YEREMIYA 32 - Embimbiliya - Bíblia Sagrada em Umbundu

¹ Eyi, oyo ondaka ya Yehova yeya ku Yeremiya kunyamo wekũi wa Sedekiya, Soma ya Yuda, haiwo unyamo wekui lecelãla wa Nevukandesa.

² Koloneke viaco olohoka via Soma ya Bavulono via ñuala Yerusalãi ocingonja, kuenje uprofeto Yeremiya wa yikiwa vocitali colomandekua covelombe lia Soma ya Yuda.

³ Momo Sedekiya, Soma ya Yuda, wo yika omo wo pula hati, Nye o popela ocitumasuku huti, Ca popia Yehova ceci, hati, Ngeca imbo lilo peka lia Soma ya Bavulono, o li kuata?

⁴ Kuenje Sedekiya, Soma ya Yuda, ka puluka peka lia va Kaldea, puãi eciwa peka lia Soma ya Bavulono, kuenje o popia laye omẽla lomẽla, u mõla ovaso lovaso.

⁵ Eye o tuala Sedekiya ko Bavulono, haiko a kala toke ndu wivaluka. Ndaño vu yaka la va Kaldea ka vu yuli? Oco ca popia Yehova.

⁶ Yeremiya wa linga hati, Ondaka ya Yehova yeya kokuange yiti,

⁷ Tala, Hanamele, omõla a Sialume, nyohõnu, iya kokuove ha popi love hati, Landa epia liange li kasi ka Anatote, momo omoko yoku li landa yove.

⁸ Oco Hanamele, epalume liange, weya kokuange vocitali colomandekua covelombe ndondaka ya Yehova. Wa popia lame hati, Hu pinga siti, Landa epia liange li kasi ka Anatote, vofeka ya Benjamini, momo omoko yoku li landa loku kala lalio yove muẽle. Li landa ha li lingi liove. Oco nda limbuka ondaka eyi okuti ondaka ya Yehova.

⁹ Oco nda landa epia Ha Hanamele, epalume liange, U kasi ka Anatote, kuenje ndo pesalisila olombongo viaco, okuti ekũi liolosiekele kolosiekele epanduvali viopalata.

¹⁰ Kuenje nda sonẽha onduko yange kukanda wuvangi woku landa epia, lukanda waco ndo yika. Nda laleka olombangi, kuenje nda pesalisa olombongo viaco vombalãsa.

¹¹ Oco nda nyañula ukanda wuvangi una wa yikiwa, omu mua sonehiwa ovihandeleko lolohuminyo vioku landa. Nda nyañulavo ukanda wuvangi owu ka wa yikiwile.

¹² Kuenje kovaso a Hanamele, epalume liange, lokovaso olombangi via sonẽha olonduko viavo kukanda wuvangi woku landa epia, kuenda kovaso a va Yudea vosi va tumãla vocitali colomandekua covelombe, oko nda ecela ku Baruki, omõla a Neriya, omõla a Maheseiya, ovihanda viuvangi vioku landa epia.

¹³ Nda vi kundika ku Baruki kovaso avo siti,

¹⁴ Ca popia Yehova Ukualohoka, Suku ya Isareli, ceci, hati, Tambula ovikanda evi viuvangi vioku landa epia, u wa yikiwa lu ka wa yikiwile, vi soleka vombia yotuma okuti vi kala osimbu.

¹⁵ Momo ca popia Yehova Ukualohoka, Suku ya Isareli, ceci, hati, Olonjo lovapia kuenda oviumbo viayuva vi landiwa vali vofeka yilo.

¹⁶ Eci nda eca ale ukanda wuvangi woku landa epia ku Baruki, omõla a Neriya, oco nda likutilila ku Yehova siti,

¹⁷ A Ñala Yehova! Ove wa lulika ilu kuenda ongongo lunene wove kuenda lokuokuo kuove kuolõha. Ka kuli eci ca tĩla okuti ove ku ci tẽla.

¹⁸ Ove o sole olohuluwa locisola ka ci pongoloka, puãi o fetuluinyĩla akandu a vasiavo komãla vavo. A Suku, ove vunene, haive Fũ, onduko yove Yehova Ukualohoka.

¹⁹ Kolondunge ove wa piãla, kovilinga ove ukuonene. Ovaso ove a lete olonjila viosi viomãla vomanu. Wecaeca komanu vosi, omunu omunu, eci ca soka lolonjila viaye leci ca soka lepako liovilinga viaye.

²⁰ Vofeka ye Egito wa lekisa olondimbukiso lovikomo ku va Isareli kuenda komanu vosi. Wa likokela onduko kuenje o kasi layo toke etali.

²¹ Wopa omanu vove va Isareli vofeka ye Egito lolondimbukiso lovikomo. Wa vopa leka Ha pama lokuokuo kuolõha kuenda usumba walua,

²² kuenje wa va iha ofeka yilo haiyo ofeka ya siata asenjele kuenda owiki. Wa va yiha ndeci wa likuminya lolosekulu viavo oku va iha.

