YEREMIYA 37 - Embimbiliya - Bíblia Sagrada em Umbundu

¹ Nevukandesa, Soma ya Bavulono, wa kapa Sedekiya, omõla a Yosiya, ha lingi Soma vofeka ya Yuda, oku piñala komangu ya Koniya, omõla a Yehoyakimi.

² Puãi ndaño eye, ndaño akuenje vaye, ndaño omanu vofeka, ka va yevelele kolondaka via Yehova, evi a popia luprofeto Yeremiya.

³ Soma Sedekiya wa tuma Yehukale, omõla a Siemaliya, kuenda Sefaniya, omõla ocitunda Maseya, kuprofeto Yeremiya hati, Tu likutilile ku Yehova Suku yetu.

⁴ Kotembo yaco lopo Yeremiya wa ñuala ñuala pokati komanu omo ka yikiwile handi vokayike.

⁵ Olohoka via Fareo via tunda ale ve Egito. Leci va Kaldea, ava va kala loku ñuala Yerusalãi ocingonja, va va yeva oco va tunda ko Yerusalãi.

⁶ Oco ondaka ya Yehova yeya kuprofeto Yeremiya yiti,

⁷ Ca popia Yehova, Suku ya Isareli, ceci, hati, Eci o sapuila Soma ya Yuda, u wa ku tumile kokuange oku mũla, ceci, huti, Tala, olohoka via Fareo vieya oku ku kuatisa ndopo vi tiukila ke Egito, kofeka yavio muẽle.

⁸ Kuenje va Kaldea va tiuka ha va yaki limbo lilo. Va li kuata, loku li yoka londalu.

⁹ Ca popia Yehova ceci, hati, Ko ka likembisi hoti, Ocili va Kaldea va tu tunda, momo ka va tundi.

¹⁰ Momo ndaño wa yuli olohoka viosi via va Kaldea vi yaka lene, kuenje pokati kavo pa siala lika vakualongase, haimo va katuka, omunu vombalaka yaye, omunu vombalaka yaye, kuenje va yoka imbo lilo londalu.

¹¹ Oco eci olohoka via va Kaldea via tunda ko Yerusalãi omo via kala lusumba wolohoka via Fareo,

¹² oco Yeremiya wa tunda vo Yerusalãi ha endi kofeka ya Benjamini oku tambula pokati komanu onepa yaye.

¹³ Eci a kala vombundi ya Benjamini, oco umue ondavululi, onduko yaye Iriya, eye omõla a Sielemiya, omõla a Hananiya, wa kuata uprofeto Yeremiya hati, O kasi loku yombolokela ku va Kaldea.

¹⁴ Yeremiya wa kumbulula hati, Eci hacoko. Si kasi loku yombolokela ku va Kaldea. Puãi Iriya ko yevelele kuenje wa kuata Yeremiya, wo nena kolombuale.

¹⁵ Olombuale via temela calua Yeremiya, vio veta, kuenje vio yika vonjo yusonehĩ Yonatana omo ya pongoluiwa okayike.

¹⁶ Eci okuti Yeremiya o kasi ale vokayike oloneke vialua

¹⁷ oco Soma Sedekiya wo tumila kuenje vo nena konjo yaye uyombeki. Soma wo pula pula hati, Ku li ondaka ya Yehova? Yeremiya wa kumbulula hati, Ku li. Wa vokinyako hati, Ove weciwa peka lia Sorpa ya Bavulono.

¹⁸ Yeremiya wa pulavo Soma Sedekiya hati, Nda lueya ndati pamue oku ku lueyela ove, pamue oku lueyela akuenje vove, pamue oku lueyela omanu ava, okuti o njimba vokayike?

¹⁹ Ovaprofeto vove hẽ, vana va ku imbila ondaka yocitumasuku vati, Soma ya Bavulono ka katukila, ndaño ove ndaño ofeka yilo, va kasi pi?

²⁰ A ñala yange, a Soma, nda livondela kokuove. Njevelele. Nda pinga kokuove loku likekemba siti, Ku ka niuwiye vali konjo yusonẽhi Yonatana sanga filako.

²¹ Oco Sedekiya wa handeleka, kuenje wa yika Yeremiya vocitali colomandekua covelombe. Vo wĩhaiha eteke keteke ombolo ya tunda koluwa lua vakuakuyoka ombolo, toke ombolo ya pua vimbo. Oco Yeremiya wa kala vocitali colomandekua covelombe.