YEREMIYA 14 - Embimbiliya - Bíblia Sagrada em Umbundu

¹ Ondaka ya popiwila ocitenya, yina Yehova a popia la Yeremiya, yeyi:

² Yuda o lila lolombundi viayo violumũha. Omanu vaye va pekela posi loku lila. Okulila kua Yerusalãi kua yevala kupãla.

³ Olombuale via tuma apika vavo oku tapa ovava. Yeya katangi puãi ka va sangi ovava, va tiuka lovikuata viavo upolokoso. Va sakalala, va kutiwa osõi, kuenje va sikĩlĩla ovitue viavo.

⁴ Omo ombela ka ya lokele, kuenje ongongo ya kukuta enene, oco olongunja vi kutisua osõi kuenje vi sĩkĩlĩla ovitue viavo.

⁵ Ndaño onusi yi sia omõla ayo tuli a cita omo ka ku li ulio.

⁶ Ovimbulu viusenge vi tãi kolomunda vialupele, vi laka ndolombulu. Ovaso avio a peketa omo ka ku li owangu.

⁷ A Yehova, lingila onduko yove cimue ndaño olohole vietu via tu wengukila. Momo alukonyo etu a lua. Tua ku lingila ekandu.

⁸ Ove ulavoko lia Isareli, haive vupopeli waye keteke liohali, nye o lingila ndocingendaende vofeka, ndongende yi lalela ño uteke?

⁹ Nye o lingila ndukuanguengue, pamue ndomunu ukualohõlo ka tẽla oku popela? Haimo ove, a Yehova, o kasi pokati ketu, kuenje tua tukuiwa londuko yove. Ku ka tu sie.

¹⁰ Ca popia Yehova oku tukula omanu vaye, ceci, hati, Va sola oku tungayala kuenje ka va lemẽlẽle olomãi viavo, oco Yehova ka va tava. Kaliye ivaluka evĩho liavo kuenje o va yambuila akandu avo.

¹¹ Yehova wa popia lame hati, Omanu ava, ku ka va likutilile okuti va kala ciwa.

¹² Ndaño va likandangiya okulia si yevi evilikiyo liavo. Ndaño va lumba ovilumba via yokiwa levi viosema ame si vi tava; puãi ndi va lia losipata lonjala kuenda efengi.

¹³ Oco nda linga siti, Oco muẽle, A Suku Yehova, puãi ovaprofeto va popia popia lavo vati, Ko mõli osipata, ko kali lonjala, puãi vofeka yilo ndu wihilamo ombembua yi tumala hũ.

¹⁴ Oco Yehova wa popia lame hati, Evi via sapula ovaprofeto londuko yange viuhembi. Sia va tumĩle. Sia va ci tumbikilile. Sia popele lavo. Vo sapuili ocitumasuku cuhembi, ocitãho caco hacimueko, elimbi liovitima viavo.

¹⁵ Oco Yehova a va popela hati, Ovaprofeto va sapula ocitumasuku londuko yange ndaño sia va tumĩle, kuenje va popia vati, Osipata lonjala ka viya vofeka yilo,— ovo muẽle ndi va tukula, siti, Ovaprofeto vaco va liwa losipata lonjala.

¹⁶ Kuenje omanu va sapuilua ocitumasuku caco va inasiwa valuwa ovo Yerusalãi, va fa lonjala losipata kuenje ka ku kala u o va kenda ovo muẽle, ndaño oku kenda akãi vavo lomãla vavo valume pamue omãla vavo vakãi. Momo ndi va sukumũila olohole viavo.

¹⁷ Oco o popia lavo ondaka eyi, huti, Ovaso ange a tunde ño-o asuẽlẽla utanya luteke, ka a ka liweke; momo omõla omanu vange ukãi wa totiwa ombole yinene, epute liaco li linga usumba.

¹⁸ Nda mita vusenge tala, mõla ava va fa losipata! Nda nyiñila vimbo, tala, va vela onjala! Momo uprofeto kuenda ocitunda, vosi yavo, va talavaya ño vofeka; ka va kuete ukũlihiso.

¹⁹ Wa takumũla Yuda olumue? Utima wove hẽ u kuetele Siono onyanya? Nye wa tu vetela okuti ka tu kayi? Tua lavokaile ombembua puãi lacimue ciwa ceya. Tua lavokaile eteke lioku kaya, puãi tala, ema.

²⁰ A Yehova, tua kũlĩha olohole vietu, kuenda evĩho lia vaisietu, momo tua ku lingila ekandu.

²¹ Ku ka tu pukule. Tua ku livondela londuko yove. Ku ka muĩse ocalo culamba wove osõi. Ivaluka! Ku ka nyõle ocisila wa lisila letu.

²² Pokati kolosuku viesanda violofeka hẽ pa li evi vi tẽla oku nena ombela? Pamue ilu, olio muẽle, li eca eca ombela? Haveko hẽ, a Yehova Suku yetu, tua ku imba ovaso? Ove muẽle o lingainga ovina evi viosi.