YEREMIYA 31 - Embimbiliya - Bíblia Sagrada em Umbundu

¹ Oco kotembo yaco ndinga Suku yapata osi a Isareli kuenje ovo va linga omanu vange. Oco ca popia Yehova.

² Ca popia Yehova ceci, hati, Omanu ava va puluka kosipata va sanga ohenda vekalasoko. Eci Isareli a yongola epuyuko,

³ oco Yehova wa limõlẽhisa kokuaye ndaño wa kala kupãla. Nda ku sola locisola ka ci pui, oco nda tongekela love lovilinga viocisola.

⁴ Hu tungisa vali, o tungiwa muẽle, amõla a Isareli ukãi. O patahãla vali okañoma kove. O tundila vali oku cĩla lava va sanjuka.

⁵ O tuika vali oviumbo viayuva kolomunda via Samária. Vakuakutuika va tuika kuenje va sanjukila epako liaco.

⁶ Momo kuiya eteke eci vakuakulavulula kolomunda via Efarimi va vilikiya vati, Votoki, tu londi ko Siono, ku Yehova Suku yetu.

⁷ Momo ca popia Yehova ceci, hati, Imbili Yakoba ovisungo viesanju. Uluili usongui wolofeka. Ci sapuli. Sivayi, hoti, Yehova wa popela omanu vaye, ocisupe ca Isareli.

⁸ Tala, ndi vopa kofeka yoko Norte, kuenje ndi vongolola tunde kasukiyo okilu lieve. Pokati kavo pa kala olomeke lovilema. Akãi olomisi kuenda ava va kasi loku cita veyilila kumuamue. Va tiuka owiñi wa lua.

⁹ Veya loku lila. Ndi va tiula loku va lembeleka. Ndi va vambisa kolondui viovava vonjila ya suñama omu ka va lipundukamo. Momo ame ndisia ya Isareli, kuenda Efarimi eye uveli wange.

¹⁰ Ene alofeka, yevi ondaka ya Yehova kuenje yi sapuli kolofeka viokokalunga vi kasi kupãla. Popi hoti, U wa sanduile Isareli haeye u wongolola, kuenje u lava ndeci ungombo a lava lava ocunda caye.

¹¹ Momo Yehova wa yovola Yakoba, wo yovola peka liu wo velapo kolohõlo.

¹² Veya ha va imbila ovisungo vomunda ya Siono. Veya loku yolela ovina viwa via Yehova, olomema lovinyu lulela, kuenda otumeme vocunda kuenda olonale. Omuenyo wavo u soka ndocumbo ca tapeliwa. Ka vowuka vali.

¹³ Oco afeko va sanjukila oku cĩla, lakuenje kuenda akulu va yolela. Momo oku lila kuavo ndu ku pongolola esanju. Ndi va lembeleka. Pesumuo liavo miñainyapo esanju.

¹⁴ Ñutisa ovitunda levi via lẽla, kuenje omanu vange ve kuta locisola cange. Oco ca popia Yehova.

¹⁵ Ca popia Yehova ceci, hati, Ondaka yoku lila loku lisiõsiõla ya yevalela vo Rama. Rahele o lila omãla vaye, ka tava oku lembiwa momo omãla vaye kavemo.

¹⁶ Ca popia Yehova ceci, hati, Kandangiya ondaka yove koku lila, kuenda ovaso ove kasuẽlẽla. Momo upange wove u kala lonima, kuenje va tiuka kofeka yovanyãli. Oco ca popia Yehova.

¹⁷ Kovaso wilila ku li elavoko, kuenda omãla vove veya vali kofeka yavo. Oco ca popia Yehova.

¹⁸ Nda yeva eci Efarimi a lila, hati, Ove wa njambula, kuenje nda yambuka ndonale ka ya pokuile. Niũle okuti numbuluka, momo ove vu Yehova Suku yange.

¹⁹ Umandekua wa ñokela oku litavela. Eci nda longisiwa oco nda liveta kevangovango. Nda kutiwa osõi, nda munĩhĩsua omo nda pia lovina nda linga kutĩla.—

²⁰ Efarimi hẽ, hamõlangeko wa soliwa? Hamõlako o sokoluiwa enene? Ndaño ndu pisa pisa haimo ndu wivaloka So. Oco utima wange wu kuetele ongeva, kuenje ndu linga ohenda. Oco ca popia Yehova.

