YEREMIYA 25 - Embimbiliya - Bíblia Sagrada em Umbundu

¹ Kunyamo wa kuãla wa Yehoyakimi, omõla a Yosiya, Soma ya Yuda, haiwo unyamo watete wa Nevukandesa, Soma ya Bavulono, oco ondaka yoku pisa omanu va Yuda yeya ku Yeremiya.

² Ondaka yaco uprofeto Yeremiya wa yi popia lomanu vosi va Yuda kuenda lolonungi via Yerusalãi viosi, hati,

³ Tunde kunyamo wekũi latatu wa Yosiya, omõla a Amone, Soma ya Yuda, toke ketali lilo ca tẽla akũi avali kanyamo kanyamo atatu apa ondaka ya Yehova yeyaiya kokuange. Lame muẽle nda yi popia popia lene lolupili, ene puãi ka wa taveli oku njevelela.

⁴ Kuenje ndaño Yehova wa tuma tuma kokuene akuenje vaye vosi okuti ovaprofeto, haimo ka wa yeveliko, ndaño oku kuluila ovatuĩ ene oku va yeva,

⁵ eci va popia vati, Vosi yene, omunu omunu a tinduke kolonjila viaye vĩvi lokovilinga viaye viakandu. Tungi vofeka yina Yehova a eca kokuene lokolosekulu viene tunde kosiãhũlu toke ka ku ci.

⁶ Ko ka sandi olosuku vikuavo oku vi vumba loku vi fendela. Ko ka nemisi lovilinga viovaka ene. Oco siu lingi cĩvi.

⁷ Haimo ka wa njeveleli, puãi wa nemisi lovilinga viovaka ene kuenje wa lilingi cĩvi ene muẽle. Oco ca popia Yehova.

⁸ Oco, ca popia Yehova Ukualohoka ceci, hati, Omo ka wa yeveli olondaka viange

⁹ oco numila apata osi oko Norte, kuenje mañinya ukuenje wange Nevukandesa, Soma ya Bavulono. Ndi va nenela oku yakisa ofeka yilo lolonungi viayo, kuenda olofeka viosi vi lisungue layo. Ndi vi nyõla pe. Ndi vi lingisa vakualuhimo lu yokokisa. Ndi vi yolisa epembe loku vi kutisa osõi ka yi pui. Oco ca popia Yehova.

¹⁰ Kuenda vali ndi vi upa ondaka yesanju leyi yonjolela. Njupavo ondaka ya Sandombua leyi ya Ndombua, kuenda ocinyi condiyelo. Njupavo ocileñi colombambo vioku silila.

¹¹ Ofeka yilo yosi yi kunduka, yi linga ekalasoko, kuenje omanu vaco va vumba Soma ya Bavulono akũi epanduvali kanyamo.

¹² Eci akũi epanduvali kanyamo a pita oco njambula Soma ya Bavulono kuenda ofeka yaco okuti ofeka ya va Kaldea. Ndi vi yambuila olohõle viavo. Lofeka yaco ndi yi lingisa ekalasoko ka li pui. Oco ca popia Yehova.

¹³ Nena kofeka yaco olondaka viosi nda vi yi tukuila, ndaño olondaka viosi via sonẽhĩwa velivulu eli, evi Yeremiya a tukuila olofeka viosi.

¹⁴ Momo olofeka via lua kuenda olosoma vinene vi lingisa apika omanu vaco. Kuenje ndi va muĩsa onima yovilinga viavo leyi yupange wovaka avo.

^15-16 Momo, ca popia lame Yehova, Suku ya va Isareli, ceci, hati, Tambula peka liange okopo eyi yovinyu vionyeño, kuenje nyuisa olofeka viosi oko hu tuma. Vi nyuako loku yengenga, kuenje vi linga ayui omo nda tuma osipata pokati kavio.

