YEREMIYA 34 - Embimbiliya - Bíblia Sagrada em Umbundu

¹ Osimbu Nevukandesa, Soma ya Bavulono, lolohoka viaye viosi, kuenda ovosoma osi okilu lieve a kala vemi liuviali waye, kuenda olofeka viosi,— osimbu vosi yavo va kala loku yaka la Yerusalãi lovaimbo aco osi, oco ondaka ya Yehova yeya ku Yeremiya, yiti,

² Ca popia Yehova, Suku ya Isareli, ceci, hati, Kuende, ka popie la Sedekiya, Soma ya Yuda. Ka popie laye huti, Ca popia Yehova ceci, hati, Tala, ngeca imbo lilo peka lia Soma ya Bavulono kuenje o li yoka londalu.

³ Love ku puluka peka liaye, puãi ocili o kuatiwa loku eciwa peka liaye. O mõla muẽle Soma ya Bavulono iso liso, o vangula laye omẽla lomẽla, ove wenda muẽle ko Bavulono.

⁴ Haimo a Sedekiya, Soma ya Yuda, handi yevelela ondaka ya Yehova! Ca ku popela Yehova ceci, hati, Ku fi losipata;

⁵ o lifila lombembua. Kuenje ndeci va timĩhĩlĩe insensu vakukululu vove, haivo olosoma via kaile ale, haico va ku vi timĩhĩlavo, kuenje va ku lilila vati, A Ñala yetu we! Momo ame nda popia ondaka yaco. Oco ca popia Yehova.

⁶ Oco uprofeto Yeremiya wa sapuila Sedekiya, Soma ya Yuda, olondaka evi viosi vo Yerusalãi,

⁷ osimbu olohoka via Soma ya Bavulono via kala loku yaka la Yerusalãi lovaimbo osi a Yuda a supapo, la Lakisi kuenda Aseka; momo o-o lika a siala kovaimbo osi a Yuda.

⁸ Ondaka ya Yehova yeya ku Yeremiya, eci Soma Sedekiya a lisila ale ocisila lomanu vosi va kala vo Yerusalãi okuti o va imbila oluiya lueyovoko liokuti,

⁹ omanu vosi omunu omunu, u o kasi lupika u Heveru, ndaño upika ulume, ndaño upika ukãi, u weca, okuti lomue o lingisa u Yudea ukuavo upika.

¹⁰ Kuenje va pokola. Olombuale viosi lomanu vosi, ava va lisila ocisila cokuti omunu, omunu eca upika waye, ci kale upika ulume, ci kale upika ukãi, okuti lomue o vumbisiwa vali, vosi va pokola kuenje va va eca.

¹¹ Puãi noke va pongolokamo kuenje va tambula vali apika vaco valume lava vakãi, vana va ecele ale. Va va lingisa vali apika.

¹² Ondaka ya tunda ku Yehova yeya ku Yeremiya yiti,

¹³ Ca popia Yehova, Suku ya Isareli, ceci, hati, Nda lisilile ocisila la vakukululu vene eteke nda vopa vofeka ye Egito, kuenda vonjo yupika. Nda lisilile lavo, siti,

¹⁴ Kesulilo lianyamo epandu ene vosi, omunu omunu eca ukuavo u Heveru, una wa landisiwa kokuaye yu wo vumba anyamo epandu; u weca muẽle okuti o linga omãmãle. Puãi vakukululu vene ka va njevele ndaño oku ñuluĩla ovatui avo.

¹⁵ Oloneke vilo ene wa pongoloke, kuenje wa lingili eci ca sunguluka kokuange. Wa imbili oluiya lueyovo, omunu lokuavo, omunu lokuavo, kuenje wa lisilili ocisla kovaso ange vonjo ya tukuiwa londuko yange.

¹⁶ Puãi cilo wa pongoloki vali, kuenje wa lavisi onduko yange, omo wa tambuli vali omunu omunu apika vaye, apika valume lapika vakãi. Ava wa va eceleli ha va lingi ocipango cavo wa va lingisi vali apika vene.

¹⁷ Oco, ca popia Yehova ceci, hati, Omo ka wa pokuili kuenje ka wa limbilili aluiya oku eca apika, ndeci omunu la manjaye, pamue omunu lu a lisungue laye, oco, tala, ame ndu wimbili oluiya luoku weci kosipata lokefengi kuenda konjala. Oco ca popia Yehova. Ndu lingisi vakualuhimo lu yokokisa ovosoma osi o kilu lieve.

¹⁸ Lalume va nyõla ocisila cange, okuti ka va tẽlisile ocisila va lisila lame, ndi va sokisa lonãle va tola pokati kuenje va pita pokati kolonepa viaco.

¹⁹ Ava va ci linga vava okuti, olombuale via Yuda, lolombuale via Yerusalãi, kuenda akuenje velombe, lovitunda, lomanu vosi vofeka. Ovo muẽle va pita pokati kolonepa vionãle.

²⁰ Ndi va eca peka liovanyãli vavo kuenda peka liava va sanda ovimuenyo viavo. Ovivimbi viavo vi linga okulia kuolonjila viovilu lovinyama viovusenge.

²¹ Sedekiya, Soma ya Yuda, lolombuale viaye, ndi va eca peka liovanyãli vavo kuenda peka liava va sanda ovimuenyo viavo, okuti peka liolohoka via Soma ya Bavulono evi vio tundi.

²² Tala! Njimba oluiya luaco kuenje ndi vi nena vali kimbo lilo. Vi yaka lalio, vi li kuata, kuenje vi li yoka londalu. Ndingisa ovaimbo oko Yuda alunda. Lomue o tungamo vali. Oco ca popia Yehova.