YEREMIYA 33 - Embimbiliya - Bíblia Sagrada em Umbundu

¹ Osimbu Yeremiya a yikiwa vocitali colomandekua covelombe oco ondaka ya Yehova yeya vali ku Yeremiya yiti,

² U wa lulika oluali loku lu kolisa, onduko yaye Yehova. Ca popia Yehova, usovoli woluali, ceci, hati,

³ Mbilikiye kuenje hu kumbulula, hu lekisa ovina vimue vinene haivio via sitikiwa okuti ove kua vi kũlĩhĩle.

⁴ Momo oku tukula olonjo vimbo lilo, lolonjo violosoma via Yuda vina via tunguluiwila oku yaka la vakualondunda la vakualosipata, Yehova, Suku ya Isareli, wa popia hati,

⁵ Va Kaldea va kasi loku iya oku yaka loku vi yukisa lovivimbi vialume nda ponda lonyeño yange locikumbiti cange. Momo nda liweka oku vanja imbo lilo omo akandu alio alua enene.

⁶ Ndi li nenẽla uhayele loku ñuaima. Ndi va sakula, kuenje ndi va muĩsa okusalala kua lua kuenda okukoka.

⁷ Numbulula esumũlũho lia Yuda leli lia Isareli. Ndi va tungisa ndeci va kaile ale.

⁸ Ndi va yelisa keko liosi liakandu va ndingila. Ndi va ecela akandu lusuanji va ndingila.

⁹ Kuenje imbo lilo li nenela esanju lesivayo kuenda ulamba, kovaso olofeka viosi viokilu lieve eci vi yeva ovina viosi vina nda li linga. Vi yokoka loku lulumĩla ovina viwa viosi lokusalala kuosi nda li muĩsa.

¹⁰ Ca popia Yehova ceci, hati, Vocitumãlo cilo ene wa tukuli hoti, Ekalasoko, ka ci kuete omunu ndaño ocinyama,— kuenda vovaimbo a Yuda, lovaluwa ovo Yerusalãi a kasi ño upolokoso, ka a kuete omunu, ndaño onungi, ndaño ocinyama,

¹¹ muosi mu yevalela ondaka yesanju, kuenda ondaka yonjolela, londaka ya Sandombua leyi ya Ndombua, kuenda ondaka yava va imba ovisungo osimbu va nena ovilumba violopandu vonjo ya Yehova, vati, Panduli Yehova Ukualohoka, momo Yehova uwa, momo ohenda yaye ka yi pui. Momo numbulula vali esumũlũho liofeka. Yi kala vali ndeci ya kaile ale. Oco ca popia Yehova.

¹² Ca popia Yehova Ukualohoka ceci, hati, Vocitumãlo cilo ca linga ekalasoko, ka ci kuete omunu ndaño ocinyama, kuenje vovaimbo aco osi, mu tungiwa vali olonjo viovangombo va tata oviunda viavo.

¹³ Vovaimbo ovofeka yolomunda, kuenda vovaimbo ovofeka yetapi, lovovaimbo oko Sul, kuenda vofeka ya Benjamini, kuenda vovikanjo via ñuala Yerusalãi lovovaimbo a Yuda, muosi mu pita pita vali oviunda. Vi pita vemẽhi liokuokuo ku o vi tenda. Oco ca popia Yehova.

¹⁴ Yehova wa popia hati, Tala, oloneke viya okuti ndi lemulula ohuminyo nda likuminya lonjo ya Isareli kuenda onjo ya Yuda.

¹⁵ Voloneke viaco kuenda kotembo yaco njovisila ku Daviti Conjovelelacesunga. Eye o lingila vofeka esunga lesunguluko.

¹⁶ Voloneke viaco Yuda yi popeliwa kuenda Yerusalãi li tunga ciwa loku koka. Onduko li tukuiwa layo yeyi okuti, Yehova-eyeesunga-lietu.

¹⁷ Ca popia Yehova ceci, hati, Lalimue eteke Daviti a pumba ulume o tumãla kocalo covonjo ya Isareli.

¹⁸ Ndaño ovitunda via va Lewi lalimue eteke vi pumba ulume o lumbila kovaso ange ovilumba vioku yoka levi viosema, pamue yu o lumba lumba ovilumba oloneke viosi.

¹⁹ Ondaka ya Yehova yeya ku Yeremiya yiti,

²⁰ Ca popia Yehova ceci, hati, Nda vu tẽla oku imũla ocisila cange nda lisila lutanya, kuenda ocisila cange nda lisila luteke, okuti ka ku kala vali utanya, kuenda ka ku kala vali uteke kolotembo viaco,

²¹ nda oco vu tẽla, nda ci tava okuti ocisila cange nda lisila lukuenje wange Daviti cimũha, kuenje o pumba omõlaye o tumãla kocalo caye. Leci nda lisila la va Lewi haivo ovitunda haivo olombumba viange, lacovo cimuha.

²² Nduisa ombuto yukuenje wange Daviti, leyi yovitunda via va Lewi va mbumba mbumba, okuti yi lisoka lolombungululu viokilu ka vi tendiwa, pamue leseke liokalunga ka li yongiwa.

²³ Ondaka ya Yehova yeya ku Yeremiya yiti,

²⁴ Kua limbukile eci ci kasi loku popia omanu ava, vati, Apata avali Yehova a nõlẽle kaliye wa a takumũla?— Oco va sepula omanu vange okuti ka va tendiwa vali ndofeka kovaso avo.

²⁵ Ca popia Yehova ceci, hati, Nda ocisila cange cutanya kuenda eci cuteke ka ci koli, kuenda nda sia tukuile ovihandeleko viokilu levi viokilu lieve,

²⁶ oco nakumũla ombuto ya Yakoba leyi yukuenje wange Daviti, kuenje si nõli umue kombuto yaye ha lingi ombiali yombuto ya Avirahama, kuenda Isake, kuenda Yakoba. Momo numbulula esumũlũho liavo kuenje ndi va linga ohenda.