YEREMIYA 21 - Embimbiliya - Bíblia Sagrada em Umbundu

¹ Ondaka ya Yehova yeya ku Yeremiya eci Soma Sedekiya a tuma kokuaye Pasihuri, omõla a Malikiya, kuenda Sofoniya omõla a Mahiseya, haeye ocitunda, hati,

² Tu pulile ku Yehova, momo Nevukandesa, Soma ya Bavulono, wa tu katuila ovita. Mbi Yehova o linga letu eci ca soka lovikomo viaye kuenje o wupa kokuetu.

^3-4 Oco Yeremiya wa popia lavo hati, Eci vu sapuila Sedekiya ceci, hoti, Ca popia Yehova, Suku ya va Isareli, ceci, hati, Tala, ame muẽle mongolola ovimãlẽho viovita vi kasi povaka ene vioku yaka la Soma ya Bavulono kuenda va Kaldea va ñuala ovimbaka viene ocingonja. Ndi vi ongoluila vimbo eli.

⁵ Ame muẽle ndi yaka lene lokuokuo kua pama leka liolõha. Ndi yaka lonyeño lekaka locikumbiti ca lua.

⁶ Ñundula olonungi vio vimbo lilo, omanu kuenda ovinyama. Va fa lefengi lia lua.

⁷ Yehova wa popia vali hati, Oco noke Sedekiya, Soma ya Yuda, kuenda akuenje vaye lomanu vosi vo vimbo, ava va supa kefengi kuenda kosipata lo konjala, ndi va eca peka lia Nevukandesa, Soma ya Bavulono. Ndi va eca muẽle povaka ovanyãli vavo, okuti povaka ava va sanda ovimuenyo viavo. Eye o va veta lomẽla wosipata, ka va kuatela ocikembe kuenje ka va supisapo, ndaño ohenda ka va yi lingi.

⁸ Popia lomanu vaco huti, Ca popia Yehova ceci, hati, Tala! Ndo kapeli onjila yomuenyo kuenda onjila yokufa.

⁹ U o siala vimbo lilo o fa losipata lonjala kuenda efengi. Puãi u o tunda kuenje enda ku va Kaldea, ava vo ñuali ocingonja, eye o kala lomuenyo, kuenje omuenyo waye o kala lawo ndohuate yovita.

¹⁰ Momo nda pongiyila imbo lilo ũvi, uwa hawoko. Oco ca popia Yehova. Li eciwa peka lia Soma ya Bavulono kuenje eye o li yoka londalu.

¹¹ Popia lepata liosoma ya Yuda huti, Yevi ondaka ya Yehova.

¹² Ca popia Yehova ceci, hati, Apata lia Daviti, omẽle komẽle tetulula lesunga. Popela u wa pundiwa peka liondiandia, sanga onyeño yange yi tunda ndondalu kuenje yi taima okuti lomue o yi ima, momo ovilinga viene vĩvi.

¹³ Yehova wa popia hati, Anungi yovomaka, tala, nda ku wengukila. Awe liovetapi! Ene vu popia popia hoti, Helie o tẽla oku tu katukila?— pamue hoti, Helie o tela oku iñila volonjo vietu?—

¹⁴ Yehova wa popia hati, Ndu yambuli eci ca soka lovilinga viene. Siakãla ondalu vusitu waye kuenje yi lia cosi co ñuala.