YEREMIYA 36 - Embimbiliya - Bíblia Sagrada em Umbundu

¹ Kunyamo wakuãla wa Yehoyakimi, omõla a Yosiya, Soma ya Yuda, ondaka eyi ya tunda ku Yehova, yeya ku Yeremiya, yiti,

² Tikula ociña celivulu kuenje sonẽhãmo olondaka viosi nda popia via tiama ku Isareli la Yuda lolofeka viosi, tunde keteke nda popia love tete okuti tunde koloneke via Yosiya toke ketali lilo.

³ Mbi epata lia Yuda li tava oku yeva ovina viosi nda panga oku vi linga, okuti vosi va tinduka, omunu omunu konjila yaye yivi, kuenje ndi va ecela evĩho liavo lakandu avo.

⁴ Oco Yeremiya wa pañinya Baruke, omõla a Neriya, kuenje Baruke wa sonẽha vociña celivulu olondaka viosi via tunda ku Yehova yu via popiwa lomẽla wa Yeremiya.

⁵ Kuenje Yeremiya wa sapuila Baruke hati, Ame nda tatekiwa, si tẽla oku iñila vonjo ya Yehova;

⁶ oco ove wenda, o tanga olondaka via Yehova via tunda vomẽla wange, o vi tangela omanu vonjo ya Yehova keteke lioku likandangiya okulia. O vi tangelavo va Yuda vosi va tunda vovaimbo avo.

⁷ Mbi alombelo avo a yevala ku Yehova, kuenje vosi, omunu omunu, va tinduka kolonjila viavo vĩvi. Momo onyeño locikumbiti Yehova a tukuila omanu ava, vialua.

⁸ Oco Baruke, omõla a Neriya, wa linga cosi Yeremiya o sapuila, yu wa tangela vonjo ya Yehova olondaka via Yehova viovelivulu.

⁹ Kunyamo watãlo wa Yehoyakimi, omõla a Yosiya, Soma ya Yuda, kosãi yecea, oco omanu vosi vovo Yerusalãi, kuenda omanu vosi va tunda kovaimbo oko Yuda loku iya ko Yerusalãi, va tukula eteke lioku likandangiya okulia kovaso a Yehova.

¹⁰ Oco olondaka via Yeremiya viovelivulu Baruke wa vi tangela vonjo ya Yehova, vohondo ya Gemariya, omõla usonẽhi Siafana, vocitali cokonano, poku iñilĩla kombundi yokaliye yonjo ya Yehova. Wa vi tangela omanu vosi.

¹¹ Eci Mika, omõla a Gemariya, omõla a Siafana, a yeva olondaka viosi via Yehova viovelivulu,

¹² oco wa lokila vonjo ya Soma, vohondo yusonẽhi. Kuenje tala, olombuale viosi omu via tumãla, vievi, Usonehi Elisiama, kuenda Delaiya omõla a Siemaiya, kuenda Elenatana omõla a Akibore, la Gemariya omõla a Siafana, la Sedekiya omõla a Hananiya, lolombuale viosi.

¹³ Oco Mika wa va sapuila olondaka viosi a yeva eci Baruke a tangela omanu kelivulu.

¹⁴ Oco olombuale viosi via tuma Yehundi, omõla a Netaniya, omõla a Sielemiya, omõla a Kusi, ku Baruke ha popi laye hati, Ociña wa tangela omanu ci ambata peka liove kuenje enju. Oco Baruke, omõla a Neriya, wa kuata ociña peka liaye yu weya kokuavo.

¹⁵ Kuenje vati, Kaliye tumãla, ci tanga okuti etu tu ci yeva. Oco Baruke wa va ci tangela.

¹⁶ Eci va yeva olondaka viaco viosi va livanja lusumba; kuenje va popia la Baruke vati, Olondaka evi viosi tu kuete oku vi sapuila Soma.

¹⁷ Kuenje va pula Baruke vati, Tu sapuileko handi, olondaka evi viosi wa vi sonẽha ndati? Eye wa vi popia kuenje ove wa vi soneha ale?

¹⁸ Oco Baruke wa va kumbulula hati, Eye wa popia olondaka evi viosi lomẽla waye, kuenje ame nda vi sonẽha velivulu lotinda.

¹⁹ Oco olombuale via popia la Baruke viti, Kuendi, ka vundi, ove la Yeremiya. Ko ka tavi okuti umue o kũliha oko vu kasi.

²⁰ Oco va iñila vocitali, va enda ku Soma, puãi va soleka ociña vohondo yusonẽhi Elisiama. Va lomboluila Soma olondaka viaco viosi.

²¹ Oco Soma wa tuma Yehudi oku upa ociña, kuenje eye wa ci upa vohondo yusonẽhi Elisiama; kuenje Yehudi wa ci tangela olombuale viosi via talama konẽle ya Soma.

²² Ca kala kosãi yecea. Soma wa kala vonjo yotembo yombambi. Pociyo ca kala ocipepi laye pa kala ondalu.

²³ Eci Yehudi a tanga amẽla atatu pamue akuãla, oco Soma wa a teta lokamoko kaye kuenje wa a imba vondalu yopociyo toke ociña cosi ca pila vondalu yopociyo.

²⁴ Haimo ka va kaile lusumba, ka va kesuile uwalo wavo, ndaño Soma, ndaño akuenje vaye va yeva olondaka viaco viosi.

²⁵ Kuenje ndaño Elenatana kuenda Delaya kuenda Gemariya va pinga Soma okuti ka yoki ociña, haimo eye ka tavele oku va yeva.

²⁶ Kuenje Soma wa tuma Yerahimele, omõla a Soma, kuenda Seraiya, omõla a Asariyali, kuenda Sielemiya, omõla a Avidigele, hati, Kuati usonẽhi Baruke kuenda uprofeto Yeremiya. Puãi Yehova wa va vundisa.

²⁷ Eci Soma a yoka ale ociña ci kuete olondaka via popia Yeremiya yu via sonehiwa la Baruke, oco ondaka ya Yehova yeya ku Yeremiya, yiti,

²⁸ Nyañula ociña cikuavo, kuenje sonẽhãmo olondaka viosi via kaile vociña catete, cina Yehoyakimi, Soma ya Yuda, a yoka.

²⁹ Kuenje oku tukula Yehoyakimi, Soma ya Yuda, eci o popia ceci, huti, Ca popia Yehova ceci, hati, Ove wa yoka ociña huti, Nye wa sonẽhẽlamo huti, Ocili Soma ya Bavulono iya kuenje o nyõla ofeka yilo, o nyõlãmo omanu lovinyama?

³⁰ Oco ca popia Yehova oku tukula Yehoyakimi, Soma ya Yuda, ceci, hati, Kokuaye ka ku tundi umue o tumãla kocalo ca Daviti. Locivimbi caye ci inasiwila kovuya wutanya kuenda kombambi yuteke.

³¹ Eye lomãla vaye lakuenje vaye ndi va nenẽla uvĩ wosi nda va tukuila, puãi ka va tavele oku yeva.

³² Oco Yeremiya wa nyañula ociña cikuavo, wa ci eca kusonẽhi Baruke, omõla a Neriya, kuenje eye wa sonẽhãmo olondaka viosi via tunda vomẽla wa Yeremiya, haivio via kala vociña cikuavo, cina Yehoyakimi Soma ya Yuda a yoka vondalu; kuenda olondaka via lua vikuavo via lisoka via vokiyiwa.