YEREMIYA 22 - Embimbiliya - Bíblia Sagrada em Umbundu

¹ Ca popia Yehova, ceci, hati, Lokila konjo ya Soma ya Yuda, oko o ka popela ondaka eyi,

² huti, A Soma ya Yuda, ove wa tumãla kocalo ca Daviti, ove muẽle kuenda akuenje vove lomanu va iñailãila volombundi evi, vosi yene, yevi ondaka ya Yehova.

³ Ca popia Yehova ceci, hati, Lingi esunga kuenda esunguluko. Popeli u wa pundiwa peka liondiandia. Ko ka lingi cimue cĩvi. Ko ka kangisi ocingendaende pamue osiwe pamue ocimbumba. Ko ka pesili mũlo osonde ye lipua eko.

⁴ Omo, nda vu pokola kondaka eyi, volombundi vionjo yilo mu iñilila olosoma vi tumãla kocalo ca Daviti. Vi endela vakãlu kuenda kotuvalu, ovo muẽle kuenda akuenje vavo lomanu vavo.

⁵ Puãi nda ka vu pokola kolondaka evi, ndi lisila ame muẽle siti, Onjo yilo yi linga ocimbulumbumba. Oco ca popia Yehova.

⁶ Momo ca popia Yehova oku tukula epata lia Soma ya Yuda, ceci, hati, Ove kokuange wa soka nda Gileada, pamue ndonumbuko ya Levanone, haimo hu lingisa ekalasoko, hu lingisa muẽle elunda.

⁷ Hu nenẽla vakuakunyõla, vosi veya lovimãleho viavo. Va timbula ovinendele viove via velapo kuenje va vi imba vondalu.

⁸ Vakualofeka via lua va vinjuka kimbo lilo kuenje va popia vosi, omunu lu a lisungue laye, omunu lu o lisungue laye, vati, Yehova wa ci lingila nye imbo eli linene?

⁹ Oco va kumbulula vati, Momo va yanduluka ocisila va lisila la Yehova Suku yavo, yu va fendela olosuku viñi loku vi vumba.

¹⁰ Ko ka lili u wa fa, ko ko sinumũli; puãi u o tunda eye u lili, momo ka tiuka vali, ka mõli vali ofeka yavo yucitilo.

¹¹ Momo, oku tukula Sialume, omõla a Yosiya, osoma ya Yuda, u wa vialele komangu ya Yosiya isiaye, haeye wa tunda vocitumãlo cilo, Yehova wa popia hati, Eye ka tiuka vali;

¹² puãi oko vo tuala ohuate oko a fila, kuenje ka mõli vali ofeka yilo.

¹³ U o tunga onjo yaye lekandu, ngongo yaye! ndaño u o tunga olosapalalo viaye leviho! U o talavayisa u a lisungue laye ocali, kuenje ko wiha ofeto, ngongo yaye!

¹⁴ O linga hati, Ndi litungila onjo ya sanjavala lolosapalalo vinene. Ñapamo olonjanela. Ndi yi posuisa lavaya ovinendele. Ndi yi sieketa evala li kusuka.

¹⁵ Ove nga wa sima huti, Mbiala, omo wa piãla kavaya ovinendele? So hẽ ka lile lile, ka nyuile nyuile, kuenje ka lingaile esunga lesunguluko? Kuenje ca kala ciwa laye.

¹⁶ Eye wa tetulula ondaka yohukũi leyi yosuke, kuenje ca kala ciwa. Yehova hati, Eci hẽ haku ñulĩhako?

¹⁷ Puãi ovaso ove kuenda utima wove vi lete lika ovipako vioku limuisila leliaño, kuenda oku pesela osonde yava ve lipua, loku talisa ohali kuenda oku kangisa.

¹⁸ Oco, ca popia Yehova oku tukula Yehoyakimi, omõla a Yosiya Soma ya Yuda, ceci, hati, Ka vo lisila loku popia vati, A kota, we! pamue, a manjetu we! Ka vo sinumuĩla vati, A Ñala we, pamue, uwale waye we!

¹⁹ Eye o kendiwa ndeci va kenda ocimbulu. O kokiwa ño kuenje inasiwa kupãla lolombundi via Yerusalãi.

²⁰ Lamanẽla ko Levanone, ka liyule. Ka kalukile ondaka yove vo Basiyane. Ka lisiõsuile vo Avarimi. Momo vosi va ku sole va nyõlẽha.

²¹ Nda popia love osimbu wa kala ciwa, puãi ove huti, Si ku yevi. Eci oco ocituwa cove tunde kutila wove, okuti kua tavele kondaka yange.

²² Ofela yi lisa ovangombo vove vosi, kuenje ava va ku sole va enda umandekua. Oco o kutisiwa osõi kuenje o munihisiwila evĩho liove liosi.

²³ Anungi yo vo Levanone, haive wa tungila ocanju cove pokati kovinendele. Okuleñaleña kuove keteke liolongembia viove ku piãla enene. Olongembia viaco vi soka levi viukãi o cita.

²⁴ Yehova wa linga hati, Ndeci ñasi lomuenyo, Koniya, omõla a Yehoyakimi, Soma ya Yuda, ndaño wa kala onela keka liange liondio, haimo nda nda ku fuomõla

²⁵ loku ku eca povaka ava va sanda omuenyo wove, okuti povaka ava o kuetele usumba, ndaño peka lia Nevukandesa, Soma ya Bavulono, kuenda povaka a va Kaldea.

²⁶ Ove, kuenda nyõho wa ku cita, ndu winasi vofeka yiñi omo ka wa citiwilili, kuenje omo vu ka fila.

²⁷ Puãi ka va tiukila vali kofeka oko va livela oku tiukila.

²⁸ Omunu u Koniya hẽ, eye ombia ya pembuiwa haiyo ya fa? Eye nga ocikuata ka ci kuete u o ci sole? Eye muẽle kuenda ombuto yaye nye va tundisiwila? Va inasiwilila nye vofeka ka va kũlĩhĩle?

²⁹ Afeka, afeka, afeka, yevelela ondaka ya Yehova!

³⁰ Ca popia Yehova ceci, hati, Sonẽha omunu u okuti osĩsu, haeye omunu ka kala ciwa voloneke viaye. Momo lomue kombuto yaye o tumãla vali kocalo ca Daviti, pamue oku viala vali vo Yuda.