YEREMIYA 28 - Embimbiliya - Bíblia Sagrada em Umbundu

¹ Oco kunyamo waco haiwo, kefetikilo liokuviala kua Sedekiya, Soma ya Yuda, kunyamo waco wa kuãla, kosãi ya tãlo, oco uprofeto Hananiya, omõla a Asure, u Giveone, wa popia lame vonjo ya Yehova, kovaso ovitunda lokovaso omanu vosi, hati,

² Ca popia Yehova Ukualohoka, Suku ya Isareli, ceci, hati, Nda teya omi ya Soma ya Bavulono.

³ Osimbu anyamo avali ka a puile ndi nena vocitumãlo cilo ovikuata viosi vionjo ya Yehova, vina Nevukandesa, Soma ya Bavulono, wopile vocitumãlo cilo, yu wa vi tumile ko Bavulono.

⁴ Kuenje Yekoniya, omõla a Yehoyakimi, Soma ya Yuda, ndu tiuwiya vali kocitumãlo cilo, kumue lolomandekua viosi via Yuda evi via enda ko Bavulono, momo neya omi ya Soma ya Bavulono. Oco ca popia Yehova.

⁵ Oco uprofeto Yeremiya wa popia luprofeto Hananiya kovaso ovitunda, kuenda kovaso omanu vosi va tãi vonjo ya Yehova.

⁶ Uprofeto Yeremiya wa linga hati, Amene! Yehova a ci linge. Yehova a lemulule olondaka viove evi wa popia ndocitumasuku, ope vo Bavulono ovikuata viosi vionjo ya Yehova kuenda olomandekua viosi, loku vi tiula vali vocitumãlo cilo.

⁷ Haimo ove, yevelela kondaka mopia love lomanu vosi.

⁸ Ovaprofeto vosiahũlu, vana va kala lomuenyo osimbu ove lame ka tua citiwile, ovo va lomboluila olofeka via lua kuenda ovosoma anene ovitumasuku viovita levi vionjala lefengi.

⁹ Eci uprofeto umue a imba owanji woku sapula ombembua oco uprofeto waco o limbukiwa ocili okuti Yehova wo tuma eci ondaka yuprofeto waco ya lingiwa.

¹⁰ Oco uprofeto Hananiya wopa omi kosingo yuprofeto Yeremiya kuenje wa yi teya.

¹¹ Kuenje Hananiya wa popela kovaso omanu vosi hati, Ca popia Yehova ceci, hati, Haico njupa omi ya Nevukandesa, Soma ya Bavulono, kosingo yolofeka viosi osimbu anyamo avali ka a puile. Uprofeto Yeremiya puãi wa enda ño lonjila yaye.

¹² Eci uprofeto Hananiya a ka teya omi kosingo yuprofeto Yeremiya oco ondaka ya Yehova yeya kuprofeto Yeremiya, yiti,

¹³ Kuende, ka sapuile Hananiya huti, Ca popia Yehova, ceci, hati, Ove wa teya omi yuti, puãi miñainyapo omi yutale.

¹⁴ Momo, ca popia Yehova Ukualohoka, Suku ya Isareli, ceci, hati, Nda imba omi yutale kosingo yolofeka evi viosi, okuti vi vumba Nevukandesa, Soma ya Bavulono. Viu vumba omo ndo wiha ndaño ovinyama viovusenge.

¹⁵ Kuenje uprofeto Yeremiya wa popia luprofeto Hananiya hati, A Hananiya, yevelela handi. Ha-Yehova-ko wa ku tuma. Ove muẽle wa liaña omanu ava okuti va kolela uhembi.

¹⁶ Oco, ca popia Yehova ceci, hati, Tala, hu tundisa kilu lieve. Ulima ulo muẽle o fa omo wa ñualelapo Yehova.

¹⁷ Oco uprofeto Hananiya, oku pitila kosãi yepanduvali, ulima waco muẽle, haico a fa.