YEREMIYA 39 - Embimbiliya - Bíblia Sagrada em Umbundu

¹ Kunyamo wecea wa Sedekiya, Soma ya Yuda, kosãi yekui, Nevukandesa, Soma ya Bavulono, weya ko Yerusalãi lolohoka viaye viosi, kuenje wa li ñuala ocingonja.

² Kunyamo wekũi lamosi wa Sedekiya, vosãi yakuãla, keteke liecea liosãi, oco va iñila vimbo.

³ Eci Yerusalãi lia kuatiwa oco olombuale viosi via Soma ya Bavulono via iñila kuenje via tumãla vombundi yopokati, vievi: Nergali-Siaresere, Semigare-Nevo, Sariseki u Ravisarisi, Nergali Siaresere u Ravimagi kuenda olombuale viosi vikuavo via Soma ya Bavulono.

⁴ Oco, eci Sedekiya, Soma ya Yuda, kuenda asualali vosi va va mõla, va tila kuenje va tunda vimbo luteke, va pita vocumbo ca Soma vombundi yopokati kovimbaka vivali; va loña ka Arava.

⁵ Puãi asualali va va Kaldea va va landula, kuenje va sanga Sedekiya ketapi lioko Yeriko. Eci vo kuata vo tuala ku Nevukandesa ko Rivila, vofeka ya Hamati, kuenje Nevukandesa wo tetela onimbu yokuti,

⁶ Soma ya Bavulono wa ipaila omãla valume va Sedekiya vo Rivila kovaso aye, kuenje Soma ya Bavulono haico a ipavo olombuale via Yuda.

⁷ Noke vali wa tofola Sedekiya ovaso, kuenje wo valela ovikumbi ho tuala ko Bavulono.

⁸ Va Kaldea va yoka londalu onjo ya Soma lolonjo viomanu, kuenje volumula ovimbaka via Yerusalãi.

⁹ Oco ocisupe comanu ca siala vimbo kuenda ava va yapukila kokuaye lomanu vakuavo va siala, kesongo linene Nevusaradana wa va tuala ko Bavulono olomandekua.

¹⁰ Puãi olosuke viomanu, ovo ka va kuete cimue, kesongo linene Nevusaradana wa va sia vofeka ya Yuda kuenje wa va iha oviumbo viayuva kuenda ovapia.

¹¹ Kuenje Nevukandesa, Soma ya Bavulono, wa sapuila kesongo linene Nevusaradana hati,

¹² Tambula Yeremiya, u lava ciwa, kuenje ku ko linge cimue, puãi linga laye ndeci eye a ku sapuila.

¹³ Oco kesongo linene Nevusaradana kuenda Nevusiasibana u Ravisarisi kuenda Nergali Siaresere u Ravimagi kuenda vakesongo vosi va Soma ya Bavulono

¹⁴ va tuma kuenje vopa Yeremiya vocitali colomandekua covelombe. Vo weca ku Gedeliya, omõla a Ahikama, omõla a Siafana, vati, Kuende laye kimbo. Oco eye wa tunga pokati komanu.

¹⁵ Osimbu a yikiwile vocitali colomandekua covelombe oco ondaka ya Yehova yeya ku Yeremiya yiti,

¹⁶ Kuende ka popie la Evede-Meleke u Etiopia huti, Ca popia Yehova Ukualohoka, Suku ya Isareli, ceci, hati, Tala! Nelisa imbo lilo olohuminyo viange vioku li linga cĩvi. Si li lingi ciwa. Kuenje keteke liaco ũvi waco u li lingilua kovaso ove.

¹⁷ Ove puãi hu popela eteke liaco. Ku eciwa peka liomanu ava o kuetele usumba.

¹⁸ Hu popela muẽle, ku fi losipata. Omuenyo wove o kala lawo ndohuate yovita omo wa ñolela. Oco ca popia Yehova.