YEREMIYA 2 - Embimbiliya - Bíblia Sagrada em Umbundu

¹ Ondaka ya Yehova yeya kokuange yiti,

² Kuende, ka vilikiye ko Yerusalãi, huti, Ca popia Yehova ceci, hati, Nda ivaluka ndomo kutila wove wa litumbika olumue. Nda ivalukavo ocisola cove cundombua, ndeci wa ñuama vekalasoko, vofeka ka ya limiwile.

³ Isareli wa tepisua la Yehova okuti koku kola o likasilili. Eye ovaima atete kokuungula kuaye. Vosi va liako va pisiwa, kuenje evĩho lia va wila. Oco ca popia Yehova.

⁴ Anjo ya Yakoba, apata osi onjo ya Isareli, yeveleli ondaka ya Yehova.

⁵ Ca popia Yehova ceci, hati, Ekandu lie olosekulu viene via sanga kokuange okuti via nunda, yu via enda kupãla? Via kuamẽla nye esanda okuti via linga vakuesanda?

⁶ Ka va popele hẽ vati, Yehova o kasi pi, u wa tu upa vofeka ye Egito, haeye wa tu songuila vekalasoko, vofeka yekango kuenda yakungu, vofeka ya kukuta haiyo yulembo wokufa, omo lomue o pitamo, lomue wa tungamo?

⁷ Yu ndo neneli vofeka yelau, ho li epako liayo kuenda ovina viaco vi pepa. Puãi eci wa iñili wa vĩhĩsi ofeka yange kuenje ocipiñalo cange wa ci lingisi cumbondo.

⁸ Ovitunda ka via pulile viti, Yehova o kasi pi? Ava va lombolola ovihandeleko ka va ñulĩhile; asongui vavo va sinila. Ovaprofeto vavo va pula pula ku Baale loku sanda ovina ka vi silivila.

⁹ Oco lopo ndu sombisi, lomãla vomãla vene ndi va sombisavo. Oco ca popia Yehova.

¹⁰ Yokili kovifuka via Kitima ho vanji. Tumi ko Kedare ho kũlĩhĩsa lutate, ho limbuka nda kua la kala ocina ndeci.

¹¹ Ku li nga ofeka ya pongolola olosuku viayo ndaño halosuku viociliko? Puãi omanu vange va pongolola ulamba wavo ha va kuata ocina caño.

¹² Ailu, ci salukila. Kala lusumba walua, liyula muẽle. Oco ca popia Yehova.

¹³ Momo omanu vange va linga ovina vivali vĩvi. Va ngu sia ame ndino yovava omuenyo, kuenje va lisokotuila atangi a toka toka, ka a kuata ovava.

¹⁴ Isareli hẽ upika, pamue omõla upika? Nda hacoko nye a pundawaila ño?

¹⁵ Ayove olohosi o komẽla, o wolẽla. Va lingisa ofeka yaye ekalasoko, ovaimbo aye a linga alunda, lomue wa tungamo.

¹⁶ Va Memifi kuenda va Tafani va vulula onumbutue yove.

¹⁷ A nga, kua ci likokelele ove muẽle omo wa yanduluka Yehova Suku yove osimbu a kala loku ku songuila vonjila?

¹⁸ Kaliye wendela nye ke Egito hu nyui kovava a Nilu? Wendela nye ka Asuria hu nyui kovava a Ferati?

¹⁹ Evĩho liove liu ku longa, kuenda olukonyo luove lu ku yambula. Oco ci kũlĩha kuenda ci limbuka ove muẽle okuti okuyanduluka Yehova Suku yove kuvi kuenda ku lula. Ove ku ñuetele usumba. Oco ca popia Yehova Suku Ukualohoka.

²⁰ Momo osimbu wa teya okanga yove kuenda wa tepa ovikolo viove, yu wa linga huti, Siu ku vumbi. Momo kolomunda viosi kuenje vemehi lioviti viosi via pulika wa pekela ndocipuepue.

²¹ Haimo nda ku tuika nduyuva wa nõlĩwa kombuto yocili. Wa pongoloka ndati okuti wa linga olunjuanjua?

²² Ndaño o yua lonasi yetiko kuenda lonjapãu ya lua, haimo atime evĩho liove lopo ndi a lete. Oco ca popia Yehova.

²³ O popia ndati huti, Sia liñisilue, sia kuamẽle va Baale? Tala onjila yove yovomaka, limbuka eci wa linga. Vumange yongamelo yolupesi yi lupukila volohoka viayo.

²⁴ Vucimbulu covusenge ca ika vekalasoko, ci lehũla ofela kuvo waco. Nda ci kasi kuvo waco helie o tẽla oku ci lupuisa? Viosi vi ci sanda ka vi ka likavise, nda ci kasi kuvo waco vi ci sanga lombili.

²⁵ Yuvuisa olomãi viove oku enda ño ndoto, kuenda enyona posingo yove. Puãi ove huti, Hacoko, ka kuli elavoko, momo sole ingendeleyi kuenje ngenda lavio.

²⁶ Ndeci ocimunu ci kutisua osõi eci ci kuatiwa, haico onjo ya Isareli yi kutisua osõi, ovo, lolosoma viavo, lolombuale viavo, lovitunda viavo kuenda ovaprofeto vavo;

²⁷ ava va popia luti vati, Ove vu tate, kuenda va popia lewe vati, Ove wa nyita. Va njimba onyima, ka va mongolokelele. Kohali yavo puãi va linga vati, Votoka, tu popele.

²⁸ Puãi olosuku viene wa litungili vi kasi pi? Vi votoke, nda vi tẽla oku u popeli kohali yene. A Yuda, olosuku viove via lua, via lisoka lovaimbo ove.

²⁹ Nye vu linjeyeleli? Ene vosi wa ñatuli. Oco ca popia Yehova.

³⁰ Omãla vene nda va veta ño, lopo ka va longiwile. Osipata yene muẽle ya lia ovaprofeto vene ndeci ohosi yi lia lia omanu.

³¹ Acitumbulukila, yevi ondaka ya Yehova. A nga, nda lingila Isareli ekalasoko, pamue ofeka yowelema? Nye omanu vange va popela vati, Tua yovoka, ka tu iya vali kokuove?

³² Ufeko o tẽla oku ivala aposuiso aye, pamue ondombua uwalo waye? Haimo omanu vange va njivala oloneke ka vi tendiwa.

³³ O suñamisa cocili olonjila viove hu sandi vakuacisola! Oco ndaño vakuokahonga wa va longisa olonjila viove.

³⁴ Kuenda kuwalo wove ku sangiwa osonde yolosuke vie lipua, kua vi sangele leko. Haimo, cosi oco,

³⁵ wa linga huti, Ame nde lipua. Ka ku pumbi okuti onyeño yaye ya nunda.— Omo wa linga huti, Sia lingile ekandu, oco hu sombisa.

³⁶ O tungayailala nye loku pongolola olonjila viove? Egito yi ku kutisa osõi ndeci Asuria ya ku kutisa osõi.

³⁷ Haiko o tunda loku likuata olukondo; momo ava wa va kolela Yehova wa va likala. Lacimue o muila kokuavo.