YEREMIYA 26 - Embimbiliya - Bíblia Sagrada em Umbundu

¹ Kefetikilo liokuviala kua Yehoyakimi, omõla a Yosiya, Soma ya Yuda, ondaka ya tunda ku Yehova yeyi, yiti,

² Ca popia Yehova ceci, hati, Talama vocitali conjo ya Yehova, popia lavakuavaimbo osi a va Yuda, ava veya oku fendela vonjo ya Yehova. Popia lavo olondaka viosi hu sapuila siti, Vi popia. Ku ka okololeko ndaño ondaka yimosi.

³ Mbi va yevelelako, kuenje vosi yavo omunu omunu o tinduka konjila yaye yĩvi, okuti ndi liweka kũvi nda simile oku va lingila ovilinga viavo vĩvi.

⁴ O popia lavo huti, Ca popia Yehova ceci, hati, Nda ka vu njevelela loku endaenda lovihandeleko viange vina ndo wĩhi,

⁵ loku yevelela kolondaka viakuenje vange ovaprofeto, vana nda tuma tuma kokuene lolupili ndaño ka wa va yeveli,

⁶ oco ndinga lonjo eyi ndeci nda linga la Silo. Limbo lilo ndi li linga esiñalo liolofeka viosi viokilu lieve.

⁷ Ovitunda lovaprofeto kuenda omanu vosi va yeva Yeremiya eci a popela olondaka evi vonjo ya Yehova.

⁸ Eci Yeremiya a mala oku popia ovina viosi Yehova o sapuila hati, Vi popia lomanu vosi, oco ovitunda kuenda ovaprofeto lomanu vosi vo kuata, yu va popia laye vati, Ove o fa!

⁹ Nye wa popela ocitumasuku vonduko ya Yehova huti, Onjo yilo yi linga nda Silo, kuenda imbo lilo li linga elunda, lomue o tungamo vali? Kuenje omanu vosi vongolokela Yeremiya vonjo ya Yehova.

¹⁰ Eci olombuale via Yuda via yeva ovina evi, via tunda vonjo yosoma yu via lamana konjo ya Yehova, kuenje via tumãla kombundi yepandavelo liokaliye lionjo ya Yehova.

¹¹ Oco ovitunda kuenda ovaprofeto va popia lolombuale kuenda lomanu vosi vati, Omunu u wa sesamẽla okufa, momo, ndeci wa yevi lovatuĩ ene muẽle, wa popela imbo lilo ocitumasuku coku li pisa.

¹² Yu Yeremiya wa popia lolombuale kuenda omanu vosi, hati, Yehova wa numa oku popela onjo yilo limbo lilo ocitumasuku colondaka viosi wa yevi haivio vioku pisa.

¹³ Oco kaliye, suñamisi olonjila viene loku sunguluisa ovilinga viene. Pokoli kondaka ya Yehova Suku yene, kuenje Yehova o liweka kũvi a sima oku vu linga.

¹⁴ Puãi tala, ame ñasi povaka ene. Lingi lame ndeci wa simi okuti oco ciwa haico ca sunguluka.

¹⁵ Puãi limbuki ocili eci cokuti, nda vu njipa, osonde ye lipua eko yu wili kuenda yi wila vimbo lilo lava va tungamo. Momo mopia ocili, Yehova muẽle wa numa kokuene oku vu sapuila olondaka evi viosi.

¹⁶ Oco olombuale kuenda omanu vosi va popia lovitunda kuenda lovaprofeto vati, Omunu u ka sesamẽlẽle okufa, momo wa tu popela vonduko ya Yehova Suku yetu.

¹⁷ Kuenje vamue kakulu vofeka va votoka yu va popia lohongele yomanu vati,

¹⁸ Mika u Morasiti wa popele ocitumasuku koloneke via Hesekiya, Soma ya Yuda, kuenje wa popia lomanu vosi va Yuda hati, Ca popia Yehova Ukualohoka ceci, hati, Siono yi limiwa ndepia; Yerusalãi yi linga ekundu, kuenda omunda yonembele yi linga ndonumbuko yovesisi.

¹⁹ Hesekiya, Soma ya Yuda hẽ, pamue va Yuda vosi hẽ, vo wipa? Eye ka sumbile hẽ Yehova; ka fendelele hẽ Yehova, Yehova he ka liwekele kũvi a simile oku va linga? Etu hẽ, tu wenguila ovimuenyo vietu eci cĩvi?

²⁰ Kua kala ukuavo wa popele ocitumasuku vonduko ya Yehova, eye Uriya, omõla a Semaya u Kiriati-yearimi. Eye wa imbile owanji woku pisa imbo lilo kuenda ofeka yilo. Wa popia olondaka via soka levi via Yeremiya.

²¹ Kuenje eci Soma Yehoyakimi lasualali vaye vosi kuenda olombuale viosi va yeva olondaka viaye, oco Soma wa sanda oku wipaya. Puãi eci Uriya a ci yeva, oco wa kuata usumba kuenje wa tila, wa enda ke Egito.

²² Oco Soma Yehoyakimi wa tuma omanu vamue ke Egito, wa tuma Elenatana omõla a Kivore, kuenda omanu vamue vakuavo va enda laye.

²³ Kuenje va kopile Uriya ve Egito, yu vo nena ku Soma Yehoyakimi. Eye wo wipa losipata kuenje wa inasi ocivimbi caye vovilangu viomanu vaño.

²⁴ Puãi eka lia Ahikama, omõla a Siafana, lia kala kumue la Yeremiya kuenje ka eciwile komanu ha vo wipa.