YEREMIYA 18 - Embimbiliya - Bíblia Sagrada em Umbundu

¹ Ondaka ya tunda ku Yehova kuenje yeya ku Yeremiya yeyi, yiti,

² Votoka, kuende konjo yutungi wolombia, oko hu sapuila olondaka viange.

³ Oco nda ile konjo yutungi wolombia kuenje tala, eye wa kala loku linga upange lelola liaye.

⁴ Oco eci ombia a kala loku tunga ya nyõlẽhela peka liutungi wolombia eye wa yi tungulula ha tungi ombia yiñi ndomo co sungulukila.

⁵ Oco ondaka ya Yehova yeya kokuange yiti,

⁶ Anjo ya Isareli, si tẽla nga oku linga love ndeci utungi o wolombia a linga? Oco ca popia Yehova. Tala, anjo ya Isareli, ndeci otuma tu kasi peka liutungi wolombia haico ove o kasi peka liange.

⁷ Nda eteke limue nukuila ofeka yimue pamue usoma umue siti, Ndi yi tukũla, ndi yi teya loku yi nyõla,

⁸ ofeka yaco nda tukula, nda noke yi tinduka kevĩho liayo, ame ndi liweka kueci cĩvi nda sokele oku yi linga.

⁹ Kuenda nda eteke limue nukuila ofeka yimue pamue usoma umue siti, Ndi yi tunga loku yi tuika,

¹⁰ ofeka yaco nda tukula, nda noke yi linga evĩho kovaso ange, kuenje ka yi tava kondaka yange, oco ndi liweka oku yi linga eci ciwa nda sokele oku yi linga.

¹¹ Oco popia la Yuda kuenda olonungi vio vo Yerusalãi huti, Ca popia Yehova ceci, hati, Ñasi loku vu sokiyila eci cĩvi loku vu tumbila ehãla. Ene vosi, tiuki. Omunu omunu a tinduke konjila yaye yĩvi. Suñamisi olonjila vione kuenda ovilinga viene.

¹² Puãi va popia vati, Ka ci silivila oku tu lungula ndomo, momo tu linga muẽle ocipango cetu. Omunu omunu ndomo mua panga umbinde wutima waye ũvi omo a linga.

¹³ Oco Yehova wa popia hati, Puli pokati ka vakualofeka, hoti, Elie wa la yeva cimue ndeci? Ufeko Isareli wa linga cimue ca vĩha enene.

¹⁴ Oneve nga, yimũha kovawe okonumbuko ya Levanone? Ovava atalala a tunda kolomunda hẽ a takata?

¹⁵ Puãi omanu vange va njivala. Va timĩhĩla olosuku viesanda insensu. Va likonjokela volonjila viavo viosiãhũlu. Va pambukila votunjila tuaño, ka va endela vali velila liocili.

¹⁶ Oco va nyõla enene ofeka yavo okuti yi yoliwa epembe ka li pui. Vosi va pitamo va komõha, va lipuka kovitue.

¹⁷ Ndeci ci sandula ofela yokutundilo haico ndi va sandola. Keteke liocinjoko cavo, ndi va imba onyima, ocipala hacoko.

¹⁸ Oco va linga vati, Tu tumbiki Yeremiya ongombo, momo ocihandeleko ka ci pui handi kocitunda, pamue elungulo kukualondunge, ndaño ondaka yuprofeto. Oco tu u nyõli loku u sokola. Ka tu ka tavi kolondaka viaye ndaño yimosi.

¹⁹ A Yehova, njevelele. Kuluila etui koku liyula kuange.

²⁰ Cĩvi nga ci linga onima yeci ciwa? Haimo ovo va fẽlẽla omuenyo wange okueve. Ivaluka ndomo nda talamẽle kovaso ove oku va livondelela okuti onyeño yove yi va tunda.

²¹ Oco, nenela omãla vavo onjala. Va eca kosipata. Akãi vavo va kale olosiũle loku linga ovimbumba. Alume vavo va fe lefengi. Ovipombokuenje viavo vi take losipata vocilunga.

²² Okulila ku yevalele kolonjo viavo eteke o va nenẽla ovita ocipikipiki. Momo va felela okueve, kuenje va tela olomãi viange onjanjo.

²³ Puãi ove, a Yehova, wa kũlĩha ongombo yavo yoku njipa. Ku ka va ecele evĩho liavo. Ku ka imũle ekandu liavo kovaso ove. Va kupuiwe kovaso ove. Va yambula keteke lionyeño yove.