²³ Yu va iñilamo kuenje ya linga yavo. Puãi ka va pokuile kondaka yove, ka va endelele vovihandeleko viove; cosi wa va tuma oku linga ovo ka va ci lingile. Oco wa va nenẽla ũvi u wosi.

²⁴ Tala, olondunda via pitila ale kimbo okuti li kuatiwa. Kuenje omo osipata, lefengi, kuenda onjala, ovio vialua, oco imbo li eciwa ku va Kaldea va kasi loku yaka lalio. Eci wa popia ca lingiwa, kuenje o ci lete.

²⁵ Haimo, a Nala Yehova, ove wa popia lame huti, Landa epia lolombongo, kuenje laleka olombangi,— ndaño imbo Ha eciwa ale ku va Kaldea.

²⁶ Ondaka ya Yehova yeya ku Yeremiya yiti,

²⁷ Tala, Ame ndi Yehova, ame ndi Suku yoviendalomuenyo viosi. Ku li nga cimue ca tĩla okuti ame si ci tẽla?

²⁸ Oco tala, ngeca imbo lilo peka lia va Kaldea kuenda peka lia Nevukandesa, Soma ya Bavulono, okuti o li kuata. Oco ca popia Yehova.

²⁹ Kuenje va Kaldea, ava va kasi loku yaka limbo lilo, veya va li temiha loku li yoka. Va yokavo olonjo vina kovailu avio va timãhãlako Baale insensu, haiko va pesila kolosuku vikuavo ovilumba vioku nyua oku ñokela onyeño.

³⁰ Momo va Isareli kuenda va Yuda, tunde kutila wavo, va linga ño-o lika evi vĩvi kovaso ange. Va Isareli va ñokela ño-o onyeño lupange wovaka avo. Oco ca popia Yehova.

³¹ Imbo lilo lia ñokela onyeño kuenda ekaka tunde keteke va li sovola toke ketali lilo. Oco ndi li upa kovaso ange,

³² omo evĩho liosi va Isareli kuenda va Yuda va linga oku ñokela onyeño lia lua enene. Ovo kuenda olosoma viavo lolombuale viavo lovitunda viavo lovaprofeto vavo kuenda alume va Yuda lolonungi viosi via Yerusalãi, vosi yavo, evĩho va linga lia lua enene.

³³ Va njimba onyima, ocipala hacoko. Ndaño nda pandikisa oku va longisa haimo ka va yevelele okuti va longiwa.

³⁴ Va kapa ovina viavo viumbondo vonjo ya tukuiwa londuko yange ha va yi vĩhĩsa.

³⁵ Va tungila Baale ovotala vekungu liomõla a Hinoma ha va lumbila Moleke omãla vavo valume lomãla vavo vakãi. Va linga ocina eci cumbondo haico ca lingisa Yuda ekandu. Va ci linga muẽle ndaño ame sia ci tumĩle, kuenje ocisimilo caco ka ca leya vutima wange.

³⁶ Oco cilo, oku tukula imbo lilo hailio ene vu li lombolola hoti, Li eciwa peka lia Soma ya Bavulono losipata, kuenda konjala lefengi, Yehova, Suku ya Isareli, wa popia hati,

³⁷ Tala, ndi vongolola kolofeka viosi oko nda va sanduilile eci nda temele loku va kuatela onyeño locikumbiti ca lua. Ndi va nena vali kocitumãlo cilo, ndi va tungisa ciwa kuenje va koka.

³⁸ Ovo va linga omanu vange, lame ndinga Suku yavo.

³⁹ Ndi va iha utima umuamue kuenda onjila yimuamue okuti va sumbila oloneke ka vi pui. Ndi ci lingila esumũlũho liavo leli liomãla vavo va va kuãi.

⁴⁰ Ndi lisila lavo ocisila ka ci pui cokuti si liweka oku va linga ciwa. Ñapa esumbilo liange vovitima viavo okuti ka va tundi vali kokuange.

⁴¹ Oku va linga ohenda ndi ku sanjukila. Ndi va tuamẽlisa vofeka yilo lutima wange wosi kuenda ongusu yange yosi.

⁴² Momo ca popia Yehova ceci, hati, Ndeci nda nenẽla omanu ava ũvi ulo walua haico ndi va nenẽla uwa wosi nda va likuminya.

⁴³ Ovapia a landiwa vofeka yilo vu kasi loku pembula, hoti, Ekalasoko, ka yi kuete omunu ndaño ocinyama, ya eciwa peka lia va Kaldea.

⁴⁴ Ovapia a landiwa lolombongo kuenje ovikanda viuvangi vioku landa ovapia vi sonehiwa loku yikiwa kovaso olombangi. Va ci linga vofeka ya Benjamini kuenda vikanjo via Yerusalãi lovovaimbo a Yuda kuenda vovaimbo ofeka yolomunda, lovovaimbo ovetapi, ndaño vovaimbo oko Sul. Momo ndi va tumbulula okuti va kala ciwa. Oco ca popia Yehova.