YEREMIYA 40 - Embimbiliya - Bíblia Sagrada em Umbundu

¹ Ondaka ya tunda ku Yehova kuenje yeya ku Yeremiya eci kesongo linene Nevusaradana wo wecale okuti o tunda ko Rama. Omo kesongo wo sanga, wa kutiwa lalienge. Wo sanga pokati kolomandekua viosi via Yerusalãi la Yuda, vina via kala loku talamela oku tualiwa umandekua ko Bavulono.

² Kuenje kesongo linene wa enda la Yeremiya, kuenje wa popia laye hati, Yehova Suku yove eye wa tukuila ocitumãlo cilo ovina evi vĩvi.

³ Yehova muẽle wa ci nena kuenje wa linga ndeci a popia. Omo wa linga Yehova ekandu kuenje kua tavele kondaka yaye oco ocina eci ca ku wilila.

⁴ Oco cilo tala, etali hu upa alienge a kasi kovoko ove. Nda wa soka okuti ca ku sunguluka oku enda lame ko Bavulono, enju, kuenje hu lava ciwa; puãi nda wa soka okuti ka ca sungulukile oku enda lame ko Bavulono ci kale. Tala, ofeka yosi yi kasi kovaso ove; oko kua ku sungulukila kuenda kua ku posokela oku enda oko wenda.

⁵ Nda o siala, tiukila ku Gedeliya, omõla a Ahikama, omõla a Siafana, u Soma ya Bavulono a tukula oku linga onguluvulu yovaimbo a Yuda. Tunga laye pokati komanu, pamue kuende kuosi kua ku posokela oku enda. Oco kesongo lia vakuakulava elombe wo wĩha okulia kuenda ombanjaile, kuenje wo weca.

⁶ Oco Yeremiya waenda ku Gedeliya, omõla a Ahikama, ko Misipa, kuenje wa tunga laye pokati komanu va siala vofeka.

⁷ Vakesongo vosi volohoka, ava va kala vusenge, ovo kuenda alume vavo vosi, eci va yeva okuti Soma ya Bavulono wa tukula Gedeliya, omõla a Ahikama, oku linga onguluvulu yofeka, kuenda wa eca peka liaye alume lakãi kuenda omãla, haivo olosuke viofeka, vana ka va ambatiwile olomandekua ko Bavulono,

⁸ oco va enda ku Gedeliya ko Misipa. Ava va enda vava: Isimele, omõla a Netaniya; Yohanana, omõla a Karea; kuenda Seraya, omõla a Tanihumete; lomãla ve Efai u Netofa, la Yisiniya, omõla a Maakati; ava kuenda alume vavo.

⁹ Gedeliya, omõla a Ahikama, omõla a Siafana, wa lisila lavo lalume vavo hati, Ko ka kali lusumba woku vumba va Kaldea. Tungi vofeka loku vumba Soma ya Bavulono kuenje ci kala ciwa lene.

¹⁰ Puãi ame, ame nunga ko Misipa oku vu kuatisa eci va Kaldea veya kokuetu. Ene puãi, keli ovinyu kuenda yungi apako okokuenye. Pongiyi ulela, vi soleki vovikuata viaco. Tungi vovaimbo wa kuati.

¹¹ Haico va Yudea vosi va kala vo Moavi, lava va tunga pokati ka va Amone, lava va tunga ve Edome, kuenda ava va kala volofeka vikuavo, eci va yeva okuti Soma ya Bavulono wa sia ocisupe ca va Yuda kuenje wa va ĩha Gedeliya, omõla a Ahikama, omõla a Siafana, oku va viala,

¹² oco va Yudea va tunda kolofeka viosi kuna va sanduiwile kuenje veya kofeka ya Yuda, ku Gedeliya ko Misipa. Va kela ovinyu kuenda va yunga apako a lua okuenye.

¹³ Oco Yohanana, omõla a Karea, kuenda vakesongo vosi volohoka va kala vusenge, veya ku Gedeliya ko Misipa.

¹⁴ Va popia laye vati, Wa ci kũlĩha okuti Baalise, Soma ya va Amone, wa tuma Isameli, omõla a Netaniya, oku ku ipa? Puãi Gedeliya, omõla a Ahikama, ka kolelele ondaka yavo.

¹⁵ Oco Yohanana, omõla a Karea, wa popia la Gedeliya uyombeki vo Misipa, hati, Ngece, okuti ngenda ha ipaya Isameli, omõla a Netaniya, kuenje lomue o ci kũlĩha. Eye o ku ipaila nye, okuti va Yuda vosi va liongoluila kokuove va sandoka, kuenje ocisupe ca va Yuda ci nyolẽha?

¹⁶ Puãi Gedeliya, omõla a Ahikama, wa popia la Yohanana, omõla a Karea, hati, Ocina eci ku ka ci linge, momo o kasi loku lundila ño Isameli.