YEREMIYA 17 - Embimbiliya - Bíblia Sagrada em Umbundu

^1-3 Ekandu lia Yuda lia sonẽhĩwa lopena yutale, lia tãlĩwa losungu yondiamande kevaya liovitima viavo, kuenda kolombinga viovotala avo. Li sonehiwa osimbu omãla vavo va ivaluka ovotala avo lolongunji viavo vi kola, ndomo via kala koviwulu viosi, kuenda kolomunda viofeka. Ovikuata viove kuenda ovipako viove viosi ndi vi pundisila akandu ove a lingiwila vofeka yene.

⁴ Ove o tokoka ocipiñalo cove nda ku ĩha: kuenje hu tuma okuti o vumba ovanyãli vove vofeka kua kũlĩhĩle. Momo vonyeño yange nda siakãla ondalu yi taima ño-o, ka yimi.

⁵ Ca popia Yehova ceci, hati, A siñaliwe omunu o kolela omunu, kuenje o limalehisa lika evi vietimba loku upa utima waye ku Yehova.

⁶ Wa linga ndovisapa viaño vio vekango, ka limbuka cimue ciwa eci ciya. O tumãla ño-o vonepa yimue ya kukuta yovekalasoko, pamue vofeka yomongua omo ka mũli olonungi.

⁷ Omunu o kolela Yehova, kuenda Yehova o linga elavoko liaye, eye wa sumũlũha.

⁸ Momo wa linga nduti wa kũlĩwa konele yovava, kuenje u yandisa olombombo viavo kolui. Ko kuata ohele nda ku iya owuya, omo emẽla liawo haimo li talalela. Unyamo wocitenya ko u lingi cimue, omo ko liweka oku ima epako.

⁹ Utima wa piãla kelimbi haiwo wa hongua enene. Helie o tẽla oku u kũlihisa?

¹⁰ Ame, Yehova, ame moñolola olondunge, haime seteka utima, okuti ngeca komanu vosi, omunu omunu, eci ca soka lovituwa viaye, haico ca soka ndepako liovilinga viaye.

¹¹ Omunu o selaeka ukuasi puãi halesungako wa linga ndonguali yi lalela asaila ka ya imbilile oyo muẽle. Momo pokati koloneke viaco u u sia, kuenje kesulilo liaco o linga eveke.

¹² Ocitumãlo cetu ci kola, oco ocalo culamba, ca tumbikiwa kilu tunde kefetikilo.

¹³ A Yehova, alavoko lia Isareli, vosi va ku tunda va kutisua osõi. Ava va ku sia va sonẽhiwa voneketela momo va tunda ku Yehova, haeye ono yovava omuenyo.

¹⁴ A Yehova, sakule kuenje ñaya; mopele kuenje njovoka; momo ove usivayo liange.

¹⁵ Tala, va popia lame vati, Ondaka ya Yehova yi kasi pi? Kaliye yiye!

¹⁶ Ove wa kuliha okuti sia ku peyele oku tuma evĩho, ndaño oku yongola eteke liohali sia li yonguile. Cosi ca tunda vomẽla wange ca kũlĩhiwa love.

¹⁷ Ku ka ñokele ocinjoko momo ove vucikolo cange keteke liohali.

¹⁸ Ava va ñangisa va kutisue osõi, puãi ku ka tave okuti ñutisua osõi. Ovo va yokoke, puãi ku ka tave okuti ame njokokisua. Va muisa eteke liohali, va nyõla leci ca soka lenyõlẽho liolonjanja vivali.

¹⁹ Ca popia lame Yehova ceci, hati, Kuende, ka talame vombundi ya Benjamini, omu mu iñailãila olosoma via Yuda, haimo va tundaila. Talamavo volombundi viosi via Yerusalãi.

²⁰ Popia lavo huti, Alosoma via Yuda, lene a va Yuda vosi, lene alonungi viosi via Yerusalãi, ene vosi wiñailaili volombundi evi, yeveleli ondaka ya Yehova.

²¹ Ca popia Yehova ceci, hati, Lunguki lovimuenyo viene. Ko ka ambati ovitele eteke liesambata, ko ka iñili lavio volombundi via Yerusalãi.

²² Kesambata ko ka tundi volonjo viene locitele, ndaño upange umue ko ko lingi. Puãi kolisi esambata ndeci nda handeleka vakukululu vene.—

²³ Puãi ovo ka va yeveleleko, ka va kuluilile ovatui avo, puãi va ngangavaisa olosingo viavo okuti ka va yevi kuenje ka va longiwa.

²⁴ Ca popia Yehova ceci, hati, Puãi nda vu njevelela lutate okuti ko piti volombundi vimbo lilo locitele keteke liesambata, puãi vu kolisa esambata okuti ko lingimo upange,

²⁵ oco volombundi vimbo lilo mu iñailãila olosoma vi tumãla kocalo ca Daviti, kuenda olombuale vi endaila vakãlu kuenda kotuvalu, ovo kuenda olombuale viavo kuenda alume va Yuda lolonungi via Yerusalãi. Kuenje imbo lilo li kala ño-o hũ lolonungi oloneke ka vi pui.

²⁶ Kuenje va tunda kovaimbo oko Yuda kuenda kovikanjo via Yerusalãi, lokofeka ya Benjamini, loko Sefela, lokofeka yolomunda kuenda ko Sul. Va nena ovilumba vioku yoka levi vioku pia elisi kuenda alembe linsensu. Veyavo konjo ya Yehova levi violopandu.

²⁷ Puãi nda ko njevelela, loku kolisa eteke liesambata okuti ka wambati ocitele loku iñila volombundi vioko Yerusalãi kesambata, oco siakãlẽla ondalu volombundi via Yerusalãi kuenje yi lia olonjo viulamba via Yerusalãi kuenje ka yimi.