YEREMIYA 23 - Embimbiliya - Bíblia Sagrada em Umbundu

¹ Yehova hati, Ovangombo va nyola loku sandula olomeme viovililo viange, ngongo yavo.

² Oco Yehova, Suku ya va Isareli, oku tukula angombo va tata omanu vange, wa popia hati, Wa sanduli olomeme viange, wa vi tilisi, kuenje ka wa vi tateli. Tala! Ndu yambuili evĩho liene.

³ Kuenje ngongolola ocisupe colomeme viange kolofeka viosi oko nda vi sanduilile. Ndi vi nena vali vocunda cavio, kuenje vi licita loku lua.

⁴ Ndi vi kapa ovangombo va vi lisa, kuenje ka vi kala vali lusumba, ka vi saluka, ka pa kambi vali yimue. Oco ca popia Yehova.

⁵ Yehova hati, Tala. Oloneke viya okuti njovisila Daviti ocinjovelela cesunga kuenje eye o viala ndosoma, o linga lolondunge, kuenje vofeka o tetuluila lesunga kuenda lesunguluko.

⁶ Koloneke viaye Yuda yi popeliwa, kuenje Isareli yi koka. Kuenje onduko a tukuiwa layo yeyi, Yehova-eyeesunga-lietu.

⁷ Yehova hati, Tala, oloneke viya okuti ka va popi vali vati, Ndeci Yehova a kasi lomuenyo, u wopa omãla va Isareli ve Egito,

⁸ puãi va linga vati, Ndeci Yehova a kasi lomuenyo, u wopa omãla va Isareli vofeka yoko Norte lovolofeka viosi oko a va sanduilile, haeye wa va songuila. Yu va tunga vofeka yavo muẽle.

⁹ Owanji wa imbiwila ovaprofeto wowu, Utima wange wa teka, akepa ange osi a luluma. Ñasi ndomunu wa kolua, pamue ndomunu wa laliwa lovinyu, omo ñasi kovaso a Yehova kuenda kovaso olondaka viaye vi kola.

¹⁰ Momo ofeka ye yuka vakahonga; ofeka yi lila omo ya siñaliwa. Ovililo viovekalasoko via kukuta. Onjila yavo yĩvi, lunene wavo hawesungako.

¹¹ Uprofeto kuenda ocitunda, vosi yavo va vĩha; ndaño vonjo yange nda sangamo evĩho liavo. Oco ca popia Yehova.

¹² Oco onjila yavo kokuavo yi soka ndolonjila via sielena vowelema, haimo va lupuisilua kuenje va likasulapo. Momo ndi va nenẽla cĩvi kunyamo weyambulo liavo. Oco ca popia Yehova.

¹³ Kovaprofeto voko Samária oko nda muĩla cimue cĩvi cokuti, va linga ovaprofeto va Baale, kuenje va pambuisa omanu vange va Isareli vonjila.

¹⁴ Puãi kovaprofeto va Yerusalãi oko nda muĩla cimue ca vĩha vali enene, cokuti, va pekelaisa, va kemba kemba, va linga onyima yolondingaĩvi okuti lomue o tinduka kevĩho liaye. Vosi yavo kokuange va lisoka la va Sodoma. Olonungi viosi via Yerusalãi via lisoka levi via Gomora.

¹⁵ Oco, ca popia Yehova oku pisa ovaprofeto, ceci, hati, Tala, ndi va lisa ondulu, ndi va nyuisa ovava a kuete ondulu yepanda. Momo kovaprofeto voko Yerusalãi oko kua tunda evĩho lia enda kofeka yosi.

¹⁶ Ca popia Yehova Ukualohoka ceci, hati, Ko ka yeveleli kolondaka ovaprofeto vo sapuili; momo vo wihi elavoko liesanda; va popia evi vi tunda kovitima viavo muẽle, evi vi tunda vomẽla wa Yehova havioko.

¹⁷ Va sapowaila ava va sepula ondaka ya Yehova, vati, Ci kala ciwa lene, lava va enda lovipango viovitima viavo va va sapuila vati, Lacimue cĩvi cu sangi.

¹⁸ Helie pokati kavo wa tumãla vonjango ya Yehova ha yevi loku limbuka ondaka yaye? Helie wa yeva ondaka yaye okuti yo lomboloka ocili?

