YEREMIYA 30 - Embimbiliya - Bíblia Sagrada em Umbundu

¹ Ondaka ya tunda ku Yehova kuenje yeya ku Yeremiya yeyi, yiti,

² Ca Popia Yehova, Suku ya Isareli, ceci, hati, Sonẽha velivulu olondaka viosi nda popia love.

³ Momo tala, kuiya oloneke okuti numbulula omanu vange va Isareli kuenda va Yuda. Oco ca popia Yehova. Ndi va tiula kofeka nda eca kolosekulu viavo, kuenje yi linga yavo muẽle. Oco ca popia Yehova.

⁴ Olondaka via popia Yehova oku tukula Isareli kuenda Yuda vievi, hati,

⁵ Ca popia Yehova ceci, hati, Tua yeva uteto wocinjoko haiwo wusumba, hawombembuako.

⁶ Oco puli loku kũlĩhĩsa. Ulume nga o tẽla oku cita omõla? Nda hacoko ci kasi ndati okuti ndete alume vosi lovaka kolombunda ndeci ukãi a linga eci a kasi lolongembia? Ovipala viosi via pongolokela nye?

⁷ A mãi we, eteke liaco lia piãla, likuavo lia lisoka lalio ka ku li. Ku Yakoba li kala eteke liohali, haimo o popeliwa.

⁸ Yehova Ukualohoka wa popia hati, Keteke liaco neya omi yo kosingo yavo loku tepa ovikolo viavo. Vakualofeka ka va va vumbisa vali.

⁹ Puãi va vumba Yehova Suku yavo, kuenda Daviti Soma yavo, u ndi va katuila.

¹⁰ Yehova wa popia hati, A Yakoba, okuenje wange, ku ka kale lusumba. A Isareli, ku ka yokoke. Momo tala, ndaño o kasi kupãla haimo hu popela. Mopela ombuto yove kofeka yumandekua wavo. Yakoba o tiuka kuenje o kala ciwa, o tula utima. Lomue u lingisa usumba,

¹¹ momo ame ñasi lene oku vu popela. Sulisa olofeka viosi oko ndo sanduilili, ene puãi siu sulisi. Ndu yambuli ndeci co sesameli. Sikambi muẽle oku vu yambula. Oco ca popia Yehova.

¹² Momo ca popia Yehova ceci, hati, Apa wa litonyõla ka pa sakuiwa, lombole yove ya linga epute.

¹³ Ka ku li u o ku lembeleka. Ka ku li ovihemba viepute liove. Ove ku sakuiwa vali.

¹⁴ Vosi va ku solele va ku ivala, ka va ku pula pula vali. Omo evĩho liove lia lua kuenda akandu ove a lova, oco nda ku tota ombole ndunyãli kuenje nda ku yambula ndunyãli ka kuete ohenda.

¹⁵ O litetelela nye ombole yove? Olongembia viove ka vi sakuiwa. Omo evĩho liove lia lua kuenda akandu ove a lova, oco nda ku lingila ovina evi.

¹⁶ Oco vosi va ku lia va liwa. Ovanyali vove vosi, vosi muẽle, va enda umandekua. Ava va ku punda va pundiwa. Vosi va ku kuata ndi va eca koku kuatiwa.

¹⁷ Momo hu muĩsa vali uhayele, ha sakula olombole viove; momo va ku luka Citakafeka, vati, Eye Siono, lomue u kapako vali. Oco ca popia Yehova.

¹⁸ Ca popia Yehova ceci, hati, Numbulula vali olombalaka via Yakoba, kuenda ndinga olonjo viaye ohenda. Imbo li tungiwa kowulu walio, kuenje elombe li kala kuna lia kaile ale.

¹⁹ Kokuavio ku yevalela ovisungo violopandu, ku yevalelavo olondaka viava va sanjuka. Ndi va luisa kuenje ka va lingi vañamiñami. Ndi va kemalisa kuenje ka va kala va sule.

²⁰ Omãla vavo va kala ndeci va kaile kosiãhũlu, locisoko cavo ci tumalisua kovaso ange. Njambula vosi va va talisa ohali.

²¹ Usongui wavo o tunda muẽle pokati kavo. Ndaño ombiali yavo yi tunda pokati kavo. Ame muẽle ndu koka okuti iya ocipepi, o kokela muẽle ocipepi lame. Momo nda hacoko, elie o lukuta oku amẽla kokuange? Oco ca popia Yehova.

²² Kuenje vu linga omanu vange, lame ndinga Suku yene.

²³ Tala, ehunguhungu lia Yehova lia katuka! Onyeño ya tunda kuenje ya soka ndocipepe cakanyongo, yi wila kutue wondingaĩvi.

²⁴ Onyeño ya tokota ya Yehova ka yi tiukamo te wa linga loku tẽlisa ocipango cutima waye. Koloneke viesulilo cosi ci vu lomboloka ciwa.