YEREMIYA 15 - Embimbiliya - Bíblia Sagrada em Umbundu

¹ Oco Yehova wa popia lame hati, Ndaño Mose kuenda Samuele va talamẽle kovaso ange haimo utima wange nda ka wa kuatelele ohenda omanu ava. Va tundisa kovaso ange, va ende ño.

² Eci va ku pula, vati, Tu ila pi? ove o va sapuila huti, Ca popia Yehova ceci, hati, Ava va tukuilua efengi, kefengi, ava va tukuilua osipata, kosipata; va tukuilua onjala, konjala, va tukuilua umandekua, kumandekua.

³ Yehova hati, Ndi va tukuila ovanyõli vakuãla vokuti, osipata yoku ponda, olombua vioku sunyũla, olonjila viovusenge vi lia lia, kuenda ovinyama viovusenge vi nyõla nyõla.

⁴ Ndi va lingisa eci ci yokokisa olofeka viosi viokilu lieve. Ndi ci lingila ovina viosi Manase, omõla a Hesekiya, Soma ya Yuda, a linga vo Yerusalãi.

⁵ A Yerusalãi, helie o ku kuatela ohenda? Helie o ku lilila? Helie o yapuka oku ku pasula?

⁶ Yehova wa popia hati, Omo wa njanduluka, kuenje o kasi loku okoloka ño-o oco nda ku oluila eka liange yu nda ku nyõla. Nda kava loku ku linga ohenda.

⁷ Nda va punguila lopa volombundi viofeka. Nda fĩsa omãla vavo. Nda nyõla omanu vange omo ka va tindukile kolonjila viavo.

⁸ Nda va luisila ovimbumba ndeseke liokalunga. Kutanya nda nenẽla ina yomãla unyõli. Nda va nenẽla upongo locinjoko ocipikipiki.

⁹ U wa cita epanduvali wa ambuka, wa tula omuenyo. Ekumbi liaye lia iñila tupu utanya; wa kutisua osõi kuenda wa munihisua. Ava va supa ndi va eca kosipata, lovanyãli vavo va ci mõla. Oco ca popia Yehova.

¹⁰ A mãi we, ngongo yange omo wa nyita; omo ame ndukuakukoka uyaki, haime ndukuakutamãlãla loluali luosi! Sia la levalisa umue, ndaño oku levala, haimo vosi yavo va siñala.

¹¹ Ci ndingiwe, a Yehova, nda sia ku likutililile ovanyãli esumulũho pamue oku ku va livondelela kotembo yohali yavo lokusakalala kuavo!

¹² Umue hẽ o tẽla oku teya utale woko Norte pamue osipi?

¹³ Ovikuata viove lipako viove ndi tava okuti vi kuatiwa, ka vi kuata ondando, vi linga ofeto yolohole viovofeka yove yosi.

¹⁴ Ndu lingisi apika pokati kovanyãli vene vofeka ka wa kũlihĩli. Momo vonyeño yange mua siakãlĩwa ondalu yimue yi taima ño-o hũ.

¹⁵ A Yehova, ove wa ci kũliha. Njivaluke. Masule. Fetuluinyile ava va njambula. Omo ove o kasi lepandi ku ka njupe. Limbuka okuti nda ku muĩla esepu.

¹⁶ Olondaka viove via sangiwa kuenje nda vi lia. Olondaka viove via linga onjolela yange, havio esanju liutima wange. Momo nda tukuiwa londuko yove, a Yehova, a Suku yolohoka.

¹⁷ Sia tumãlẽle kumue lava va sanjuka, ndaño oku yolela sia yolelele. Nda litumãlẽla omo eka liove lia mbuila. Momo ove wa njukisa onyeño.

¹⁸ Olongembia viange nye vi endela ño-o? Lepute liange nye ka li kayela okuti ka li tava oku sakuiwa? Ove he o ndingila okacitovotovo ka tepoloka, pamue ovava a takata?

¹⁹ Oco, ca popia Yehova ceci, hati, Nda o pongoloka ove muẽle hu tumbulula kuenje o talavaya vali upange wange. Nda o popia evi viocili, okuti viesanda havioko, o linga muẽle ndomẽla wange. Ovo va pongolokela kokuove, puãi ove ku pongolokela kokuavo.

²⁰ Kuenje hu lingisa ndocimbaka cosipi comanu ava. Va yaka love puãi ka va ku yuli, momo ame ñasi love oku ku popela kuenda oku ku silamẽla. Oco ca popia Yehova.

²¹ Hu popela povaka a vakuevĩho, kuenje hu yovola povaka oloñangisi.