YEREMIYA 24 - Embimbiliya - Bíblia Sagrada em Umbundu

¹ Eci Nevukandesa, Soma ya Bavulono, a kuata Yekoniya, omõla a Yehoyakimi, Soma ya Yuda, kuenda olombuale via Yuda lolomesele lovivinda vio vo Yerusalãi kuenje wa va tuala ko Bavulono, oco Yehova wa ndekisa ocinjoinjoi eci. Nda mõla ovihamba vivali viakuyu via kapiwa kovaso yonembele ya Yehova.

² Uhamba umue wa kala lakuyu awa, ndakuyu a livanga oku pia; kuenda uhamba ukuavo wa kala lakuyu ãvi ãvi ka a tava oku liwa omo ãvi enene.

³ Oco Yehova wa mula hati, A Yeremiya, o lete nye? Nda kumbulula siti, Ndete akuyu, akuyu awa, awa muẽle; kuenda a ãvi, ãvi muẽle, okuti ka a tava oku liwa momo ãvi enene.

⁴ Oco ondaka ya Yehova yeya kokuange yiti,

⁵ Ca popia Yehova, Suku ya va Isareli, ceci, hati, Ndeci mbanja akuyu a awa loku a sanjukila haico mbanja va Yuda va enda umandekua, vana ndopa mũlo loku va tuma kofeka ya va Kaldea.

⁶ Ndi va vanja loku va sanjukila. Ndi va nena vali vofeka yilo. Ndi va tungisa, kuenje si va tungulula vali. Ndi va tuika, kuenje si va tukũla vali,

⁷ Ndi va ĩha utima woku ndimbuka okuti ame ndi Yehova; oco va linga omanu vange, kuenje ame ndinga Suku yavo, momo va tiuka kokuange lutima wavo wosi.

⁸ Puãi ndeci mbanja akuyu ãvi ãvi, okuti ka a tava oku liwa, haico mbanja Sedekiya, Soma ya Yuda, kumue lolombuale viaye, kuenda ocisupe ca va Yerusalãi ca siala vofeka yilo, kuenda ava va tunga ve Egito.

⁹ Ndi va lingisa vakualuhimo lu yokokisa ovosoma osi okilu lieve, okuti va pembuiwa, va sepuiwa, va linga ongombe yomãla kuenje va siñaliwa volofeka viosi omu ndi va sanduila.

¹⁰ Ndi tuma pokati kavo osipata lonjala kuenda efengi toke va pua vofeka nda eca kokuavo kuenda kolosekulu viavo.