¹⁹ Tala, ekungukungu lia Yehova lia katuka. Onyeño ya tunda kuenje ya soka ndocipepe cakanyongo; yi wila kutue wondingaĩvi.

²⁰ Onyeño ya Yehova ka yi tiukamo te wa linga loku telisa ocipango cutima waye. Koloneke viesulilo cosi ci vu lomboloka ciwa.

²¹ Hameko nda tuma ovaprofeto haimo va lupuka. Hameko nda popia lavo haimo va imba owanji.

²² Puãi nda va tumãlẽle vonjango yange, oco nda va yevisile omanu vange olondaka viange, kuenje nda va va tiuwile kolonjila viavo vĩvi, kuenda kevĩho liovilinga viavo.

²³ Ca popia Yehova ceci, hati, Ame nga ndi Suku yocipepi, si Suku yocipãlãko?

²⁴ Omunu o tẽla oku salama kumue okuti siu moli? Oco ca popia Yehova. Si yukisa hẽ ovailu longongo? Oco ca popia Yehova.

²⁵ Nda yeva eci ca popia ovaprofeto ava va sapula uhembi londuko yange, vati, Nda lota onjoi, nda lota onjoi!

²⁶ Uhembi u kasi vovitima viovaprofeto vesanda u sulila pi? Va imbaimba owanji welimbi liovovitima viavo.

²⁷ Lolonjoi viavo va vi lisapowaila va soka oku ivalisa omanu vange onduko yange, ndeci olosekulu viavo via ivalele onduko yange yu va tava ku Baale.

²⁸ Uprofeto wa lota onjoi a sapule onjoi; puãi u o kuete ondaka yange a sapule ondaka yange locili. Yehova wa pula hati, Owangu wa lisoka ndati lotiliku?

²⁹ Yehova wa pula hati, Ondaka yange hẽ ka ya sokele londalu pamue ndomalatelo yi sasõla ewe?

³⁰ Oco, tala, namãlãla lovaprofeto va iva olondaka viange, uprofeto kuprofeto ukuavo, uprofeto kuprofeto ukuavo. Oco ca popia Yehova.

³¹ Tala, namãlãla lovaprofeto va popia lalimi avo muẽle kuenje vati, Yehova wa ci popia. Oco ca popia Yehova.

³² Namãlãla muẽle lava va sapola olonjoi viuhembi, kuenje va kembisa omanu vange luhembi wavo letutu liavo liesanda, osimbu hameko nda va tuma, hameko nda va ĩha ocikundi caco. Oco ca popia Yehova. Oco ka va kuatisa omanu ava ndaño naito. Oco ca popia Yehova.

³³ Eci umue pokati komanu ava, pamue uprofeto umue, pamue ocitunda cimue, a ku pula, hati, Ocilemo ca Ñala oco nye?— ove u kumbulula, huti, Ñala hati, Ene muẽle ucilemo caco kuenje ndu winasi.

³⁴ Kuenda vali, nda umue o popia hati, Ocilemo ca Ñala,— omunu waco ndu yambula muẽle kumue lepata liaye, ci kale uprofeto, ci kale ocitunda, ci kale umue pokati komanu.

³⁵ Oco vosi, ci kale omunu lu a lisungue laye, ci kale omunu la manjaye, eci vu lipula pokati, vu lipula hoti, Ñala wa kumbulula ndati?— pamue, Ñala wa popia ondaka ye?

³⁶ Puãi oku tukula vali, hoti, Ocilemo ca Ñala,— oco ka ci tava. Momo Suku Ukuamuenyo haeye Ñala yolohoka Suku yetu, ocilemo caye upopi womanu omunu omunu. Kuenje upopi wene u pengisa olondaka viaye.

³⁷ Oco vu pula uprofeto hoti, Ñala wa ku kumbulula ndati? —pamue hoti, Ñala wa popia ondaka ye?

³⁸ Puãi nda vu popia hoti, Ocilemo ca Ñala,— oco, omo wa popi olondaka viaco viokuti, Ocilemo ca Ñala, osimbu ame nda handeleka siti, Ka ci tava oku popia hoti, Ocilemo ca Ñala,—

³⁹ oco, tala, ndu tikuli muẽle loku winasi okuti vu tunda kokuange, ene kumosi limbo nda eca kokuene lolosekulu viene.

⁴⁰ Kuenje ndu yolisi epembe ka li pui loku u kutisi osõi ka yi pui haiyo ka yivaliwa vali. Oco ca popia Yehova.