¹⁷ Oco nda tambula okopo peka lia Yehova kuenje nda nyuisa olofeka viosi oko Yehova a numa oku nyuisa;

¹⁸ okuti, ko Yerusalãi kuenda kovaimbo osi oko Yuda, lokolosoma lolombuale viaco, si vi kundula loku vi lingisa ekalasoko okuti vi yoliwa epembe loku siñaliwa ndeci ci kasi etali;

¹⁹ Fareo Soma ye Egito, kuenda akuenje vaye, lolombuale viaye, kuenda omanu vange;

^20-22 kuenda omanu vosi vañi vañi va kasi pokati kavo; kuenda olosoma viosi via Usi lolosoma viosi via va Filisiti,— ka Asikelone, ko Gasa, kuenda ke Ekerone, kuenda ocisupe ca Asitote, ke Edome, loko Moavi, kuenda omãla va Amone; olosoma viosi vioko Turo, lolosoma viosi via Sidono kuenda olosoma violofeka viokesinya liokalunga;

²³ kuenda ko Dedani lo ko Tema, kuenda ko Boasi, kuenda vosi va kasi lesinga lia tetiwa;

²⁴ kuenda olosoma viosi via Arabia, lolosoma viosi viomanu vañi vañi va tunga vekango;

²⁵ kuenda olosoma viosi via Simiri, lolosoma viosi vie Elami, kuenda olosoma viosi via va Media;

²⁶ kuenda olosoma viosi vioko Norte, evi viocipepi levi viocipãla, umue lukuavo umue lukuavo, kuenda ovosoma osi oluali a kasi kilu lieve. Kuenda osoma yoko Bavulono eye o sulako oku nyua.

²⁷ Kuenje o popia lavo huti, Ca popia Yehova Ukualohoka, Suku ya Isareli, ceci, hati, Nyui, kolui, sanji. Kupuki kuenje ko ka pinduki vali, omo nda tuma pokati kene osipata.

²⁸ Nda ka va tava oku tambula okopo peka liove loku nyua, oco o popia lavo huti, Ca popia Yehova Ukualohoka ceci, hati, Nyui muẽle!

²⁹ Momo, tala oku linga cĩvi fetikila kimbo lia tukuiwa londuko yange. Oco hẽ, ene ka vu yambuiwa? Ko pumbi oku yambuiwa, momo ñasi loku pañinya osipata ha yipãla olonungi viosi viokilu lieve. Oco ca popia Yehova Ukualohoka.

³⁰ Oco ove o va pisa lolondaka evi viosi. Oco popia lavo huti, Yehova kilu o kumba kumba, haiko a tumãla kocitumãlo caye ci kola loku popia ondaka yaye. O kumbila ocunda caye. Ndeci ava va kosa ayuva va kaloka, haico eye a kalukila olonungi viosi viokilu lieve.

³¹ Onjuela yaco yi pitila toke kasulilo oluali momo Yehova o kuete ondaka lolofeka. O yalela ekanga vosi vakuasitu kuenje vakuevĩho vosi o va eca kosipata. Oco ca popia Yehova.

³² Ca popia Yehova Ukualohoka ceci, hati, Tala evĩho li kasi loku sambuka tunde kofeka toke kofeka, kuenje ehunguhungu linene li kasi loku katuiwa kasulilo okilu lieve.

³³ Kuenje keteke liaco ava va ipaiwa la Yehova va kala tunde kesulilo liokilu lieve, toke kesulilo likuavo liokilu lieve. Ka va liliwa ndaño oku ongoluiwa loku kendiwa, va kala kongongo ndaniña.

³⁴ Ene angombo, lili loku lisiõsiõla, lene asongui vocunda, tiñolõhi vetiko. Momo oloneke viene vioku pondiwa loku sanduiwa vieya, kuenje vu kupuka ndovitupi via nõlĩwa.

³⁵ Ovangombo ka va mõli vali evelo lioku tila pamue ovasongui eli lioku puluka.

³⁶ Yeveleli ondaka yokuliyula kuovangombo leyi yokulisiõsiõla kuovasongui vocunda. Momo Yehova o kasi loku nyõla ovisenge viulisilo wavo.

³⁷ Loviunda via kaile ciwa vi kasi loku nyõleha lonyeño ya kãla ya Yehova.

³⁸ Olohosi via tunda vovilala viavio momo ofeka yavio ya nyõlẽha. Momo Yehova wa tuma pokati kavo osipata kuenje wa va temela ca lua.