YEREMIYA 20 - Embimbiliya - Bíblia Sagrada em Umbundu

¹ Kaliye ocitunda Pasihuri, omõla a Imeri, haeye kalei konjo ya Yehova, wa yeva Yeremiya eci a imba owanji wovina evi.

² Oco Pasihuri wa veta uprofeto Yeremiya kuenje wo valela vovikumbi vi kasi vombundi ya Benjamini yokonano, haiyo yovonjo ya Yehova.

³ Oco omele yaco, eci Pasihuri opa Yeremiya vovikumbi, oco Yeremiya wa popia laye hati, Yehova ka ku tukula vali Pasihuri, puãi wa ku tukula Ciyokokisa.

⁴ Momo, ca popia Yehova ceci, hati, Tala, hu lingisa ukuakuyokokisa, okuti o liyokokisa ove muẽle, haive o yokokisavo akamba vove vosi. Va kupuka losipata yovanyãli vavo, love muẽle o ci limuila lovaso ove. Ngeca Yuda yosi ku Soma ya Bavulono, eye o va tuala ko Bavulono olomandekua, kuenje o va ipa losipata.

⁵ Wa linga vali hati, Ukuasi wosi wimbo lilo, kuenda ufũlo walio wosi, kuenda ovikuata viaco via tĩla, lovipako viosi violosoma via Yuda, ndi vi eca povaka ovanyali vavo haivo va vi punda, kuenje va vi tambula loku vi tuala ko Bavulono.

⁶ Kuenje ove, a Pasihuri, lava vosi va kasi vonjo yove, wendi umandekua, wendi muẽle toke ko Bavulono; oko vu ka fila, haiko vu ka kendiwila, ove kuenda akamba vove osi, ava wa imbila owanji wuhembi.

⁷ A Yehova, ove wa ñembisa yu nda kembisua. Ove wa velapo kongusu, ame sule, kuenje ove wa yula. Eteke liosi nda yoliwa epembe, vosi va nondalaño.

⁸ Momo olonjanja viosi eci mopia, mbilikiya lolukandi siti, Okupundiwa kuiya! Okunyolẽha kuoku! Kuenje ondaka ya Yehova ya ñokela oku pembuiwa loku tondaliwa eteke liosi.

⁹ Nda ndinga siti, Siu tukula vali. Si imbi vali owanji vonduko yaye,— oco vutima wange mu kala ca soka ndondalu yi taima ya yikiwila vakepa ange. Nda kava loku likandangiya oku ci sapula. Oku cuhila vali si ci tẽla.

¹⁰ Njevite okuloñola kua lua. Kolonẽle viosi ku li eci ci lingisa usumba. Akamba vange vosi vati, U sokoli, letu tu u sokolavo!— Va ndavulula nda he ñupuka, vati, Mbi o limbikiwa oco tu u yula, kuenje tu u fetuluinya.

¹¹ Puãi Yehova o ñasilili konyima ndesualali lilingisa usumba. Oco ava va ñangisa va lipunduka, ka va njuli. Va kutisua osõi, ka va tẽlisa eci va endela. Osõi yavo yenda ño-o hũ kuenje ka yi ivaliwa vali.

¹² A Yehova Ukualohoka, haive o setaika vakuesunga, kuenje o lete vutima loku limbuka olondunge, tava okuti eci o va fetuluinya ame ndi ci mõla, momo ondaka yange nda yi yeka kokuove.

¹³ Imbili Yehova ocisungo. Sivayi Yehova. Momo eye wa popela omuenyo wosuke povaka olondingaĩvi.

¹⁴ Eteke nda citiwa li siñaliwe! Eteke mãi a nyita ka li ka sivayiwe!

¹⁵ Omunu weyile ku tate, hati, Tua pandula omo omõla ulume wa ku citilua, a siñalĩwe.

¹⁶ Omunu waco a linge ndovaimbo a Yuda ana Yehova a nyõla kuenje ka kuatelele ohenda: a yeve okulila omẽle kuenda evilikiyo liocilunga kutanya.

¹⁷ Momo ka njipalele vimo, okuti mãi nda wa ndingilile eyambo liange, limo liaye nda ka lia pupulukile vali.

¹⁸ Nye nda tundila vimo oku mõla upange lupongo, okuti oloneke viange vi pita ño losõi?