukuile oku linga onguluvulu yofeka.