YEREMIYA 16 - Embimbiliya - Bíblia Sagrada em Umbundu

¹ Ondaka ya Yehova yeya kokuange yiti,

² Kulo ku kuelako ukãi, ndaño oku citilako omãla.

³ Momo oku tukula omãla valume kuenda omãla vakãi va citiwila mũlo loku tukula vainavo kuenda vaisiavo va va citila vofeka yilo, Yehova wa popia hati,

⁴ Va fa lovovei ãvi, ka va liliwa, ndaño oku kendiwa. Va kala ño kilu lieve ndaniña. Va fa losipata kuenda onjala. Ovivimbi viavo vi linga okulia kuolonjila viokilu kuenda ovinyama viovusenge.

⁵ Momo ca popia Yehova ceci, hati, Ku ka iñile vonjo yonambi, ku ka ende oku va lila ndaño oku va sinumũla, momo ombembua yange lohenda yange, ndaño ocisola cange ka ci pongoloka, viosi nda vi upa komanu ava. Oco ca popia Yehova.

⁶ Ava vanene lava vatito va fila vofeka yilo. Ka va kendiwa, lomue o va lila. Lomue o va litandela pamue oku va lipemuĩla esenya.

⁷ Lomue eca ombolo yoku lila ku wa fisa, lomue u lembelekela u a fisa. Lomue o wiha okopo yelembeleko ha yi nyuila isiaye pamue inaye.

⁸ Ka ci tava oku iñila vonjo yonambi oku tumãla kumuamue lavo oku lia pamue oku nyua.

⁹ Momo, ca popia Yehova Ukualohoka, haeye Suku ya Isareli, ceci, hati, Tala, voloneke vilo kovaso ove nyimũla vofeka ondaka yonjolela leyi yesanju, nyimũlavo ondaka ya Sandombua leyi ya Ndombua.

¹⁰ Oco eci o sapuila omanu ava olondaka evi viosi kuenje va ku pula vati, Nye Yehova a tu tukuilila ovina evi viosi vĩvi? Olohole vietu vie? Ekandu tua lingila Yehova Suku yetu olio lie?— oco o va sapuila,

¹¹ huti, Ca popia Yehova ceci, hati, Omo vaisiene va njanduluka loku kuama olosuku viñi kuenje va vi vumba loku vi fendela okuti va njanduluka muẽle, ka va pokuile kovihandeleko viange;

¹² lomo ene muẽle wa lingi cĩvi vali enene, okuti eci cavaisiene ci sule,— momo, tala, vosi yene omunu, omunu, vu lingainga ndeci ovitima viene vĩvi via panga, kuenje ka vu njevelela,—

¹³ oco ndu tundisi vofeka yilo ha vu kala vofeka ka wa kulĩhĩli, ndaño ene, ndaño vaisiene. Omo vu ka vumbila olosuku vikuavo utanya luteke omo siu lingi ohenda.

¹⁴ Yehova wa popia hati, Oco, tala, oloneke vi iya viokuti ka ci popiwa vali citi, Ndeci Yehova a kasi lomuenyo, u wopa omãla va Isareli vofeka ye Egito

¹⁵ puãi va linga vati, Ndeci Yehova a kasi lomuenyo, u wopa omãla va Isareli kofeka yoko Norte kuenda kolofeka viosi vikuavo oko a va sanduilile. Momo ndi va nena vali vofeka yavo yina nda ecele ku vaisiavo.

¹⁶ Yehova wa popia hati, Tala, numisa anyanga a lua olõsi kuenje a va pipa; noke numisa anyanga a lua kuenje a va yeva kolomunda viosi, kuenda kovivulu viosi, lokaleva osi ovawe.

¹⁷ Momo ovaso ange a lete ovilinga viavo viosi, ka vi vundisua kokuange, ndaño evĩho liavo ka lia vundile ko kuange.

¹⁸ Fetuluinya luvali evĩho liavo lekandu liavo, momo va vĩhĩsa ofeka yange lovĩfe vioviteka viavo vi linga onyanya, va yukisa ocipiñalo cange umbondo wavo.

¹⁹ A Yehova, a Ngusu yange, a Cikolo cange, a Civundilo cange keteke liohali, olofeka viosi, tunde kasulilo okilu lieve, viya kokuove, kuenje vi linga viti, Ovina viosi vaisietu va piñala viuhembi lika, haivio viesanda, ka vi kuatisa cimue.

²⁰ Omunu nga, o litungila olosuku? Olosuku viaco halosukuko!

²¹ Oco tala, ndi va limbukisa, ndi va limbukisa olumue ongusu yange kuenda upami wange, oco va kũlĩha okuti Yehova oyo onduko yange.