YEREMIYA 13 - Embimbiliya - Bíblia Sagrada em Umbundu

¹ Ca popia Yehova lame ceci, hati, Kuende, ka lande onanga yekuamo, yitika vombunda yove, ku ka yi yave vovava.

² Oco nda landa ekuamo ndondaka ya Yehova, kuenje nda litika lalio vombunda.

³ Ondaka ya Yehova yeya vali kokuange yiti,

⁴ Tikula ekuamo wa landa, eli li kasi vombunda yove, katuka, kuende kolui Ferati, ka li soleke oko vutelele wewe.

⁵ Oco nda ile, nda ka li solekele kolui Ferati ndeci Yehova a sapuila.

⁶ Oco noke, eci pa pita oloneke via lua, Yehova wa popia lame hati, Katuka, kuende kolui Ferati, kope ekuamo nda ku sapuilile siti, Ka li soleke oko.

⁷ Oco nda ile kolui Ferati yu nda fẽla kuenje ndopa ekuamo oko nda li solekele, kuenje tala, ekuamo lia nyolẽha, ka li silivila vali.

⁸ Oco ondaka ya Yehova yeya kokuange yiti,

⁹ Ca popia Yehova, ceci, hati, Ndoco muẽle nyõla okulituna kua Yuda kuenda okulituna kua piãla kua Yerusalãi.

¹⁰ Omanu ava vãvi, haivo ka va tava oku yeva olondaka viange, puãi va endaenda lutatasi wovitima viavo, kuenje va kuama kuama olosuku vikuavo oku vi vumba loku vi fendela, oco va linga ndekuamo eli ka li silivila cimue.

¹¹ Momo ndeci ekuamo li lamẽlẽla vombunda yomunu haico nda lamelĩsa kokuange epata liosi lia Isareli lepata liosi lia Yuda, okuti kokuange va linga omanu kuenda onduko yesivayo kuenda ulamba. Puãi ka va tavele oku yeva. Oco ca popia Yehova.

¹² Oco popia lavo ondaka eyi huti, Ca popia Yehova, Suku ya Isareli, ceci, hati, Asanga osi e yuka ovinyu, oco va popia love vati, Anga ka tua ci kũlĩhĩle ciwa okuti asanga osi e yuka ovinyu?

¹³ Oco popia lavo huti, Ca popia Yehova ceci, hati, Tala, ndi yukisa olonungi viofeka yilo ndaño olosoma vi tumãla kocalo ca Daviti, ndaño ovitunda, ndaño ovaprofeto, lolonungi viosi via Yerusalãi, viosi ndi vi yukisa uholua.

¹⁴ Kuenje ndi va puma kumuamue ovitue, ndaño vaisiavo kumue lomãla. Yehova hati, Si va kuatela ohenda, si va ecela, si kala locikembe okuti si va nyõli.

¹⁵ Yeveleli, ñuluĩli etui; ko ka lisoli, momo Yehova wa popia.

¹⁶ Imbili Yehova Suku yene ulamba osimbu ka nenele owelema, osimbu olomãi viene ka via lipundukile kolomunda viokaluwumbulu. Osimbu vu sanda ocinyi eye o ci pongolola okuti ci linga ocilembo cokufa, noke ci linga owelema wosito.

¹⁷ Puãi nda ka vu tava oku yevelela, utima wange u lilila uyombeki okulituna kuene. Ovaso ange a lila ca lua, kuenje a loluka asuẽlẽla, momo ocunda ca Yehova ca tualiwa kumandekua.

¹⁸ Popia la Soma kuenda Inakulu huti, Lisepuisi, tumãli, momo ovifuto viene via futuluka, ndaño akolowa ulamba wene.

¹⁹ Ovaimbo oko Sul a ñualĩwa ocingonja kuenje ka ku li u o situlula. Yuda yosi ya tualiwa kumandekua; yosi muẽle ya tualiwa kumandekua.

²⁰ Petula ovaso ove, tala ava va tunda ko Norte. Ocunda ca ku ihĩwa ci kasi pi, ocunda cove ca posoka?

²¹ Ove o popia ndati eci ava wa longisa ove muẽle oku linga akamba vove va kapiwa nda va cime cove? Siti, olongembia vi ku kuata ndevi viukãi o kasi loku cita?

²² Nda o popia lutima wove huti, Ovina evi via mbetela nye?— kũliha okuti omo olongole viove via lua oco onanga yove ya punduiwa kuenje va ku vahila.

²³ U Etiõpia hẽ o tẽla oku pongoluisa ekova liaye, pamue ongue avala ayo? Nda oco, ove wa lilongisa oku linga cĩvi, mbi o tẽla oku linga ciwa.

²⁴ Hu sandula ndovinene vi enda lofela yovekalasoko.

²⁵ Eyi oyo onepa yove, oyo onepa nda ku yongela. Yehova hati, Omo wa njivala yu wa kõlela eci hacociliko,

²⁶ oco hu punduila olonanga viove kuenje osõi yove yi mõlẽha.

²⁷ Nda mõla akutisasõi ove lukahonga wove, kuenda onambo yove. Nda mõla osõi yupuepue wove koviwulu viovusenge. A Yerusalãi, ngongo yove! Eteke li pi o yelisua?