YEREMIYA 19 - Embimbiliya - Bíblia Sagrada em Umbundu

¹ Ca popia Yehova ceci, hati, Kuende, ka lande esanga liutungi wolombia kuenje pañinya akulu vamue vomanu lakulu vamue vovitunda;

² oco tunda, kuende kekungu liomãla va Hinome li kasi keñilĩlo liombundi yoviyo, oko o ka sapuila olondaka ndu ku ĩha.

³ Linga huti, Alosoma via Yuda, lene alonungi via Yerusalãi, yeveleli ondaka ya Yehova. Ca popia Yehova Ukualohoka, Suku ya Isareli, ceci, hati. Tala, nenẽla imbo lilo eci cĩvi okuti wosi o ci yeva ovatui aye a sanyanya.

⁴ Omo omanu vaco va njanduluka, kuenje va vĩhisa ocitumãlo cilo loku timĩhilamo olosuku vikuavo insensu. Lolosuku viaco ovo muẽle ka va vi kũlĩhĩle, ndaño vakukululu vavo, pamue olosoma via Yuda. Va yukisa ocitumãlo cilo osonde yava ve lipua.

⁵ Va tunga ovimbumbumba via Baale, ha va timĩhilãko omãla vavo valume ndocilumba ca yokiwila Baale, osimbu ame sia ci tumile ndaño oku ci popia, kuenje vutima wange ka ca la iñilamo.

⁶ Oco Yehova wa popia hati, Tala! Ku iya oloneke okuti ocitumãlo cilo ka ci tukuiwa vali, Tofete, pamue Ekungu liomãla va Hinome, puãi ci tukuiwa Ekunguliepondelo.

⁷ Vocitumãlo cilo nyõlamo ahãla a Yuda la Yerusalãi. Omanu vavo ndi va nyolẽla kovaso ovanyãli vavo losipata yi kasi povaka ava va sanda ovimuenyo viavo. Ovivimbi viavo ndi vi lingisa okulia kuolonjila viokilu lovinyama viokilu lieve.

⁸ Imbo eli ndi li kundula okuti li yoliwa epembe. Vosi va pitako va li komõha, va sonyaila ayambulo alio.

⁹ Ndi va lisa ositu yomãla vavo valume leyi yomãla vavo vakãi. Voloneke viocilunga lolohali, vina ovanyali vavo lava va sanda ovimuenyo viavo va va vi talisa, ndi va lisa omunu ositu yu a lisungue laye.

¹⁰ Oco wipailela esanga kovaso alume va enda love.

¹¹ O popia lavo huti, Ca popia Yehova Ukualohoka ceci, hati, Ndeci umue a ipãla ocikuata cotuma okuti ka ci tava oku ci sakula vali haico njipa omanu vo vimbo lilo. Va kenda ovivimbi vekungu lia Tofete omo ka ku li vali apa va kendela.

¹² Oco muẽle ndinga limbo eli kuenda lolonungi vialio, okuti imbo eli ndi li sokisa la Tofete. Oco ca popia Yehova.

¹³ Olonjo viosi via Yerusalãi lolonjo violosoma via Yuda vi liñisiwa, vi vihisua nda Tofete. Momo kalusoka olonjo viaco va timãhãila insensu olohoka viokilu, kuenje va pesila ovilumba vioku nyua olosuku vikuavo.

¹⁴ Oco Yeremiya wa tiuka ko Tofete, oko Suku o tumile oku ka imba ondaka, kuenje wa talama vilu vocitali conjo ya Yehova, yu wa popia lomanu vosi, hati,

¹⁵ Ca popia Yehova Ukualohoka, Suku ya Isareli, ceci, hati, Tala! Ndi nenẽla imbo lilo kuenda aluvumba alio osi cosi cĩvi nda li tukuila, momo va ngangavaisa olosingo viavo kuenje ka va tava oku yeva olondaka viange.