YEREMIYA 4 - Embimbiliya - Bíblia Sagrada em Umbundu

¹ A Isareli, nda o tiuka, nda o tiuka muẽle kokuange, loku inasi ovombanda ene okuti si a mõli vali, kuenda nda ku tungayala vali,

² kuenje nda o lisila huti, Ndeci Yehova o kasi lomuenyo,— nda o ci lisila muẽle locili, lesunga kuenda esunguluko, oco olofeka vi sumulũhĩla kokuaye, kuenje kokuaye oko vi muila ulamba. Oco ca popia Yehova.

³ Momo Yehova wa popia lalume va Yuda kuenda lolonungi viovo Yerusalãi hati, Limi ovapia ene a vongele, ko ka limi pokati kocambanda.

⁴ Alume va Yuda haene vulonungi viovo Yerusalãi, lisevisili ku Yehova. Upi uyamba wovovitima viene, sanga onyeño yange yi katuka ndondalu, kuenje yi taima okuti lomue o tẽla oku yima omo evĩho liovilinga viene lia lua.

⁵ Ci sapuili vo Yuda, imbi oluiya vo Yerusalãi hoti, Sikili olumbeta vofeka. Vilikiyi hoti, Liongololi, tu iñili volombonge.

⁶ Tuliki epandela vo Siono; tili okuti vu lipopela, ko ka taluki. Momo mañinya cĩvi ci tunda ko Norte kuenda okunyolẽha kua lua.

⁷ Ohosi ya tunda vesuku liayo. Unyõli wolofeka wa katuka, wa tunda kofeka yaye, kuenje iya ha lingisa ofeka yene ekalasoko. Ovaimbo ene a linga alunda. Lomue o tungamo vali.

⁸ Oco, wali ovikẽlẽyi, lisiõsiõli, lili, momo onyeño ya Yehova ya tokota ka ya tu tundile.

⁹ Yehova wa linga hati, Keteke liaco utima wa Soma u teka kuenda ovitima violombuale. Ovitunda vi saluka kuenda ovaprofeto va komõha.

¹⁰ Oco nda linga siti, A Ñala Yehova, siti wa kemba ca lua omanu ava kuenda Yerusalãi, omo wa linga huti, Vu kala lombembua, puãi osipata ya toma toke kutima.

¹¹ Keteke liaco va popia lomanu ava kuenda la Yerusalãi vati, Kolomunda vialupele viovekalasoko ku tunda ofela ya tokota, yi sika omõla omanu vange ukãi, hafela yoku sisako pamue yoku yelisa,

¹² te ofela yehunguhungu ya tunda kokuavio ame nda yi katula. Cilo, ame muẽle ndi va tetela onimbu.

¹³ Tala, iya ndalende, akãlu aye ovita eya ndocipepe. Otuvalu tuaye tu kuete olupesi okuti ongonga yulombo yi sule. Ngongo yetu we! Tua nyolẽha.

¹⁴ A Yerusalãi, sukula vutima wove evĩho okuti o popeliwa. Ovisimilo viove vĩvi vi kala ño vokati kove toke pi?

¹⁵ Momo ondaka ya tunda ko Dani, haiyo ya tunda kovivulu via Efarimi, yi sapula olohali.

¹⁶ Lungula olofeka okuti iya. Sapuila Yerusalãi okuti ovita via tunda kofeka yocipãla vio viya, vi kalokaila ovaimbo a Yuda.

¹⁷ Yehova wa linga hati, Viu ñuali ndavakuakuvinga ovapia, momo wa nangulukilimo.

¹⁸ Ovituwa viove kuenda ovilinga viove ovio via ku ci kokela. Eli olio eyambulo liove kuenje li lula; liu ku pitila muẽle kutima.

¹⁹ A mãi we, a tate we! Utima wange wa tokotelua, wa teka, utima u sula vokati kange, si tela oku ũha. Momo nda yeva ondaka yolumbeta kuenda onjuela yovita.

²⁰ Enyolẽho li kuãi enyolẽho momo ofeka yosi ya nyolẽha. Olombalaka viange via nyolẽha ocipikipiki, olonanga viaco va vi kuasulako.

²¹ Toke pi mõla epandela? Toke pi njeva ondaka yolumbeta?

²² Omanu vange itende, ka va ñulihile, haivo omãla ovitumbãfe ka va kuete olondunge. Poku linga cĩvi va lunguka, puãi oku linga ciwa ka va ci kũlihĩle.

²³ Nda vanja posi kuenje tala, pa nyolẽha, pa siala upolokoso. Nda vanja kilu kuenje ka kua kaile ocinyi.

²⁴ Nda vanja kolomunda, kuenje tala, via luluma, kuenda ovivulu via yengenga.

²⁵ Nda vanja kuenje tala, ka kua kaile omunu, kuenda olonjila viosi viovilu via tila.

²⁶ Nda vanja, kuenje tala, ovapia a imaile a linga ekalasoko. Ovaimbo aco osi a livulukutila kovaso a Yehova, kuenda kovaso onyeño yaye ya lua.

²⁷ Momo, ca popia Yehova ceci, hati, Ofeka yosi yi nyolẽha, haimo si nyõli cosi pe.

²⁸ Oco ongongo yi lila kuenda ilu li tekãva. Momo ame nda popia, ame nda ci panga, kuenje si litiulamo, si liweka.

²⁹ Ovaimbo osi a tila onjuela ya vakuakuendela kotuvalu leyi ya vakualohonji. Va iñila vovisuku, va londa kovawe. Ovaimbo osi a linga alunda. Lomue o tungamo vali.

³⁰ Kaliye, ove wa nyolẽha, ove wa sima ndati eci o wala ohusu leci o limiangulula lovingẽlengẽle viulu loku vokiya ovaso ove lolotinda? Momo o likavisa ño. Olombaisi viove via ku sepula, via sanda omuenyo wove.

³¹ Momo nda yeva okuliyula ndoku kukãi o kasi lolongembia vioku cita uveli waye, okuo oku liyula kuomõla a Siono ukãi. O sakoka, alõla ovaka aye hati, A mãi we! Omuenyo wange wa taka povaka olomondi.