²¹ Lisaikela onjila, likapela ovimãho. Limbuka ciwa elila okuti onjila wa endela. Amõla a Isareli ukãi, tiuka. Tiuka muẽle kovaimbo alo ove.

²² Amõla ukãi, okuakukonyõha, toke pi o tungayala? Momo Yehova wa sovuila kilu lieve cimue cokaliye; ukãi o vindikiya ulume.

²³ Ca popia Yehova Ukualohoka, Suku ya Isareli, ceci, hati, Eci ndi va tiula kumandekua wavo, oco vofeka ya Yuda kuenda vovaimbo ayo mu yevala vali olondaka evi, viti, Anjo yesunga, amunda yi kola! Yehova a ku sumuluise.

²⁴ Kuenje Yuda lovaimbo ayo osi va tungila kumuamue, ndaño olongunja la vakuakutata oviunda.

²⁵ Momo ñavuluisa utima wosi wa kava loku kutisa utima wosi wa sumua.

²⁶ Apa nda pasuka, kuenje nda patuluka, yu otulo tuange tua mepa.

²⁷ Yehova wa popia hati, Tala, oloneke viya okuti ñula pokati kepata lia Yuda leli lia Isareli ombuto yomanu leyi yovinyama.

²⁸ Kuenje ci kala okuti ndeci ale nda va vanja vanja okuti ndi va tukũla loku va teya, loku va papulula pamue oku va nyõla loku va talisa ohali, haico cilo ndi va vanja okuti va tunga kuenda va kũla. Oco ca popia Yehova.

²⁹ Koloneke viaco ka va popi vali vati, Akulu va lia ayuva a ngangama kuenje ovayo omãla a kuata uña.

³⁰ Puãi omunu omunu o fila ekandu liaye muẽle. Wosi o lia ayuva a ngangama ovayo aye muẽle a kuata uña.

³¹ Yehova wa linga hati, Tala, oloneke viya okuti ndi lisila ocisila cokaliye lonjo ya Isareli kuenda onjo ya Yuda.

³² Ocisila caco ka ci lisoki locisila nda lisilile lolosekulu viavo keteke nda va kuata peka loku vopa vofeka ye Egito. Ocisila caco va ci sina kuenje nda litepa lavo. Oco ca popia Yehova.

³³ Puãi ocisila ndi lisila lonjo ya Isareli koloneke viya ceci: Ñapa ovihandeleko viange volonũlo viavo. Ndi vi sonẽha vovitima viavo. Ame ndinga Suku yavo lovo va linga omanu vange.

³⁴ Kuenje ka va longisa vali, omunu u a lisungue laye, omunu u a lisungue laye, pamue omunu oku longisa manjaye, vati, Kũlĩha Yehova, momo vosi va ñulĩha tunde ku o sule pokati kavo toke ku unene. Momo ngecela evĩho liavo, lakandu avo si a ivaluka vali. Oco ca popia Yehova.

³⁵ U wa eca ekumbi ha li tuila kutanya, kuenda ovihandeleko viosi viosãi lolombungululu ha vi tuila kuteke, haeye o venja okalunga okuti akimba aco õla,— onduko yaye Yehova Ukualohoka. Ca popia Yehova ceci, hati,

³⁶ Nda ovihandeleko viaco vimũla kovaso ange, oco ombuto ya Isareli yimũha kovaso ange, kuenje ka yi lingi vali ofeka oloneke ka vi pui. Oco ca popia Yehova.

³⁷ Ca popia Yehova ceci, hati, Nda ci tava oku seteka ilu pamue oku kũlĩhĩsa oviseveto viongongo posi, ame nava oku takumuila Isareli ovina va ndinga. Oco ca popia Yehova.

³⁸ Yehova wa linga hati, Tala, oloneke viya okuti Yehova vo tungila ombala tunde kombonge ya Hananele toke kombundi yokevindi.

³⁹ Kuenje ukolo woku seteka ongave u miũha ño-o miũ toke kowulu Gareve, oko u ñualẽla toke ko Goa.

⁴⁰ Kuenje ekungu liosi liovivimbi latiko kuenda usenge wosi wokolui Kidirone toke kevindi liokombundi yotuvalu, kuosi ku linga ku kola ku Yehova. Ka ku tukũiwa, ka ku kupuiwa vali, oloneke ka vi pui.