YEREMIYA 29 - Embimbiliya - Bíblia Sagrada em Umbundu

¹ Uprofeto Yeremiya wa kala vo Yerusalãi. Wa tuma ukanda umue kakulu volomandekua kuenda kovitunda lokovaprofeto kuenda komanu vosi, ava Nevukandesa opa vo Yerusalãi oku va tuala umandekua ko Bavulono.

² Kotembo yaco Soma Yekoniya kuenda Inakulu, lakuenje velombe, kuenda olombuale via Yuda levi via Yerusalãi, kuenda olomesele, lovivinda, vosi va tundale vo Yerusalãi.

³ Ukanda waco wa tumiwa peka lia Elasa omõla a Siafane, kuenda Gemariya omõla a Hilikiya. Ovo muẽle Sedekiya, Soma ya Yuda, a tuma ko Bavulono, ku Nevukandesa, Soma ya Bavulono. Olondaka viukanda waco vievi, hati,

⁴ Ca popia Yehova Ukualohoka, Suku ya Isareli, ceci, hati, Alomandekua viosi, ene ndo wupi vo Yerusalãi oku vu tuala umandekua ko Bavulono,

⁵ ondaka yange kokuene yeyi, Tungi olonjo oco vu kalemo. Kũli oviumbo, li apako avio.

⁶ Kueli akãi ho citi omãla valume lomãla vakãi. Lombi akãi vomãla vene valume ha va citi omãla valume kuenda omãla vakãi. Eci omãla vene vakãi kalume ha va citi omãla valume kuenda omãla vakãi. Luiliko. Ko ka tepuluki.

⁷ Litumbiki oku kuatisa imbo oko ndo tumi umandekua. Li likutilili ku Yehova. Momo kesumũlũho lialio oko ene vu sanga esumũlũho.

⁸ Ca popia Yehova Ukualohoka, Suku ya Isareli, ceci, hati, Ovaprofeto kuenda vakuakutãha va kasi pokati kene ka va ko kembi. Ko ka tavi kolonjõi viavo va lota lota.

⁹ Momo evi vo sapuili vonduko yange ovitumasuku viesanda. Hameko nda va tuma. Oco ca popia Yehova.

¹⁰ Ca popia Yehova ceci, hati, Eci pa pita akui epanduvali kanyamo ko Bavulono oco ndu wivaluki. Nelisa ohuminyo yange yo kokuene. Ndu tiuli kocitumãlo cilo.

¹¹ Momo nda kũlĩha ovisimĩlo ñasi loku vu simĩla; ovisimĩlo viaco vioku u kuatisi, havioku-vu-lingako cĩvi, haivio vioku waveli elavoko lioloneke viya.

¹² Kotembo yaco vu mbilikiya; wiyi oku likutilila kokuange, kuenje ndu yevi.

¹³ Vu sanda kuenje vu sanga. Eci vu sanda lutima wene wosi,

¹⁴ oco ame sangiwa lene. Oco ca popia Yehova. Ndu tumbululi. Ndu wongololi kolofeka viosi kuenda kovitumãlo viosi oko ndo sanduilili. Ndu neni vali kocitumãlo oko ndo wupili oku vu tuma umandekua. Oco ca popia Yehova.

¹⁵ Omo wa lingi hoti, Yehova wa tu katuila ovaprofeto vo Bavulono,

¹⁶ oco, oku tukula osoma yi tumãla kocalo ca Daviti, kuenda omanu vosi va tunga vimbo lilo, okuti vakuẽlẽ ava ka va endele lene umandekua, Yehova wa popia hati,

¹⁷ Ca popia Yehova Ukualohoka ceci, hati, Tala ñasi loku tuma kokuavo osipata kuenda onjala lefengi. Ndi va sokisa lakuyu ãvi ãvi okuti ka a liwa.

¹⁸ Ndi va hanga losipata kuenda onjala lefengi. Ndi va lingisa vakualuhimo lu yokokisa olofeka viosi viokilu lieve. Va siñaliwa okuti va yokokisa kuosi. Va yoliwa epembe loku kutisua osõi lolofeka viosi oko nda va sanduila.

¹⁹ Yehova hati, Ndi ci lingila omo ka va tavele kolondaka viange evi nda tuma kokuavo lakuenje vange ovaprofeto. Nda pandikisa oku va tuma puãi ene ka wa taveli oku va yevelela. Oco ca popia Yehova.

²⁰ Yeveleli ondaka ya Yehova, ene alomandekua viosi ndopa vo Yerusalãi oku tuma lio Bavulono.

²¹ Oku tukula Ahava, omõla a Kolaya, kuenda Sedekiya, omõla a Maseiya, ava va popia lene vonduko yaye ocitumasuku cuhembi, Yehova Ukualohoka, Suku ya Isareli, wa popia hati, Ndi va eca peka lia Nevukandesa, Soma ya Bavulono. Eye o va ipaila kovaso ene.

²² Oco, mekonda liavo, olomandekua viosi via Yuda vi kasi vo Bavulono eci vi siñala vi linga viti, Yehova a linge love ndeci a linga la Sedekiya kuenda Ahava, ava Soma ya Bavulono a yoka londalu.

²³ Momo va lingila evĩho vo Isareli. Va pekelisa akãi vamãle. Va popela vonduko yange olondaka viuhembi, evi okuti hameko nda tuma oku vi popia. Ame muẽle nda ci kũlĩha, haime ndimbangi yaco. Oco ca popia Yehova.

²⁴ Eci o sapuila Siemiya u Nehelami ceci, o popia huti,

²⁵ Ca popia Yehova Ukualohoka, Suku ya Isareli, ceci, hati, Wa tuma ukanda vonduko yove muẽle kocitunda Sofoniya, omõla a Maseya, huti,

²⁶ Yehova wa ku kapa ocitunda komangu yocitunda Yehoyada, okuti vonjo ya Yehova ove o kala lomoko leyui liosi limba owanji, loku li kapa vukumbi kuenda vomi.

²⁷ Oco hẽ, nye kua lemẽlĩle Yeremiya u Anatoti u o kasi loku vu sapuila ovitumasuku?

²⁸ Momo eye wa tuma kokuetu ko Bavulono, hati, Umandekua u kala osimbu. Tungi olonjo oco vu kalemo. Kũli oviumbo, li ovaima avio.

²⁹ Ocitunda Sofoniya ca tangela uprofeto Yeremiya ukanda waco.

³⁰ Oco ondaka ya Yehova yeya ku Yeremiya, yiti,

³¹ Tuma kolomandekua viosi huti, Ca popia Yehova oku tukula Siemaya u Nehelami ceci, hati, Omo Siemaya wa popia lene ocitumasuku ndaño sio tumĩle, kuenje wo tavisi kuhembi,

³² oco tala, njambula Siemaya u Nehelami kuenda ombuto yaye. Eye ka kala la kapiñala o tunga pokati komanu ava. Ka mõli evi viwa ndingila omanu vange, momo wa longisa oku ñualelapo Yehova. Oco ca Popia Yehova.