YEREMIYA 27 - Embimbiliya - Bíblia Sagrada em Umbundu

¹ Kefetikilo liokuviala kua Sedekiya omõla a Yosiya, Soma ya Yuda, ondaka ya Yehova yeya ku Yeremiya, yiti,

² Ca popia lame Yehova ceci, hati, Liangiliyila omi lovikolo, vi imba posingo yove.

³ Kuenje tuma ondaka ku Soma ya Edome kuenda ku Soma ya Moavi loku Soma yomãla va Amone kuenda ku Soma ya Turo loku Soma ya Sidono. Vi eca povaka olomunga vieya ko Yerusalãi ku Sedekiya Soma ya Yuda.

⁴ Popia lavo huti, Eci vu sapuila vacime cene ceci, hoti, Ca popia Yehova Ukualohoka, Suku ya Isareli, ceci, hati, Eci vu popia lavacime cene ceci, hoti,

⁵ Ame nda sovola ongongo kuenda omanu lovinyama viosi vi kasi kilu lieve. Nda vi sovola longusu yange ya lua kuenda okuokuo kuange kuo olõha, kuenje ndi vi eca ku wosi ndimbuka okuti vio sungulukila.

⁶ Kaliye olofeka evi viosi nda vi eca kukuenje wange Nevukandesa, Soma ya Bavulono. Ndo wĩhavo ovinyama viosi viovusenge ha viu vumbi.

⁷ Kuenje olofeka viosi viu vumba, vi vumbavo omõlaye kuenda omõla omõlaye, toke eteke liofeka yaye liya. Eteke liaco eye o linga upika wolofeka via lua lolosoma vinene.

⁸ Puãi nda pa li ofeka yimue pamue usoma umue ko tava oku vumba Nevukandesa, Soma ya Bavulono, kuenda ko tava oku imba osingo komi ya Soma ya Bavulono, ofeka yaco ndi yi yambula losipata kuenda onjala lefengi toke nda va nyõla pe leka liaye. Oco ca popia Yehova.

⁹ Oco ene, ko ka tavi kovaprofeto vene, pamue ku vakuakutãha vene, pamue ku vakuakulota olonjoi, pamue ku vakuakusingila, pamue kovimbanda viene. Vosi va popia lene vati, Ko vumbi Soma ya Bavulono, ko ka va tavi.

¹⁰ Momo ovitumasuku va kasi oku vu sapuila viuhembi. Vupiwi muẽle vofeka yene loku tumiwa kupãla. Ame muẽle ndu tundisimo kuenje vu nyõlẽha.

¹¹ Puãi ofeka yosi yimba osingo yayo vomi ya Soma ya Bavulono kuenje yu vumba, ofeka yaco ndi yi sia. Omanu vaco va kala vofeka yavo, va lima kuenda va tunga. Oco ca Popia Yehova.

¹² Olondaka evi haivio nda popia la Sedekiya, Soma ya Yuda, siti, Imbi olosingo viene vomi ya Soma ya Bavulono, u vumbi kuenda vumbivo omanu vaye, oco vu kala lomuenyo.

¹³ Ove lomanu vove vu fila nye losipata kuenda onjala lefengi, ndeci Yehova a tukuila ofeka yosi ka yi tava oku vumba Soma ya Bavulono?

¹⁴ Ko ka tavi kolondaka viovaprofeto va popia lene vati, Ko ka vumbi Soma ya Bavulono, momo va popia lene ocitumasuku cuhembi.

¹⁵ Momo Yehova wa popia hati, Hameko nda va tuma, puãi va popia londuko yange ovitumasuku viesanda. Oco ndu tundisi kuenje vu nyolẽha, ene kuenda ovaprofeto vaco va popia lene ovitumasuku.

^16-17 Oco nda popia lovitunda kuenda lomanu ava vosi, siti, Ca popia Yehova ceci, hati, Ko ka tavi kolondaka viovaprofeto vene, ava va popia lene ovitumasuku, vati, Tala, ndopo ovikuata vionjo ya Yehova viupiwa ko Bavulono,— momo va popia lene ovitumasuku viesanda. Ko ka tavi kokuavo. Vumbi Soma ya Bavulono oco vu kala lomuenyo. Imbo lilo nye li lingila elunda?

¹⁸ Ovo, nda ovaprofeto vocili, kuenje nda ondaka ya Yehova yi kasi lavo, va pinge Yehova Ukualohoka okuti ovikuata via siala vonjo ya Yehova, kuenda vonjo ya Soma ya Yuda, kuenda vo Yerusalãi, ka vi endi ko Bavulono.

¹⁹ Momo Yehova Ukualohoka wa tukula olongunji kuenda okalunga lovotala kuenda ovikuata vikuavo via siala vimbo lilo,

²⁰ vina Nevukandesa, Soma ya Bavulono, kambatele eci opa vo Yerusalãi loku tuala kumandekua vo Bavulono Yekoniya, omõla a Yehoyakimi, Soma ya Yuda, lolombuale viosi via Yuda lolombuale via Yerusalãi.

²¹ Yehova Ukualohoka, Suku ya Isareli, wa tukula muẽle ovikuata viaco via siala vonjo ya Yehova kuenda vonjo ya Soma ya Yuda lovo Yerusalãi, hati,

²² Vi tualiwa ko Bavulono kuenje haiko vi kala toke eteke ndi vivaluka. Oco ndi vi upamo loku vi tiuwiya kocitumãlo cilo. Oco ca popia Yehova.