YEREMIYA 12 - Embimbiliya - Bíblia Sagrada em Umbundu

¹ A Yehova, eci ndi ku liyeyela ove o kuete esunga, haimo lumue nda panga oku somba love ondaka eyi yange. Nye ukuevĩho a sumulũhĩla? Nye olondingãivi viosi vi kasilili lelau?

² Ove wa va tuika, kuenje va kuatelela, va yova, yu va ima epako. Oku ku tukula lomẽla va ku tukola, puãi ovitima viavo vi kasi ocipãla love.

³ Puãi ove, a Yehova, wa ñulĩha. O ndete, o seteka utima wange nda wa tiamẽla ocili kokuove. Ovo puãi vopapo ndolomeme vi upiwila oku ipaiwa. Va kapela konele oku talamẽla eteke lioku pondiwa.

⁴ Toke eteke li pi ofeka yi lila kuenda ikũla viofeka yosi vi uvuka? Omo evĩho liava va tunga vofeka yaco lia lua oco ovinyama viovusenge kuenda olonjila via puamo. Momo omanu vati, Suku ka mõli ovilinga vietu.

⁵ Nda wa litunda lomanu kuenje va ku kavisa, oco hẽ o litunda ndati lotuvalu? Nda wa likasulapo vusenge waño, oco hẽ o linga ndati vusitu wa Yordão?

⁶ Momo ndaño vamanjove la vakuanjo yaso va ku lingila usuanji, va ku vilikiyila. Puãi ku ka va kolele, ndaño va popia love olondaka viusõsẽle.

⁷ Nda nyehũla onjo yange, nda yanduluka ocipiñalo cange. Ukuacisola cange ndo weca peka liovanyãli vaye.

⁸ Ocipiñalo cange ca ndingila ndohosi vusenge, ca ñomẽla, oco nda ci suvukila.

⁹ Ocipiñalo cange nga ca ndingila ndongonga yi mañana? Olongonga vikuavo hẽ via yi pupila? Kuendi, ongololi ovinyama viosi viovusenge, vi neni kokulia.

¹⁰ Ovangombo va lua va nyõla ocumbo cange cayuva, va kosa kosa lolomai onepa yange. Onepa yange ya posoka va yi lingisa ekalasoko liaño.

¹¹ Va yi lingisa muẽle ekalasoko. Ca ndilisa ndomo ya linga ekalasoko. Ofeka yosi ya linga ekalasoko puãi lomue ca tukula utima.

¹² Ovanyõli va pitila kolomunda viosi violupẽle viovekalasoko; momo osipata ya Yehova yi lia ofeka tunde kocihunyuhunyu congongo toke kocihunyuhunyu cikuavo. Lacimue ocendalomuenyo ci kala lombembua.

¹³ Va kũla otiliku kuenje vongula ocambanda, va likavisa ño, lacimue va sanga. Omo onyeño ya Yehova ya lua oco elombolo liavo li va kutisa osoi.

¹⁴ Yehova oku tukula vakuevĩho vosi va lisungue lame, ava va kuata kuata kocipiñalo cange nda ci piñalĩsa omanu vange va Isareli, wa popia hati, Tala, ndi va tukula vofeka yavo, epata lia Yuda ndi li tukula pokati kavo.

¹⁵ Noke, eci nda va tukũla ale, oco ndi va kuatela ohenda, ndi va nena vali omanu vosi, omunu kocipiñalo caye, omunu kocipiñalo caye, omunu kofeka yavo, omunu kofeka yavo.

¹⁶ Kuenje ci kala okuti, nda va lilongisa ovituwa viomanu vange loku lisinga londuko yange vati, Ndomo Yehova a kasi lomuenyo, ndeci ale va longisile omanu vange oku lisinga la Baale, oco noke va tungisiwa pokati komanu vange.

¹⁷ Puãi nda ofeka yimue ka yi yeviko oco nukũla ofeka yaco loku yi nyõla. Oco ca popia Yehova.