YEREMIYA 35 - Embimbiliya - Bíblia Sagrada em Umbundu

¹ Ondaka ya Yehova yeya ku Yeremiya koloneke via Yehoyakimi omõla a Yosiya, Soma ya Yuda, yeyi, yiti,

² Kuende kepata lia va Rekava, ka vangule lavo, kuenje va nena vonjo ya Yehova, vohondo yimue vonjo. Seteka oku va nyuisa ovinyu.

³ Oco ndambata Yasaniya, omõla a Yeremiya, omõla a Havaciniya, kuenda vamanjaye alume vosi, lomãla vaye valume vosi, kuenda epata liosi lia va Rekava.

⁴ Nda va tuala vonjo ya Yehova, vohondo yomãla va Hanana, omõla a Yigidaliya haeye omunu wa Suku. Ohondo yaco ya kala ocipepi lohondo yolombuale leyi yi kasi kilu liohondo ya Maseya, omõla a Sialume, eye ukuakulava puvelo.

⁵ Nda kapa kovaso a va Rekava olombia vie yuka ovinyu, kuenda olokopo viokunyuila. Nda popia lavo siti, Nyui ovinyu.

⁶ Puãi va linga vati, Ka tu nyui ovinyu, momo Yonadava, omõla a sekulu yetu Rekava, wa tu handeleka hati, Ka ci tava oku nyua ovinyu, ndaño ene, ndaño omãla vene toke koloneke ka vi pui.

⁷ Ka ci tava oku tunga olonjo ndaño oku imba ombuto. Ka ci tava oku tuika ocumbo cayuva, ndaño oku kala laco ka ci tava. Puãi vu tunga volombalaka okuti vu kala oloneke via lua vofeka omo wa tungi.—

⁸ Tua tava kondaka ya Yonadava, omõla a Sekulu yetu Rekava, kuenje tua linga cosi a tu handeleka. Ka tua la nyua ovinyu oloneke vietu viosi, etu lakãi vetu kuenda omãla vetu valume, lomãla vetu vakãi.

⁹ Ka tua litungilile olonjo vioku kalamo. Ka tu kuete ocumbo cayuva, ndaño epia, ndaño ombuto.

¹⁰ Puãi tua tunga volombalaka, kuenje tua pokola ku sekulu yetu Yonadava loku linga ovina viosi a tu handeleka.

¹¹ Puãi eci Nevukandesa, Soma ya Bavulono, eya vofeka yilo oco tua linga tuti, Enjui, tu endi ko Yerusalãi, omo tu kasi lusumba wolohoka via va Kaldea levi via va Suria. Oco tu kasilili vo Yerusalãi.

¹² Oco ondaka ya Yehova yeya ku Yeremiya yiti,

¹³ Ca popia Yehova Ukualohoka, Suku ya Isareli, ceci, hati, Kuende, ka popie lalume va Yuda lolonungi via Yerusalãi huti, Anga, ka vu tava oku longiwa? Ka vu tava oku yevelela kolondaka viange? Oco ca popia Yehova. Ka vu tava oku yevelela kolondaka viange? Oco ca popia Yehova.

¹⁴ Olondaka via Yonadava, omõla a Rekava, evi a handeleka omãla vaye hati, Ka ci tava oku nyua ovinyu, via lingiwa; kuenje lopo toke ketali lilo ka va nyui, momo va tava kocihandeleko ca Sekulu yavo. Ame nda popia popia lene lolupili haimo ka wa njeveleli.

¹⁵ Nda tumavo kokuene akuenje vange vosi ovaprofeto. Nda pandikisa oku va tuma tuma. Nda linga siti, Ene vosi, tinduki omunu omunu konjila yaye yĩvi. Sunguluisi ovilinga viene. Ko ka sandi olosuku viñi loku vi vumba. Oco vu kala vofeka nda eca kokuene kuenda kolosekulu viene. Puãi ka wa ñuluĩlĩli ovatũi ene, pamue oku njevelela.

¹⁶ Omãla va Yonadava, omõla a Rekava, va pokola kocihandeleko ca va iha sekulu yavo, omanu ava puãi ka va pokuile kokuange.

¹⁷ Oco, ca popia Yehova Ukualohoka, Suku ya Isareli, ceci, hati, Tala, ndi muisa Yuda kuenda olonungi via Yerusalãi ovina viosi vĩvi nda va tukuila. Momo nda popia lavo kuenje ka va yevele, nda va kovonga kuenje ka va kumbuluile.

¹⁸ Puãi Yeremiya wa popia lepata lia va Rekava hati, Ca popia Yehova Ukualohoka, Suku ya Isareli, ceci, hati, Omo wa pokoli kocihandeleko ca isiene Yonadava, yu wa patekeli ovikundi viaye viosi, kuenje wa lingi ndeci o handeleki,

¹⁹ oco, Yonadava, omõla a Rekava, oloneke ka vi pui ka kambi ulume oku talama kovaso ange. Oco ca popia Yehova Ukualohoka, Suku ya Isareli.